1"Yenggras, ji bi nji, nin jammo suk gato ji ki ré et."
2Yé jam an ki su a Ibrani sa, yé mwa mone not, yé syaretwa, yé yo ba wokgan yo dom nde. Orge Paulus ki do,
3"Ji anato ye Yahudi. Ji bi im pe ji mo kota Tarsus mo bur Kilikia. Ji sye mo kota Yerusalem ré. Yeguru Gamaliel duno ji su men bi amui bi sukduno mwa ne sino. Ji jam rer re. Ji werwa ji benbot Yefun Allah bi sukdu-i su ji mit dik si ji onyar dik sor. Ji mit dik wa Yefun Allah tepsu nin.
4Tomga nyim ji ben sukye nai nje gato simo os be gato Yefun Yesus kak ne. Ji ben sukye nai án sor án kwop wé. Ji but yebris si nggon sino, ete ji sok án mo penjara.
5Sukye gato ji ben nai ye gato simo os be ne, yekwesu mo Yefun Allah bi nu gato gum kok wai, yenggras ne jam re, bere an ki rer wa nin jam re. Sane dom ye Yahudi bi yepasye e, yekwesu e ne gato sum sino wa kibot sukdu, yé mwa ne sino jam re, bere án ki re. Ji gwat surat gato án krom wa ye Yahudi bi yepasye mo kota Damsyik. Tomga nyim ji gwat surat ne mu mo Damsyik, subere yepasye mone ós ji but ye gato onyar kem mo Yefun Yesus, subere ji kar ma mo Yerusalem wa yé ben sukye nai."
6"Ji muket os karowa kota Damsyik, kam yo mit saresa, ji gensu sukru sye gato rer-rik kadit gu, sukru ne rer-rik ne rek wairi wa ji.
7Ji ges gwa mo bur. Ji jam yetu ge dik yo ki nai ji do, 'Saulus, Saulus, nan ben sukye nai Ji wa suma ne?'
8Ji ki do, 'Yenggras, Nan gum sa u ne?' An ki do, 'Ji gum do Yesus, ye Nazaret. Nan ben sukye nai Ji.'
9Yé bok gato si ji mubot os sino, án sa, me sukru ne, sarewo án jam nde sukdu gato Yefun ki nai ji ne re.
10Orge ji ki o do, 'Sane, ji bi Yekwesu o, ji ben suma ne?' Yefun Yesus ki do, 'Nan sun nan mu mo kota Damsyik et. Mone yetu ge dik yo bere frot nai nan subot suk gato Yefun Allah fro wa bere nan ben ne.'
11Yé bok gato si ji ós jowa ji syim gwat ji mu mo kota ne, we sukru ne ben ji gro ndu re.
12Ji kom mo Damsyik sa, yetu ge dik yo mone gato gum do Ananias ma ku ji. An benbot ye Yahudi bi sukduno ne petok sor. Ye Yahudi mwa ne sino mone bes an gum kok wai o re.
13An ma, an ti mo ji de, an ki nai ji do, 'Saulus, ji bi nji, nan gro ndo satu it.' Sugane it, ji me an re.
14Orge an ki do, 'Yefun Allah gato jom men bi amui ne anato bes nan, subere nan jam suk gato tepsu An mit. Yefun Allah bes nan subere nan ku Yefun Yesus, gato ben sukndo tepsu Yefun Allah mit. Yefun Allah bes nan subere nan jam sukdu kadit Yefun Yesus dakai syokwet.
15Bere nan ki sukdu subot Yefun Yesus nai yé mwa ne sino tepsu suk gato nan me su nan gro si suk gato nan jam su nan dabe.
16Ré yo, nan eswa suma o ne? Nan sun et! Nan bi nan nggwa wa ye ras nan mo syur se! Nan ndekwa Yefun Yesus subere An nai nan wé kadit sukye gato bere nan ku mo sukibit mwa gato nan ben ne.' "
17"Orge ji benbot suk gato Ananias ki ne. Ji satu mu mo Yerusalem, ji ki suk su Yefun mo Yefun Allah bi nu sa, ji me suk tepsu ji semda, wo ji yo sem nde.
18Ji me Yefun Yesus ki sukdu, An ki nai ji do, 'Ré yo, nan mu kadit Yerusalem kekro, we yé gato kem more bere bariwa sukdu gato nan ki subot Ji re.'
19Ji ki do, 'Ji bi Yekwesu o, yé gato kem more jam do, ji mubot ye Yahudi bi nu ari, ji ben sukye nai ye gato onyar kem mo Nan, ji sok yé ne mo penjara.
20Sane dom, yé gu Stefanus kwop sa, ji sokwa, ji imo, ji mewa yé gato gu an ne bi san.'
21Orge Yefun Yesus ki nai ji do, 'Nan mu sor, Ji syogat nan mu kadit ré, nan mu mo os syu kadit ré, nan mu mo yewis yi neya bi bur-i. Nan mu ki sukdu subot Ji nai yewis yi ne.' "
22Yé mwa mone jam suk gato Paulus ki ne sor kom mo sukdu subot Yefun Yesus syogat an mu mo yewis yi sa, yé mwa ne on sa ket Paulus. Yé mwa ne saiye nggi do, "Nan gu ye ré kwop wé sor. Ye ré kem mo bur ré yo, bere ibit re."
23Yé mwa ne maskwa ndo nde, án saiye, án am án bi san, án am bofuf mu nim mo gu saresa,
24yesukmise bi padosye ne syogat ye gwat Paulus mu ngga mo yesukmise bi nu mit. An syogat yé kwam Paulus su bus, orete yé ndobot Paulus, subere an jam suk gato Paulus ben anato yé mwa maskwa teker, ete saiye ket Paulus ne.
25Yé rai Paulus wa ye kwam su bus saresa, Paulus ki nai ye Roma bi yesukmise bi yesu ge dik yo do, "Ji gum sok mo ye Roma bi nje-i, sane nan yo ndobot ji nde tó, ete nan kwam ji su bus nyim ne te, bere tepsu ye Roma bi sukduno-i, bado siri kadit e?"
26Yesukmise bi yesu ne jam suk gato Paulus ki ne sa, an mu ki nai yesukmise bi padosye ne, an ki do, "Yenggras, ye gare an gum sok mo ye Roma bi nje-i, sane nan syogat men kwam an su bus wa suma ne?"
27Sane padosye ne mu ndobot Paulus do, "Sangge, nan gum sok mo ye Roma bi nje-i bado?" Paulus ki do, "Sangge, ji gum sok mo ye Roma bi nje-i re."
28Orge padosye ne ki do, "Ji syo sugum mwa nai ye Roma, ete ye sok ji gum mo ye Roma bi nje-i." Paulus ki do, "Sarewo ji bi im kem su ji, ete ye nai ji gum mo sok ye Roma bi nje-i mone it."
29Sugane it, yesukmise bi padosye gato ndobot Paulus ne mu kadit re, yé bok ne nyuwa re. Sane dom, padosye ne nokwa, we an ben suk siri kadit ye Roma bi sukduno-i. An syogat ye rai Paulus su rantai anato siri, we Paulus gum sok mo ye Roma bi nje-i. Sane padosye ne nyu it.
30Yesukmise bi padosye ne iwa jam suk gato ben ye Yahudi mwa ne maskwa ket Paulus. Padosye ne iwa jam rer kom mo mit. Sane bi ik, ete padosye ne kendo ye Yahudi bi yepasye si yekwesú gato sum sino wa kibot sukdu, subere yepasye mwa ne sum sino. Orge an sombok rantai wé kadit Paulus. An gwat Paulus mu ti mo ye Yahudi bi yepasye mwa ne gwem.
<< Kisah Para Rasul 22 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel