Alkitab Mobile SABDA
[VER] : [ABUN]     [PL]  [PB] 
 <<  2 Korintus 7 >> 

1Ji bi nji, ji bi nyanggon gato ji jimnotku, Yefun Allah tom su men mo sukdu ne do, An nai men sok mo An bi rus-i, ete An tepsu men bi Ai. Sane it yo, men werwa men sombok sukibit mwa ne sino or wé kadit men et. Sukibit mwa gato Yefun Allah bariwa men ben ne yo, sukibit gato yé mwa me men ben ne si sukibit gato men gurik ne, men bi sukjimnut ibit dom ne, men wergat men nggwa subere men ben sukibit ne o nde. Men bi sukjimnut sye mo Yefun si suk gato Yefun tom su men, sane yo, men werwa men bi men nggwa mo Yefun, subere men dakai ben An bi suk-i ne ri-roi petok sor, kwa yo gwet mo nde.

2Nin mit dek ket men et. Men sa, men yo ben sukibit nai yetu ge dik yo mo nde. Men yo gwat os wa ben yetu ge dik yo ges mo os ibit mo nde. Men yo meret os wa nai suk kadit yetu ge dik yo dom nde.

3Ji yo iwa ki nin gum ibit mo sukdu ré nde, wo ji ki sukdu ré, tepsu sukdu gato ji ki nyim ne mó re. Men jimnotku nin ndo nde. Men kwop o, men mbau o, men mit iwa men si nin tepsu yedik petok sor anato ji ki sukdu ré.

4Ji kwabom kam mo nin sare do, bere nin benbot sukdu gato ji duno nin su ne tó. Ji nut subot nin sa, ji mit at wa nin ndo nde. Kapre ji ku sukye mwa, ji napakom nin anato ji yo nutbot sukye ne teker eta o nde, ji kem not kadit sukye ne sor. Ji mit at wa nin ndo nde.

5Men mu kom mo bur Makedonia sa, men yo ku os wa kem not mone nde, wo men ku sukye ket kwayo-kwayo gat pe sor. Men ku sukye, yé bok yo ot is men, men dakai nyu mo men mit dom.

6Sarewo Yefun Allah gato bidek ye gato nderku nggwa, Yefun ne ós men kem not kadit sukye ne o re. Yefun syogat Titus ma ku men anato ós wa ben men mit kem not mone.

7Yefun ós men kem not, An syogat Titus ma bidek men sor nde, wo men jam sukdu gato Titus ki subot nin dakai dom. Titus kibot suk gato nin ben ne anato Titus mit at wa. An ki nai men do, nin da o wa nin ku ji o et. Titus ki o do, nin damen mo suk gato nin ben suga nyim ne. Suga nyim ye deyo ma ki ji gum ibit, wo nin yo ki sukdu yo gwa yawa ji nde, wo su ré nin iwa nin ki sukdu gwa yawa ji gum it. Sane ji jam sukdu ne anato ji mit at wa wai o re.

8Suga nyim ji krom surat dik yo wa nin, orete ji nutbot wari do, ji krom surat ne wa suma ne? We ji jam do, nin ku ji bi surat ne anato nin nderku nggwa teker subot sukdu ne ndo nde, sane ji dom nutbot ndo nde. Sarewo ji jam do, bergan nin yo nderku nggwa mone o nde. Sane, kom mo rut, kapre sukdu mo ji bi surat ne ben nin sane sor nin nderku nggwa su ketke, su ré ji yo nutbot o nde.

9Wo su ré, ji mit at mo gato nin nderku nin nggwa mone nde, wo ji mit at mo gato nin nutbot sukdu gato ji krom ne ndo nde anato ri ma nin jam nin nggwa mone, ete nin kwet, nin win sukibit gato nin ben suga nyim ne su suk gato ndo. Sane nin nderku nin nggwa anato nin bi sukjimnut kak mo Yefun bi os-i mone. Sane kom mo rut sa, ji bi surat yo ben sukibit wa nin mo nde.

10Sane men nderku nggwa digane anato kak men bi sukjimnut mo Yefun bi os-i o re, ete kadit ne o, men kem ndo to kapyo mato kapyo. Sane men yo nut subot sukibit gato ben men nderku nggwa mone o nde. Sarewo men nderku men nggwa tepsu yetu gato jam nde Yefun ben ne sane sor, yo or mo nde yo, kom mo rut sa, bere men bi sukjimnut ibit mone, ete kadit ne, men ges mo bot gesyos o re.

11Ji krom sukdu gato ben nin nderku nin nggwa. Nin nutbot suk gato bor mone. Kom mo rut sukdu ne ben nin bi sukjimnut-i kas sane sor nin ben nin bi suk-i sato ré do: nin wergat nin nggwa, nin dakai gwawa nin dakai mo sukdu gato ji ndak nin mo surat ne. Or o nin bambriwa nin karowa sukibit gato ji ki nin gum ibit mone or re. Nin nyuwa nin ben sukibit ne. Or o nin da o wa nin ku ji. Nin mit iwa nin ben suk tepsu ji iwa ne. Or o nin iwa ye gato ben sukibit ku sukye mone. Mo suk bok yo gato ji ndak nin gum mo surat ne, nin kibot sane sor men jam do, nin yo ben sukibit mo kwa dik yo dom nde.

12Sane ji yo krom surat gato nyim ne wa yetu ge dik yo gato ben sukibit ne nde. Ji yo krom surat wa ye gato ku sukye mo sukibit ne dom nde, wo ji krom surat ne subere mone Yefun Allah dakai kak nin bi sukjimnut, subere nin dakai jam rer do, nin bi sukjimnut kem pe mo men tó.

13Sane anato men kem not mone, men bi sukjimnut yo waiyu o nde. Men kem not sor nde, wo men mit at, we men me Titus mit at mo suk gato nin sino ben su an mone dom. Nin sino ben sukndo su Titus sane sor Titus mit ndo o re.

14Suga nyim ji un nin gum mo Titus gwem, sane Titus ba ku nin sa, nin ben nin bi suk-i sisu ndo tepsu ji un nin gum mone, anato ji yo damen mo sukdu gato ji ki nai Titus nde. Tomgato men si nin mone, sukdu mwa gato men ki nai nin ne sino sangge re. Sane sukdu mwa gato men un nin gum mone, gato men ki nai Titus ne, sukdu bok ne sino sangge dom.

15Su ré, Titus bi sukjimnut sye kas subot nin wai kadit nyim neya o re, we an napakom nin do, nin sino iwa jammo an, ete nin ku an sa, nin nyu si nin tetet mo an.

16Ji jam do sangge, suk gato ji ki subot nin bere nin ben re, sane ji mit at wa ndo nde.



 <<  2 Korintus 7 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel