1Festus ma mo bur ne, or kam gri rek, ete Festus mu kadit Kaisarea mu mo Yerusalem.
2Mone, ye Yahudi bi yepasye si yekwesú mo Yefun Allah bi nu ku Festus. Án ki sukdu subot sukibit gato Paulus ben ne nai yenggras ne jam.
3Án wergat Festus, subere Festus ós án, án werwa Festus ben suk gato án iwa ne sugane it. Án ndekwa Festus syogat ye gwat Paulus ma mo Yerusalem. Án wergat yenggras ne sane, we án fro yeko eswa gu Paulus kwop wé mo os mit.
4Festus ki do, "Paulus kem mo penjara mo kota Kaisarea. Ji yo gwat an ma more nde, wo bere ji dakai mu mone.
5Sa ndo sa, nin ye Yahudi bi yekwesu bok yo si ji mu mone, or, an do ben suk yo gato ibit mó yo, bere men kibot sukibit gato nin ndak an su ne."
6Festus kem su ye Yahudi mo Yerusalem sor kom mo kam munggwo rek yo, kam musyu rek yo, orete an mu mo Kaisarea. Festus mu kom motu, bi ik, ete an kem wa ye kibot suk. Festus syogat ye mu kar Paulus ma.
7Paulus ma mone sa, ye Yahudi bok gato ma kadit Yerusalem ne, án ti wairi wa Paulus, án ki subot sukibit gato Paulus ben ne, án ndak Paulus, sarewo án yo bi sukdu i-ke yo mo nde.
8Orete Paulus ki do, "Nde re, ji yo ben sukibit gato ye ndak ji su mo nde. Ji yo ben suk yo siri kadit ye Yahudi bi sukduno-i nde. Ji yo ben suk yo siri kadit sukduno gato ye ki mo Yefun Allah bi nu nde. Ji yo ben suk yo siri kadit Kaisar bi sukduno-i dom nde."
9Festus iwa ben suk gato ye Yahudi bok ne iwa, sane an ki nai Paulus do, "Nan fro wa nan mu mo Yerusalem wa men kibot sukdu ré mo ji gwem mone, bado?"
10Paulus ki do, "Men mu mo Yerusalem wa men kibot sukdu ré wa suma ne? Su ré ji ti mo nan gwem re. Kaisar anato bes nan wa kibot suk sato ré, sane men kibot su ré it. Ji yo ben sukibit ket ye Yahudi nde, nan dakai jamwa re.
11Ji do ben suk yo siri kadit ye Roma bi sukduno-i tepsu ye gu ji kwop mone it yo, ji simo sor. Sarewo suk gato ye Yahudi ki ré yo sangge nde yo, ye yo nggiwa syo ji mo án syim-i nde. Ji kiwa Kaisar dakai kibot ji bi sukdu ré sor."
12Festus ndo mo ye gato ós an mo suk gato Paulus ki ne, orge Festus ki do, "Nan kiwa Kaisar kibot suk ré, sane bere nan mu ku Kaisar bi yepasye mo kota Roma wa kibot sor."
13Kam bok yo o, orete yepasye yeraja Agripa si an bi nyanggon gato gum do Bernike ma mo kota Kaisarea wa an we ku Festus ete ki ndo mo an.
14An we kem mone kam bok yo, sane Festus si an we kibot sukdu gato yé ndak Paulus su ne. Festus ki do, "Feliks misyar yetu ge dik yo kem mo penjara.
15Ji mu mo Yerusalem sa, ye Yahudi bi yepasye si yekwesú mo Yefun Allah bi nu ki subot sukibit gato ye ne ben. Ye Yahudi ne ndekwa ji syokom ye gu an kwop mo sukibit ne.
16Ji ki nai ye Yahudi bi yekwesu bok ne do, men ye Roma yo syogat ye gu nje kwop mo suk gato ye ndak an mone nde tó, men kibot sino et. Yé gato ndak ye ne ki bi sukdu-i ne, or o ye ne waii ki bi sukdu-i gwawa an dakai o. Men kibot sino digane, orete men nai sukjimnut mone.
17Sane ye Yahudi ne ma mo kota Kaisarea ré sa, ji yo ben suk yo o nde, wo bi ik, ete ji sum nje wa men kibot sino. Ji syogat yé mu kar ye ne ma.
18Ji nut do, bere yé ki sukibit gato ye ne ben ware, yé gato ndak ye ne ti mo ji gwem ndak ye ne sa, sukibit yo mo nde,
19wo án ki subot suk yo mo ye Yahudi bi sukduno-i gato án si ye ne duwer yu mó. An si ye ne duwer yu mo yekri ge dik yo gato gum do Yesus. Ye gato gum do Paulus ne ki do, Yesus gane mbau satu.
20Sane kadit ne o, ji nalar mo os gato ndo. Ji jam nde os koirut ware, sane ji ki do, 'Nan fro wa nan mu mo Yerusalem wa men kibot sukdu ré mo ji gwem mone, bado?'
21Sarewo Paulus bariwa re, wo an kiwa Kaisar dakai kibot sukdu ne sor. Sane ji syogat ye mewa an mo penjara more, sane sor men ku os wa men top an mu ku Kaisar mo kota Roma."
22Orge Agripa ki nai Festus do, "Ji dakai iwa jam ye ne bi sukdu-i." Sane Festus ki do, "Ik, ete nan jam ye ne bi sukdu-i."
23Bi ik, ete Agripa si Bernike ma mo nu sye ne. An we yepasye, sane an we mubot os sa, yé sara, yé kamo wa. An we sok mo nu gato ye kibot suk ne mit. An we si yesukmise bi padosye ge bok yo si yekwesu ge bok yo mo kota ne, án sino sok mo nu mit ne. Orge Festus syogat ye mu kar Paulus ma, ete Paulus ma ti mone.
24Orge Festus ki do, "Yenggras yeraja Agripa, si yenggras sino, men me ye ré, ye Yahudi bok ne sino wergat ji mo Yerusalem si Kaisarea dom, subere ji syogat ye gu an kwop. Ye Yahudi bok ne sino saiye mo an do, 'Ye ré kem mo bur ré o nde.'
25Sarewo an yo ben suk yo siri kadit ye Roma bi sukduno-i tepsu ji syogat ye gu an kwop yo mo nde. Sarewo an kiwa Kaisar dakai kibot an bi sukdu-i, sane ji nai sukjimnut do, bere men top an mu mo Kaisar mo kota Roma.
26Sarewo ji jam nde suk gato bere ji krom wa Kaisar subot an. Sane ji kar an ma ku nan, yenggras Agripa nyim si yenggras bok ré sino wa nin ndobot an, subere kadit ne, ji fro sukdu wa ji krom mo surat wa ji bi mu mo Kaisar,
27we, ji nut do, men top ye gato men but ete sok mo penjara ne mu mo Kaisar yi nde, wo men krombot sukibit gato an ben ne et."
<< Kisah Para Rasul 25 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel