1Ji gato gum do Paulus, gato Yefun Allah bes gum yerasul wa ben Yesus Kristus bi suk-i, ji si men bi nji, Timotius men ka we anato krom surat ré wa nin. Men ka we krom sukdu ré wa nin yé gato onyar kem mo Yefun Yesus mo kota Korintus. Men ka we krom sukdu ré wa nin sor nde, wo men ka we krom sukdu ré wa Yefun Allah bi rus-i mo bur Akhaya ne sino dom.
2Men bi Ai, Yefun Allah si men bi Yekwesu Yesus Kristus ete mewa nin, Yefun Allah si Yesus Kristus ete uttok nin petok sor.
3Men bes men bi Yekwesu Yesus Kristus bi Ai, Yefun Allah ne gum kok. Men bi Ai mo gu ne dakai jimnotku men ndo nde. Yefun Allah mewa men mo sukye mwa ne sino gato men ku ne.
4Yefun Allah ben men nggi mo sukye mwa gato men ku ne sino, subere men nggiwa men waii mewa ye yi neya mo sukye mwa gato yé ne ku dom re. Bere men mewa yé ne tepsu Yefun Allah mewa men re.
5Men ku sukye tepsu Kristus ku ne wam bok yo mó re. Sane Yesus Kristus mewa men kadit sukye mwa gato men ku ne dom.
6Men ku sukye, men bi sukjimnut waiyu mone it yo, bere nin ku sukndo mone, we sukye ne ben men anato men nggiwa men mewa nin mo sukye gato nin ku ne, ete men ós nin kem ndo. Yefun Allah mewa men mo sukye gato men ku ne, subere men nggiwa men waii mewa nin mo sukye gato nin ku ne. Sane kom mo rut, nin ku sukye tepsu men dom ku ne yo, bere nin bi sukjimnut yo waiyu mo sukye ne teker nde, wo Yefun Allah ben nin nggi. Sane nin ku sukye yo, bere nin nggiwa nin misyar Yefun nde, wo nin simo An pe sor.
7Men jam do, nin do ku sukye tepsu men ku ne yo, bere Yefun Allah mewa nin mo sukye ne, tepsu Yefun Allah mewa men mo sukye gato men ku ne dom. Sane men kwabom kam mo Yefun Allah sare do, bere Yefun Allah mewa nin mo sukye ne sisu sangge sor tepsu An mewa men re.
8Sane men bi nji, men bi nyanggon, men iwa nin jam sukdu subot sukye gato men ku mo bur Asia. Mone men ku sukye ndo nde, men yo nggi o nde, sane sor men yo iwa kem mo bur ré o nde.
9Sangge, men nut do, bergan ete yé gu men kwop sor. Sarewo men ku sukye ne subere kak men bi sukjimnut, subere men bi sukjimnut sye mo men dakai bi suktinggi-i ne o nde, wo men bi sukjimnut sye mo Yefun Allah bi suktinggi-i ne sor. Yefun Allah bi suktinggi-i ne sa, men me bor mo gato Yefun Allah sun ye gato kwop kadit sukkwop. Sane sukye ne ós men subere men bi sukjimnut brek kadit men bi suktinggi-i kem mo Yefun Allah bi suktinggi-i gato bor mone.
10Yefun Allah mewa men kadit yé gato werwa gu men kwop mó re. Sane dom, su kam sari ne ma, bere Yefun waii mewa men kadit yé gato werwa gu men kwop mone o tó. Men kwabom kam mo Yefun sare do, bere An mewa men kadit sukye mwa ne sor.
11Sane nin ós men dom, nin ki suk su Yefun wa men et, subere Yefun Allah mewa men tepsu nin si yé mwa neya benadi wa men ne. Sane bere Yefun Allah ben sukndo su men, ete bere nin si yé mwa ne sino un Yefun Allah mone.
12Men dakai un men dakai wokgan, we men dakai jammo men bi sukjimnut gato ndo mo men mit sare do: Men ben men bi suk-i su yé mwa mo bur ré sa, Yefun Allah ben men nggiwa men ben men bi suk-i sisu ri-roi sor, sukibit yo ut mo men nde. Sane dom, men ben men bi suk-i su nin ndo wai kadit ne o re. Men ben men bi suk-i ne, men yo nai men bi sukjimnut-i mo yetu gato jam suk mwa mo bur ré bi sukjimnut-i nde, wo Yefun Allah ben sukndo su men anato An ben men nggiwa men ben suk gato ndo su nin re.
13Sukdu gato men krom mo surat ré, men krom ri-roi sor, men yo kidar nin nde, nin dakai baca ete bere sukdu ne rer wa nin jam re. Su ré nin jam men yo ri nde tó, sarewo ji kwabom kam mo nin sare do, bere nin jam men kom mo mit re, subere su kam gato men bi Yekwesu Yesus Kristus satu ma mo bur ré yo, bere nin bes men gum kok mo suk gato men ben ne tepsu men bes nin gum mo suk gato nin ben ne dom.
14(1:13)
15Ji jam do, sangge, bere nin un men mone, sane anato ji fro nggwa wa ji ba ku nin mo kota Korintus nyim wé kadit ji ba ku nje mo kota yi neya, subere ji ku os wa ji duno nin mone nap dik sor nde, wo ji do satu ma more it yo, ji duno nin nap kedowe mone dom.
16Ji nut do, ji mu mo bur Makedonia yo, ji ba ku nin nyim, ji duno nin mone. Or o, ji satu ma kadit Makedonia o yo, ji nut do, ji ba ku nin wam dik yo o, ji duno nin mone wam dik yo o, sane bere wam we it anane. Ji do satu ma it yo, ji mitwa nin ós ji mu mo bur Yudea.
17Ji fro os ré, ji nutbot sisu ndo re, ji yo fro daret nde, sarewo suk yo kwawa ji, sane ji yo sibot os gato ji fro ne nde. Nin nut do, ji fro os ré daret anato ji yo ba ku nin tepsu ji fro nde, bado? Yo mo nde. Ji fro os ré tepsu yetu mo bur ré fro bi os-i bado? Nde re. Yetu yo nai bi sukjimnut ne dik nde, wo bi sukjimnut ne we, bergan an ki do, "Sangge, bere ji ba ku nin," sarewo bergan yo o, ete an ki o do, "Nde re, ji yo ba ku nin nde."
18Tepsu Yefun Allah ki bi sukdu-i ne ri-roi sor, sane ji ki ji bi sukdu-i ri-roi nai nin, ji ki do, "Sangge, ji ba," yo, bere ji ba re, wo ji ki do, "Nde re, ji yo ba nde," yo, bere ji yo ba nde re.
19Ji ki ji bi sukdu-i ri-roi, we Yefun Allah bi Gan, Yesus Kristus ki bi sukdu-i ri-roi dom. Ji si Silas si Timotius, men ka gri anato ki sukdu subot Kristus nai nin jam. Kristus ki An bi sukdu-i do, "Sangge," orete bergan An ki do, "Nde re," sane mo nde. Yesus Kristus ben An bi suk-i su sukjimnut we nde, wo An ki do, "Sangge," petok sor.
20Sane suk mwa ne sino gato Yefun Allah tom su men, Yefun ki do, suk mwa ne "Sangge," mo suk gato Kristus ben ne re. Men me suk gato Yesus Kristus ben, sane men ki do, suk gato Yefun Allah tom su men ne "Sangge," bere Yefun benbot re, anato men bes Yefun Allah gum kok mone.
21Yefun Allah dakai anato kak os wa men sisu nin sino subere men yo misyar Yefun nde, wo men jom Yesus Kristus bi sukdu ne krat sor. Men si nin sino si Yesus Kristus tepsu dik it. Yefun Allah bes men sino tepsu An bi rus-i subere men ben An bi suk-i.
22Yefun ben sato syut suk yo yawa men tepsu An hiwa men subere yé jam do, men anato sok mo An bi rus-i it. An bok An Gen mo men mit re, sane men jam do, sangge, men sok mo An bi rus-i, ete suk mwa gato An tom su men ne, bere An ben su men mone tó.
23Yefun Allah jam ji kom mo mit re. Yefun Allah dakai jam do, su gabere ji yo satu ba duno nin mo kota Korintus o nde, we ji bariwa ji ben sukye nai nin, ji bariwa ji ndantom nin mo sukibit gato nin ben ne, we bere ji ben nin bi sukjimnut waiyu mone o re. Sane ji nai sukjimnut do, ji yo ba ku nin nde.
24Ji yo wergat nin subot sukduno gato nin jom tepsu ye gato onyar kem mo Kristus ne nde, we ji jam do, nin jom An bi sukduno-i ne krat it. Wo ji duno nin subere nin mit at wa Yefun bi os-i mwa o kadit nyim ne o re.
<< 2 Korintus 1 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel