1Ji gato gum do Paulus, gato ye rai ete bok mo sel mo gato ji ben Yesus Kristus bi suk-i ne, ji si men bi nji, gato gum do Timotius, men ka we anato krom surat ré wa nan. Men ka we krom sukdu ré wa nan, Filemon, men bi yesyim gato men jimnotku, gato si men ka we ben Kristus bi suk-i sino.
2Men ka we krom surat ré wa yé gato onyar kem mo Yefun Yesus gato sum mo Filemon, nan bi nu ne sino. Men ka we anato krom surat ré wa Apfia, men bi nyanggon. Men ka we krom surat ré wa Arkhipus, men bi yesyim gato si men sino werwa ben Yefun Allah bi suk-i.
3Men bi Ai, Yefun Allah si men bi Yekwesu Yesus Kristus ete mewa nin, Yefun Allah si Yesus Kristus ete uttok nin petok sor.
4Ji ki suk su Yefun Allah saresa, ji ki kom mo nan gum yo, ji ki ndo mo Yefun Allah wa nan,
5we, ji jam sukdu do, nan sa, onyar kem mo men bi Yekwesu Yefun Yesus sisu nan mit dik. Sane dom, ji jam sukdu o do, nan bi sukjimnut sye kas subot ye gato onyar kem mo Yefun Yesus mone sino.
6Ji ki suk su Yefun Allah subere nan si ye gato onyar kem mo Kristus ki sukdu subot suk gato Kristus ben ne sino it yo, bere nin sino jam subot sukndo mwa gato Yesus Kristus dakai syo yi nai men wai kadit nyim ne o re.
7Filemon, ji bi nji gato ji jimnotku, ji jam do, nan bi sukjimnut sye kas subot ye gato onyar kem mo Yefun Yesus ne sino anato ji mit ndo wa, ji mit at wa. Ye gato onyar kem mo Yefun Yesus ne sino dom mit at wa.
8Ji si nan sino onyar kem mo Kristus, sane kapre ji nggiwa syaugat nan benbot suk gato ndo mone,
9ji yo syaugat nan nde, wo ji ndek mo nan sor re, we ji bi sukjimnut sye kas subot nan. Ji, gato gum do Paulus, ré ne ji yenggras rok it, ye rai ji, orete ye bok ji mo sel mo gato ji ben Kristus bi suk-i.
10Su ré, ji ndek mo nan do, nan jambot ji bi sukdu subot ji bi pa, Onesimus ne et. Tomgato ji si pa ne mo sel, ji tepsu pa ne bi ai mo Kristus bi de-i, we ji duno pa subot Kristus mone re.
11Suga nyim, pa yo ben suk ri su nan nde, wo su ré pa iwa pa ben suk ri su nan si pa ben suk ri su ji dom.
12Su ré, ji syogat pa gato ji jimnotku sye teker ne ba satu wa nan.
13Ji da syogat pa ba wa nan, sarewo ji iwa pa si ji kem more subere pa ós ji win nan. Ji ki sukdu subot os ndo gato Yesus Kristus kak wa men yetu anato yé bok ji mo sel, sane ji iwa pa kem su ji subere pa ós ji more.
14Sarewo ji bariwa ji syaugat pa si ji kem more, wo ji jam do, nan imo yo, bere ji iwa pa si ji kem sino. Ji bariwa ji syaugat nan, wo nan iwa nan ben suk gato ndo wa ós ji yo, nan ben su nan mit iwa sor anato ndo, ji bariwa ji wergat nan mone.
15Yefun Allah fro os wa Onesimus si nan wat yu wikgan, subere ri ma, pa satu ma si nan kem pe mone bayok.
16Su ré pa gum kwerut wa nan sor nde, wo pa ne gum kok wai kadit ne o re. Pa ne tepsu nan bi nji mo Kristus bi de-i, men sino jimnotku pa ne. Ji sa, ji jimnotku pa ne ndo nde, wo bere nan jimnotku pa ne wai kadit ji o re, we pa ne bere ben bi suk-i ndo wa ós nan, si pa ne tepsu nan bi nji mo Kristus bi de-i dom.
17Sane nan nut mo ji do, nan si ji tepsu yedik mo Kristus bi de-i it yo, nan kak nan mit wa Onesimus satu ba tepsu nan kak nan mit wa ji ba ku nan.
18Pa ben suk yo ibit mu nai nan, ete nan bi suktik yo kem mo pa ne it yo, bere ji win re.
19Ji dakai krom sukdu ré su ji syim, subere nan jam rer do: Ji gato Paulus ré, ji tom do, bere ji dakai win nan bi suktik ne re. (Nan mbrinket nde, suga nyim ji duno nan, ete ré ne, nan kem ndo it, sane ji bi suktik sye kem mo nan mone tó.)
20Men tepsu yedik mo Yefun, sane ji iwa nan ós ji et. Nan tepsu ji bi nji mo Kristus bi de-i, sane nan ben ji mit ndo, nan nai Onesimus satu ma sisu ndo et.
21Ji jam do, sangge, bere nan benbot suk gato ji ndek mo nan sor nde, wo bere nan ben wai kadit ne o re, anato ji krom surat ré wa nan re.
22Ji ndekwa nan fro gumwak dik yo wa ji dom et, we ji kwabom kam mo Yefun Allah do, bere Yefun jam suk gato nin sino ki nai An, ete An kak os wa ji satu ba ku nin sino mone.
23Epafras gato ye rai ete bok mo sel mo gato an ben Yesus Kristus bi suk-i ne, an si ji kem mo sel tó. An ki ndo mo nan.
24Sane dom, yé gato si ji ben suk sino gato gum do, Markus, Aristarkhus, Demas si Lukas ki ndo mo nan dom.
25Men bi Yekwesu Yesus Kristus ete mewa nin sor. Ndo mo nan sor, kadit Paulus
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel