1Yerasul si ye gato onyar kem mo Yefun Yesus gato kem mo bur Yudea jam yé nuk sukdu do, "Yewis yi gato ye Yahudi nde, án kak án mit wa Yefun Allah bi sukdu-i, án onyar kem mo sukdu ne dom."
2Sane tomgato Petrus mu mo Yerusalem, ye Yahudi gato onyar kem mo Yefun Yesus ne duwer Petrus mo suk gato an ben ne.
3Tomgane ye Yahudi fowa ku yewis yi, sane án duwer Petrus sare do, "Nan mu ku yewis yi mo án bi nu wa suma ne? Nan si án git sugit sino wa suma ne?"
4Sane, Petrus nuk subot suk gato ben to an ku yewis yi ete si yewis yi git sugit sino ne. Petrus nuk sukdu ne rer nai yé mone jam kadit ketke sor kom mo pe gato or mó.
5Petrus ki do, "Ji kem mo kota Yope, ji ki suk su Yefun saresa, ji me suk tepsu ji semda, wo ji yo sem nde. Ji me suk yo sato san det sye is ma bur. Ben sato ye rai nap at su bus, ete ye sa san det ne is ma bur kom mo pe gato ji kem mó.
6Ji sokme suk gato mo san det mit. Ji me suge gato gwes at wis mwa mó. Ji me suge yi sato kwis si ndam wis bok yo mone dom.
7Orge ji jam Yefun Allah ki nai ji do, 'Petrus, nan mu, nan gu suge mwa ne, nan kon, nan git et.'
8Ji ki do, 'Yefun, sane nde! Ji yo git sugit gato men ye Yahudi fowa git yo mo nde, wam dik yo dom nde.'
9Yefun Allah ki nai ji wam dik yo o, An ki do, 'Suk gato Yefun Allah ki ndo ne yo, nan ki do, suk ne ibit o nde, nan fowa suk ne o nde.'
10Ji me san det is ma bur wam gri, or san det ne satu mo gu o re.
11Sugane ye ka gri gato Kornelius syogat ma kadit Kaisarea ma kom mo nu gato ji kem mone.
12Yefun Allah Gen ki nai ji do, 'Nan simo ye ka gri ré. Nan bariwa nde.' Yetu ge mumat ré gato onyar kem mo Yefun Yesus si ji si ye ka gri ne mu motu sino. Men sino kom mo Kaisarea ne, or men sok mo yenggras gane bi nu mit.
13Yenggras Kornelius ne nuk sukdu su men subot malaikat gato an ku ne. An ki do, malaikat ne syogat an sare do, 'Nan syogat yetu ge bok yo mu kar Simon gato gum do Petrus kadit kota Yope ne ma.
14Petrus ne bere gwat sukdu subot os ndo wa nan, an ki sukdu subot os ndo gato Yesus Kristus kak wa men yetu, subere nan si nan bi rus-i sino ku os wa nin titi fro wé kadit bot gesyos, ete nin kem ndo to kapyo mato kapyo.' "
15Petrus ki o do, "Ji nuk sukdu su nje mo Kornelius bi nu ne saresa, Yefun Allah Gen bok nggwa mo án tepsu Yefun Allah Gen bok nggwa mo men su ketke ne.
16Orete ji napakom sukdu gato Yefun Yesus ki mó re, sare do, 'Yohanes ras nin mo syur, sarewo Yefun Allah bere syogat Yefun Allah Gen bok nggwa mo nin ben sato Yefun Allah ras nin mo An Gen anane.'
17Ji me Yefun Allah Gen bok nggwa mo yewis yi ne tepsu Yefun Allah Gen bok nggwa mo men ye Yahudi gato onyar kem mo Yesus Kristus tepsu men bi Yekwesu ne, sane ji yo duyawa suk gato Yefun ben ne nde, Yefun Allah nai yewis yi sok mo An bi rus-i si men ye Yahudi ne sino."
18Petrus nuk subot sukdu ne, yé mwa mone jam or sa, yé duwer Petrus mone o nde. Yé un Yefun Allah, yé ki do, "Ré yo, Yefun Allah kak os wa men ye Yahudi sok mo An bi rus-i sor nde, wo An kak os wa yewis yi sok mo An bi rus-i ne dom. Yefun Allah kak os wa yewis yi ne kwet kadit os ibit, ete kem ndo to kapyo mato kapyo."
19Ye gu Stefanus kwop wé, orete ye ben sukye nai ye gato onyar kem mo Yefun Yesus. Sane án syo yu, deyo mu kom mo bur Fenisia, deyo mu mo bur Siprus, deyo mu mo kota Antiokhia. Mo bur gato án mu kom mone, án ki sukdu subot Yefun Yesus nai yewis ye Yahudi sor re.
20Sarewo ye deyo, ye Siprus si ye Kirene, mu mo kota Antiokhia. Mone án ki sukdu subot os ndo gato Yefun Yesus kak wa men yetu nai yewis yi neya jam dom.
21Yefun Allah sisu án mo suk mwa gato án ben ne. Sane yé mwa nai sukjimnut do, án brek kadit os nyim, ete án jammo Yefun Yesus tepsu án bi Yekwesu, án onyar kem mo Yefun Yesus it.
22Ye gato onyar kem mo Yefun Yesus mo Yerusalem ne jam sukdu subot suk gato bor mo kota Antiokhia, sane anato yé syogat Barnabas mu mo kota Antiokhia ne.
23Barnabas mu kom motu sa, an me sukndo gato Yefun Allah dakai ben su yewis yi gato onyar kem mo Yefun Yesus mone. An me do, Yefun Allah ós yé ne ben suk tepsu Yefun Allah mit. Barnabas mit iwa suk gato an me ne. Barnabas ki do, "Nin mit dik wa Yefun Yesus sor, nin brek kadit Yefun Yesus bi os gato ndo ne nde."
24Barnabas sa, an ye gato ben sukndo. Yefun Allah Gen bok nggwa mo an pe sor. An onyar kem pe mo Yefun Yesus. Sane Barnabas tik yé mwa mone mit anato yé mwa ne brek kadit os nyim, ete án jammo Yefun Yesus tepsu án bi Yekwesu.
25Orge Barnabas mu kadit kota Antiokhia. An mu mo kota Tarsus. An meret Saulus mone.
26An ku Saulus sa, an kar Saulus ma mo kota Antiokhia. Mone Saulus si Barnabas duno yé mwa gato onyar kem mo Yefun Yesus ne sor kom mo tahun dik. Mo Antiokhia, ye kendo ye gato onyar kem mo Yesus Kristus ne gum do, ye Kristen. Ye yo kendo gum ye Kristen mo nat yi nde tó, ye kendo gum ye Kristen mo kota Antiokhia nyim wé re.
27Sugane yenabi ge bok yo mu kadit Yerusalem ma mo Antiokhia.
28Yenabi ge dik yo gum do, Agabus. An ti mo yé mwa gwem, Yefun Allah Gen bok nggwa mo an, ete an ki do, "Kapyo tak, bere sukonde sye ma mo bur gato ye Roma jowa ré sino." (Ri ma, sangge, sukonde ne bor sugato Kladius jowa ye Roma.)
29Sane ye gato onyar kem mo Yefun Yesus mone kibot, orge án nai sukjimnut dik do, bere án ós, án bi sugum mu nai ye gato onyar kem mo Yefun Yesus gato kem mo bur Yudea. Kadik-kadik syo sugum tepsu sugum gato án ku mó.
30Án bi sugum bot Barnabas si Saulus. Ye we ne gwat sugum ne mu syo nai yekwesu gato mewa ye gato onyar kem mo Yefun Yesus mo bur Yudea.
<< Kisah Para Rasul 11 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel