Alkitab Mobile SABDA
[VER] : [ABUN]     [PL]  [PB] 
 <<  Galatia 5 >> 

1Men tepsu pakwerut wa ye Yahudi bi sukduno-i o nde, we Yesus Kristus sombok men wé kadit re. Sane men jom Yesus Kristus bi sukduno-i krat sor, men bi men nggwa wa benbot ye Yahudi bi sukduno-i ne o nde. Men brek satu tepsu pakwerut wa ye Yahudi bi sukduno-i o nde.

2Nin jam suk gato ji ki ré et. Ji, gato gum do Paulus, ji ki rer nai nin do, nin bi sukjimnut sye wa nin simo sunat it yo, os gato Yesus Kristus kak wa nin ne, bere yo ós nin nde.

3Ji ki nai nin si yé mwa ne sino wam dik yo o sare do, ye gato simo sunat it yo, ye ne bere benbot sukduno dik ne sor nde, wo an benbot ye Yahudi bi sukduno-i kwa mwa ne sino dom et. Sane bere an ku os wa an sok mo Yefun bi rus-i. Sarewo men yetu yo nggiwa simo ye Yahudi bi sukduno-i mwa ne sino nde, sane bere men yo ku os mone nde.

4Nin yé gato werwa benbot ye Yahudi bi sukduno-i, we nin nut do, bere Yefun Allah nai nin sok mo An bi rus-i mone, bere siri re. Nin werwa mone anato nin jam nde Yesus Kristus o re. Nin jam nde os ndo gato Yefun Allah dakai fro wa men o re.

5Wo men ré sa, men onyar kem mo Kristus, sane men kwabom kam mo Yefun Allah Gen do, bere An ós men sok mo Yefun Allah bi rus-i, bere men si Yefun Allah kem ndo su yu mo pe gato ndo tó.

6Yesus Kristus kak os wa men anato men sok mo Yefun bi rus-i it. Sane yo, kapre men simo sunat e, men simo sunat nde e, suk ne yo ós men nde. Wo suk dik yo sor re anato tep wa ós men, sare do, men onyar kem mo Kristus. Men onyar kem mo Kristus sane sa, bere men ben sukndo su ye yi neya sor, bere yé mwa ne me bor re.

7Tomgato nyim sa, nin werwa nin sibot os gato sangge ré, wo su ré, je u anato ma duyawa suk gato nin ben, ete werwa brek nin wé kadit Yefun Allah bi os-i gato sangge ne?

8Yefun Allah anato nai nin sok mo An bi rus-i, sane An yo syokom ye yo ma duyawa ete werwa brek nin wé kadit An bi os-i ne nde.

9Ye gato ma brek nin kadit os gato sangge anato tepsu sukamno gato yé ki do, "Bibit roti wokgan ta anato ben tepung mwa ne it sye or re."

10Yé da ma wa brek nin kadit os gato sangge, sarewo ji kwabom kam mo nin do, bere nin sino nai sukjimnut tara kadit men ré nde, we men sino sok mo Kristus bi rus-i it. Wo ye to ma ben nin bi sukjimnut waiyu mo Yefun bi os-i yo, bere Yefun Allah syo sukye nai ye ne.

11Ji bi nji, ji bi nyanggon, yé bok yo ki do, ji anato duno nje do, men simo sunat yo, bere Yefun Allah nai men sok mo An bi rus-i. Ji yo ki sane nde, wo yé ki do, ji duno nje su sukduno sane mó tó. Ji do duno nje su sukduno sane yo, suma ben anato yé maskwa ji tó ré ne? Ji do duno nje su sukduno sane yo, yé maskwa mo sukdu gato ji ki subot Yesus Kristus gato kwop mo kwesukwin ne wa suma ne?

12Yé gato ben kidar nin sane sor nin nalar mo sukdu gato sangge ne, sa ndo sa, án dakai bisunat an dakai sor nde, wo án dakai kum án bi sukmen sino ne toko wé dom et!

13Ji bi nji, ji bi nyanggon, sangge, Yefun Allah nai nin tepsu An bi pá-i subere ye Yahudi bi sukduno-i yo jom men tepsu pakwerut o nde, wo men sok mo Yefun Allah bi rus-i it. Men sok mo Yefun Allah bi rus-i tepsu An bi pá-i orete yo, men nut do, "Ré ne ji tepsu Yefun bi pa-i it, sane ji ben sukibit ket ji i ne sor," sane bere siri re. Men ben sane nde, wo men bi sukjimnut sye kas subot yu sor, men ben sukndo su yu sor.

14Men bi sukjimnut sye kas subot yu sane, we Yefun bi sukduno kwa gato sye, gato jom Yefun Allah bi sukduno kwa mwa ne sino ki do, "Men bi sukjimnut sye kas subot ye yi tepsu men bi sukjimnut sye kas subot men dakai et."

15Wo nin maskwa ket yu e, nin ben yu ket kwayo-kwayo e ne yo, bere nin sino dakai ibit mo koirut o re. Sane nin mewa nin nggwa kadit suk sane.

16Sane ji bi sukdu-i sare do, men nai sukjimnut dik do, suk gato Yefun Allah Gen kiwa men ben ne yo, men benbot petok sor. Wo sukjimnut gato tik men mit wa ben sukibit tepsu yetu mwa ne sino iwa ben ne yo, men yo benbot o nde.

17Bere men yo benbot sukjimnut ibit ne o nde, we suk gato yetu iwa ben ne siri kadit suk gato Yefun Allah Gen iwa men ben ne. Sane dom, suk gato Yefun Allah Gen iwa men ben ne siri kadit suk gato men yetu dakai iwa men ben ne. Yefun Allah Gen bi sukjimnut-i duwer yetu bi sukjimnut-i gato tik men mit wa men ben sukibit. Sane men yo benbot suk gato men dakai iwa men ben ne nde.

18Sarewo men do nai sukjimnut wa men benbot suk gato Yefun Allah Gen kiwa men ben ne it yo, men yo mitwa men jammo ye Yahudi bi sukduno-i ne o nde.

19Sukjimnut gato tik men yetu mit wa ben sukibit gato yetu iwa ben ne bor wa men jam sino sato ré: yebris si nggon iwa ben siri su yu daret e; án da bro wa ben sukdaret ket án i e; án ben suk siri dakai daret bu e,

20án iwa som sukdaret e; án iwa kro ri mo nje e, kwa syua e, syi gwoi mo nje e, suk sane. án grem sukmaskwa mo án mit wa nje e; án iwa ben sukndi su ye yi daret e; án maskwa ket ye yi mo sukndo gato ye ne ku ne e; án maskwa dek e; án nutbot án dakai sor re, án dakai bes án nggwa kok sor. án gwat os wa ben nje subere yé mwa ne yo kem ndo su yu nde e; án iwa brek nden we e;

21án gro sye wa ye yi bi suk-i e; án iwa án yenau bu e; án iwa án kamo noru nombrak, án yenau su, ete án ben siri mwa su e ne. án ben suk mwa gane si kwa yi neya dom. Suga nyim ji ki subot sukibit bok ne nai nin jam mó re. Ré ne, ji ki suknapa wa nin wam dik yo o sare do, ye to ben bi suk-i sane, bere Yefun Allah yo nai ye ne sok mo An bi rus-i nde.

22Sarewo men nai sukjimnut dik do, suk gato Yefun Allah Gen kiwa men ben ne yo, bere men ben suk sato ré: Men bi sukjimnut sye kas subot ye yi e; men mit at wa suk gato ndo petok sor e; men si ye yi neya mit ndo su yu e; men yo maskwa kekro nde e; men jimnotku ye gato ku sukye e; men ben sukndo su nje e; suk gato men tom ne men benbot e;

23men ben men bi suk-i ne njep e; men mewa men nggwa kadit men ben sukdaret nde e ne. Sukduno kwa dik yo gato duyawa men sibot sukduno kwa mwa ré yo mo nde.

24Ye gato sok mo Yesus Kristus bi nje-i it yo, ye ne bare sukjimnut gato tik an mit wa ben sukibit ne or wé kadit an re. Sukjimnut ne ben sato an mban mo kwesukwin, ete sukjimnut ne kwop or wé kadit an. An yo iwa ben suk ket an i o nde. Suk gato tik an mit wa an ben sukibit ne an bare wé re.

25Yefun Allah Gen anato ós men kem ndo, sane men nai sukjimnut dik do, suk gato Yefun Allah Gen kiwa men ben ne yo, men benbot petok sor.

26Sane men bes men nggwa kok teker nde, men krokgat yu su sukdu daret nde. Men on sa ket yu mo suk mwa gato men deyo ku wai kadit deyo dom nde, wo men nai sukjimnut dik do, suk gato Yefun Allah Gen kiwa men ben ne yo, men benbot petok sor.



 <<  Galatia 5 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel