Alkitab Mobile SABDA
[VER] : [ABUN]     [PL]  [PB] 
 <<  Kisah Para Rasul 12 >> 

1Tomgane yekwesu yeraja gato gum do Herodes but ye gato onyar kem mo Yefun Yesus ge bok yo wa an ben sukye nai.

2An syogat ye sap Yakobus gato Yohanes bi nji dosye ne su nyom kwop wé re.

3Herodes jam do, ye Yahudi mit iwa suk gato an ben ne sa, an waii but Petrus o. An but Petrus su kam gato ye Yahudi konwa bi kam sye gato gum do Kam Sye Waiket ne, bi kam futmo, su kam ne yé git roti gato yo it nde.

4Herodes but Petrus, orge an sok Petrus mo penjara. Mone, Herodes syogat yesukmise ge at mewa Petrus petok sor. Yesukmise ne bu dik yetu ge at ne. Sane yesukmise ne, bu at win yu mewa Petrus mone. Herodes nut mo an syidem do, "Ye Yahudi bi kam sye ne orete yo, ji ndobot Petrus mo yé mwa gwem."

5Sane Herodes syogat yé mewa Petrus mo penjara, sarewo ye gato onyar kem mo Yefun Yesus, án ki suk su Yefun su án mit dik wa yé sombok Petrus wé kadit penjara ne.

6Herodes nut do, ik, ete an ndobot Petrus. Tomgane Petrus sem mo yesukmise ge we ndet mo penjara. Ye rai Petrus su rantai. Yesukmise ge we yo o kewa nusyo de dom.

7Petrus sem mit sa, an gensu Yefun Allah bi malaikat ge dik yo ma. Malaikat ne ben nu mit ne rer. Malaikat ne syimtok Petrus, malaikat ne sun Petrus, or malaikat ki do, "Nan sun kekro!" Sugane rantai ne sombok wé kadit Petrus syim.

8Orge malaikat ki nai Petrus do, "Nan it nan bi san et! Nan it nan bi sandal et!" Sane Petrus it bi san si bi sandal, or malaikat ki o do, "Nan it nan bi san gato kam, or nan simo ji et."

9Sane Petrus simo malaikat ne mu kadit penjara, sarewo an jam nde suk gato malaikat ben ne do, sangge, bado, an dakai semda, bado? Petrus nut mo an dakai do an semda bayok.

10An we mu kadit yesukmise ge we gato mewa Petrus mo penjara, or an we wai kadit yesukmise ge we yo o gato mewa penjara bi nusyo. An we mu kom mo nusyo besi gato kewa kota. Nusyo ne dakai kak, ete an we muket nusyo ne. An we mu wikgan sa, Petrus gensu malaikat fres kadit an re.

11Sugane Petrus jam nggwa, an nut mo an syidem do, "Suk gato malaikat ben ne sangge! Ré ne, ji jam rer re, Yefun Allah syogat an bi malaikat ne ma nai ji kadit Herodes syim. Malaikat ne nai ji kadit sukye mwa gato ye Yahudi iwa ben nai ji re."

12Petrus jam do, sangge an syesyar kadit penjara ne sa, an mu mo Maria bi nu. Maria anato Yohanes gato ye kendo do Markus bi im. Mo nu ne yé mwa ne sum ki suk su Yefun.

13Petrus nggo nusyo mo de nden, ete nggon gato ós mo nu ne gato gum do Rode ma wa kak nusyo wa Petrus.

14Rode ne jam Petrus ké sa, mom mit iwa ndo nde sane sor mom yo kak nusyo nde, wo mom kas satu mo nu mit, mom ki nai yé mwa mone do, "Petrus ma it!"

15Yé ki do, "Mban! Semda ben nan ko ré go!" Sarewo Rode kigat sor, mom ki do, "Sangge, Petrus ma it!" Orge, yé ki o do, "Sane nde, malaikat gato ka sa an anato ma ne bayok."

16Yé duwer yu mo nu mit saresa, Petrus nggo nusyo de nden ne gat sor. Sane yé kak nusyo wa Petrus, yé ku an sa, yé yeket ndo nde.

17Petrus bes an syim wa nje mone subere yé not, ete jammo an bi sukdu-i. An nuk sukdu subot suk gato Yefun Allah kar an wé kadit penjara ne. Petrus nuk sukdu ne, or an ki o do, "Nin mu nuk sukdu ne nai Yakobus si ye gato onyar kem mo Yefun Yesus jam sino et." Petrus ki sane, orge an mu mo pe yi o re.

18Ik nyotkwo, yesukmise gato mewa penjara ne yo ku Petrus nde. Yesukmise ne nalar, án kwabom kro, án ndobot yu do, "Petrus, mo u ne?"

19Herodes syogat yé muya-muma meret Petrus ware, án yo ku nde. Orge Herodes ndobot yesukmise gato mewa penjara ne, ete an syogat ye gu yesukmise ne kwop wé. Orge yeraja Herodes ne mu kadit bur Yudea. An mu kem mo kota Kaisarea nam gan.

20Yeraja Herodes ne, an maskwa ket ye Tirus si ye Sidon. Sane ye Tirus si ye Sidon tepsu dik wa án mu ku Herodes, subere án si Herodes kem not, we án nai án bi sugit mo Herodes bi bur-i ne. Ye Tirus si ye Sidon meret os subere án si Herodes kem not. Sane ye Tirus si ye Sidon ne mu ku Blastus gato ós Herodes mo Herodes bi nu sye. Herodes onyar kem mo Blastus. Sane ye Tirus si ye Sidon ndek Blastus kak os wa án ku Herodes wa kibot suk, subere án si Herodes yo maskwa yu o nde, wo án jom syim, ete kem not.

21Su kam gato yé fro wa kibot sukdu ne, Herodes it yeraja bi san gato ndo wai o re. An it san ne, or an mu kem mo yeraja bi kursi sye, orete an ki suk nai yé mwa gato sum mone.

22Yé jam suk gato Herodes ki ne orge, ye saiye do, "Yeraja ré ki bi sukdu-i tepsu yetu nde, wo an ki bi sukdu-i tepsu an yefun dik yo kaii, an ki bi sukdu-i tepsu ye gato bi suktinggi mó."

23Herodes iwa yé un an tepsu an yefun ge dik yo, sarewo Herodes yo bes Yefun Allah gum kok mone nde, sane, sugane it, Yefun Allah syogat malaikat dik yo ben Herodes i. Orge syumbar mwa git Herodes ku, ete ri ma an kwop re.

24Sane Yefun Allah bi sukdu yé ki frekbot pe mwa ne, ete yé mwa waii jammo Yefun Allah bi sukdu ne o.

25Barnabas si Saulus gwat sugum ne mu kom mo Yerusalem, orge an we satu mu mo Antiokhia kadit Yerusalem ne o. An we kiwa Yohanes gato gum do, Markus ne, sisu an we mu dom.



 <<  Kisah Para Rasul 12 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel