Alkitab Mobile SABDA
[VER] : [ABUN]     [PL]  [PB] 
 <<  Kisah Para Rasul 24 >> 

1Kam mumek rek, orete yekwesu gato gum kok wai mo Yefun Allah bi nu gato gum do Ananias, yenggras ne si ye Yahudi bi yepasye ge bok yo, si yetu ge dik yo gato owa ki an bi sukdu-i mo yepasye gwem sisu ndo gato gum do Tertulus, án sino ma kom mo Kaisarea. Án sino ma, án ndak Paulus mo yenggras Gubernur gwem.

2Feliks syogat ye kar Paulus ma sa, Tertulus ki bi sukdu sare do, "Yenggras Gubernur, nan jowa men nam, sane men sino mo bur ré yo ku sukye nde, wo men kem not it. Nan bi sukjimnut ne ko, nan nutbot suk gato bere bor su kam sari ne ma anato nan jowa men sisu ndo, kwa gato ibit nan ben ndo satu, nan ben suk gato ndo wa men sino sor.

3Yenggras, nan sa, mo pe mwa ne sino, si mo suk mwa ne sino, nan ben sukndo wai o re. Sane men ki ndo mwa mo nan mo suk mwa gato nan ben ndo wai o re.

4Ré ne, ji yo ki sukdu mwa ok o nde, wo ji ki sukdu wokgan subot ye gare wa nan jam. Ji ndekwa nan syaretwa suk gato men ndak ye ré su ne et.

5Men me do, ye gare ben sukibit. An krokgat ye Yahudi, an ben ye Yahudi maskwa yu e, an ben ye Yahudi saiye daret e ne mo bur ré iwedewe. An yekwesu, an gwat ye Nazaret bi sukdu-i ki frekbot buryo-buryo.

6An werwa an gwat sukdu ne sok mo Yefun Allah bi nu-i, ete gwat os ibit wa men mo nu ne, sane men but an kadit re. [Men ki nai yu mone do, men gwat an mu mo yekwesu wa ye ndobot an tepsu Musa bi sukduno ware,

7yesukmise bi padosye gato gum do Lisias ma nai an wé kadit men.

8Orete Lisias syogat ye gato ndak an ma ki bi sukdu-i mo nan gwem sor.] Yenggras, nan dakai ndobot an, bere nan jam suk gato men ndak an su ne sangge."

9Ye Yahudi gato mone waii kabor Paulus gum dom. Ye Yahudi ne ki do, sukdu mwa gato Tertulus ki ne sangge sino.

10Yenggras Gubernur ef an syim, subere Paulus ki bi sukdu-i sa, Paulus ki do, "Ji jam do, nan, yenggras, nan ndobot nje, nan kibot nje bi sukmaskwa mo bur ré nam it, sane ji mit iwa ji ki ji bi sukdu-i gwawa ji nggwa mo nan gwem.

11Kam musyu dik sop we ga nyim, yo wai nde, ji mu mo Yerusalem wa ji gwat suksom wa ji som Yefun Allah mone, nan ndo mo ye yi neya, bere ye ki re.

12Ye gato ndak ji ré, án ku ji mo Yefun Allah bi nu. Án yo ku ji si ye yi duwer yu mone nde. Án yo me ji krokgat yé mwa mo ye Yahudi bi nu ari subere ye maskwa yu dom nde. Án yo ku ji krokgat ye Yahudi mo pe yi dom nde.

13Án ndak ji daret ko ré go! Suk gato án ki ne yo sangge mo nde, án bi sukdu i-ke yo mo nde.

14Sarewo sukdu kwa dik yo gato án ki ne sangge. Yefun Allah gato jom men bi amui, sangge ji som Yefun Allah ne mo gato ji simo os gato Yefun Yesus duno men su ne. Sarewo yé gato ndak ji ré nut do os ne siri re. Wo ji simo os ne, we ji onyar kem mo sukdu gato tepsu Musa si yenabi bok ne bi sukdu-i ne.

15Sane dom, yé gato ndak ji ré, án kwabom kam mo Yefun Allah sare do, bere Yefun Allah sun men yetu bok ne sino -- ye gato ben bi suk-i ndo si ye gato ben bi suk-i ibit. Ji dom ji kwabom kam mo Yefun Allah do, bere An sun men yetu sino kadit sukkwop.

16Sane, kamdik-kamdik ji wergat ji dakai wa ji benbot sukdu gato ji onyar kem mone, subere mo suk mwa gato ji ben mo Yefun Allah si yetu gwem ne ndo sino, kwa gato ibit yo mo nde, kwa yo gato siri kadit ji bi sukjimnut gato ndo mo ji mit ne yo mo nde.

17Tahun bok yo, ji yo ba mo Yerusalem mo nde, wo gabere ji ba wa ji gwat sugum ma wa ji syo nai ye Yahudi gato yewa suk mone. Ji gwat suksom wa ji som Yefun Allah su dom.

18Ji un Yefun Allah saresa, án ku ji mo Yefun Allah bi nu de mo ros de mit ne. Sugane ji simo upacara wa ji dakai fro nggwa sisu ndo mo Yefun Allah gwem tepsu men ye Yahudi bi sukduno. Yetu mwa yo si ji mone nde, ji si ye yi yo duwer yu mone dom nde, ji yo krokgat nje maskwa yu mone dom nde.

19Ye Yahudi ge bok yo kadit bur Asia ma mo nu ne. Án dakai maskwa ket ji mone. Án ma more kibot suk gato ben án maskwa ket ji sa, bere nan jam re.

20Án yo ma nde, wo ye gato ma ré, án ki sukdu subot suk gato ye Yahudi bi yepasye kibot ji ne. Án kibot sukibit gato yepasye ne ndak ji mone ete ndo.

21Án nut do, ji ben sukibit anato tepsu sukdu kwa dik yo gato ji ki mo yepasye ne bado? Sukdu gato ji ki ne anare, 'Su kam ré, nin ndobot ji mo sukduno gato ji kwabom kam mo Yefun Allah sare do, ye gato kwop, bere Yefun Allah sun kadit sukkwop o re.' "

22Feliks jam sukdu subot os gato Yefun Yesus kak ne sisu ndo. An jam Paulus bi sukdu-i kom mone sa, an ki do, "Men kibot Paulus bi sukdu-i ne o nde, wo men kem kret padosye Lisias ne ma, ete men kibot kom mo pe gato or mó."

23Orge Feliks syogat ye Roma bi yesukmise bi yesu dik yo mewa Paulus mo penjara. Feliks syogat yesu rai Paulus krat nde, wo an misyar Paulus bi yesyim dakai ma subere Paulus bi yesyim ós Paulus mo suk gato Paulus yewa ne.

24Kam bok yo o, Feliks si bi nggon gato gum do Drusila, mom ye Yahudi, an we ma mo kota ne o. Feliks kiwa ye mu kar Paulus ma. Paulus ma, orge Feliks syaretwa Paulus ki sukdu subot os ndo gato Yesus Kristus kak wa men yetu ne. Paulus ki do, ye gato onyar kem mo Yefun Yesus, bere Yefun Allah nai ye ne gum sok mo An bi rus-i.

25Paulus ki sukdu subot sukndo gato Yefun Allah mit iwa men yetu ben ne nai Feliks jam. Paulus nuk subot suk gato men ben subere men mewa men nggwa sisu ndo. Paulus nuk subot kam sari ne ma, bere Yefun Allah ma ndobot yetu bok ne sino. Paulus ki subot suk saresa, Feliks nyuwa, or Feliks ki do, "Tep it. Nan mu yei sane sor kam yo o, ete bere ji kendo nan ma o."

26Feliks da kendo Paulus ma nuk sukdu su an wam bok yo subere an jam sor nde, wo Feliks iwa Paulus syo sugum nai an, subere Feliks sombok Paulus wé ware, Paulus yo syo sugum nai an nde.

27Tahun we, orge yenggras Perkius Festus win Feliks tepsu Gubernur. Sugane Feliks iwa ben suk yo gato ye Yahudi iwa ne, sane an misyar Paulus mo penjara.



 <<  Kisah Para Rasul 24 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel