Alkitab Mobile SABDA
[VER] : [ABUN]     [PL]  [PB] 
 <<  2 Korintus 10 >> 

1Ji dakai, gato gum do Paulus, ji kiwa nin jammo suk gato ji ki ré et. Ji jam do, yé bok yo ki ji gum ibit. Yé bok ne ki do, ji si nin mone yo, ji ki ji bi sukdu-i nai nin sisu ji nyu sor, wo ji kem os syu kadit nin yo, yé bok ne ki do, ji krom ji bi sukdu-i nai nin ne krat yé. Kristus bi sukjimnut-i ndo wa men, An ben An bi suk-i ne njep su men,

2sane ji waii ki ji bi sukdu-i nai nin tepsu Kristus. Ji ndek mo nin do, nin ki suk su yé bok yo mone subere án yo kiket ji gum o nde. Yé bok ne kiket ji si ye gato ben suk su ji sino more do, men ben men bi suk-i tepsu yetu mo bur ré ben bi suk-i ne. Sane yé bok ne ki men gum ibit mone tó yo, bere ji nuk án kwop dek mo án bi sukdu-i ne, wo ji do ba ku nin it yo, ji bariwa ji nuk án teker sane.

3Sangge, men kem mo bur ré, sarewo yetu ge bok yo duwer men yo, men duwer yé bok ne satu tepsu yetu gato kem mo bur ré duwer nje nde, wo men duwer yé bok ne su Yefun bi os-i ne sor.

4Yé bok yo duwer men mó yo, men gu yé bok ne su sukmise tepsu yetu mo bur ré ben bi suk-i nde. Men bi sukmise-i tara kadit yetu mo bur ré bi sukmise-i. Men jom Yefun Allah bi sukmise-i gato nggi ete men gwa biris bi yekwesu sane sor an yo ndo o nde. Men gwa an bi nu gato krat ne mbrur ete mwir-mwar su o re. Sukdu gato ye ki duwer Yefun bi sukdu-i su ne yo, men gwat Yefun bi sukmise ne ma, men syat sukdu ne, ete men bare sukdu ne wé mo nden re.

5Sukdu gato ye bes kok e, sukduno gato ye ki e ne duyawa Yefun Allah bi sukjimnut-i ne yo, men syat wé su Yefun bi sukmise-i ne. Men gwat Yefun Allah bi sukmise-i tepsu suktinggi wa men ki Yefun bi sukdu-i nai nje, subere yé ne win bi sukjimnut-i gato nyim ne wé, ete yé ne brek ma ete jammo Kristus et.

6Nin jammo Kristus mo suk mwa ne sino orete yo, ye gato bariwa jammo Kristus, bere men ben sukye nai ye gane mo sukibit gato an ben ne sor.

7Nin nutbot sukdu ré sisu ndo et. Nin dakai me mo de nden sor nde, wo nin werwa nin jam suk kom mo mit et. Yé bok gato nut do, án sa, tepsu ye gato sok mo Kristus bi rus-i yo, án nutbot sisu ndo o et. Án wadigan yo sok mo Kristus bi rus-i nde, wo men dom sok mone fe!

8Ji dakai un ji dakai mo suktinggi gato Yefun syo nai ji dom, ji yo damen nde, we Yefun yo syo suktinggi wa ji ben nin ibit su nde, wo Yefun syo suktinggi nai ji subere ji nggiwa ji ós nin onyar kem mo Yefun nggi wai o kadit nyim ne re.

9Sane ji bariwa nin nut do, ji krom surat bok yo subere ji ben nin nyu mone, ji bariwa re.

10Ye deyo ki do, "Paulus krom bi surat-i ne, an kem ko yo, an bi surat ne bi sukdu-i nggi yé re, krat yé re, wo an dakai kaim si men more yo, an bi sukdu-i yo nggi nde, an bi sukdu-i yo pet mo men mit wokgan yo dom nde."

11Ye gato ki sukdu ne nutbot sisu ndo et, subere an jam do, sukdu gato men krom mo men bi surat bok ne sugato men kem os syu kadit nin ne, men do ba mone yo, bere men ben men bi suk-i tepsu sukdu gato men krom ne sor.

12Nin jam yé bok yo gato dakai un an dakai do, án sa, ben bi suk-i ne ndo yé yo, men bariwa men bes men nggwa kok sagato yé bok ne ben ne. Men bariwa men bes men nggwa kok mo suk gato men ben ne, tepsu yé bok ne ben, men yo iwa bes men gum kok daret sane nde. Yé bok ne dakai un án dakai, án watbot suk gato án ben ne, án nutbot suk gato án ben ne, ete án ki do, án sa, ben bi suk-i ndo wai o re. Sarewo men jam do, án jimgon anato án bes án nggwa kok mone.

13Men bes men nggwa kok sato án ben ne nde. Men yo un men gum mo suk gato ye yi ben mo nat yi neya nde, wo men un men gum mo suk gato men ben mo nat gato Yefun fro wa men sor re, sato mo nin bi nat-i mo kota Korintus.

14Sane, men gwat sukdu subot os ndo gato Yesus Kristus kak ne, men ki rer nai nin jam mone, anato men waii un men gum mone tepsu suk gato men ben ne.

15Men yo un men dakai mo suk gato ye yi ben mo nat gato Yefun Allah fro wa an ne nde. Wo men ben suk su nin tepsu pe gato Yefun fro wa men ben suk mone. Men bi sukjimnut kem mo nin do, bere nin onyar kem mo Kristus nggi wai kadit nyim ne o re, subere men ku os wa men duno nin su Yefun bi sukdu-i mwa o et.

16Sane dom, men iwa men waii mu duno nje subot os ndo gato Yesus Kristus kak ne mo buryo-buryo dom et. Men bariwa men bes men gum kok mo suk gato ye yi ben mo bi nat-i, sane men iwa men mu duno nje mo bur yi kadit.

17Sarewo ye krom mo Yefun Allah bi sukdu sare do, "Ye to iwa bes an gum mo suk gato an ben ne, sa ndo sa, an dakai bes an gum sane nde, wo an bes Yefun Allah gum kok mo suk gato Yefun ben ne sor."

18We sare, ye gato dakai un an dakai yo, Yefun yo bes an gum kok nde, wo ye gato Yefun Allah dakai un ne sa, bere Yefun bes ye ne gum kok re.



 <<  2 Korintus 10 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel