1Men sino kom mo sem de sisu ndo, orete yé ki nai men do, ef ne gum do Malta.
2Yé gato kem mo ef ne ben bi suk-i ndo yé su men. Án gre bot, ete kendo men ma, subere bot kam is men, we sugane nogi, nyot kedek.
3Paulus mu nai kwe gu but dik yo. Paulus gwat ma grem kwe gu ne mo bot saresa, kwis dik yo syesyar kadit kwe gu ne, we bot kam is kwis ne. Kwis ne jau Paulus syim ete ut mó.
4Yé gato kem mo ef do me kwis ut mo Paulus syim sa, án ki nai yu do, "Ye ré ben sukibit, an gu ye yi kwop bayok, we kapre an yo kwop mo sem nde, bergan Yefun gato ben sukye nai ye gato ben sukibit, bere gu an kwop wé sor, an yo mbau o nde."
5Sarewo Paulus gwi kwis ne sombok ges mo bot, ete kom mo rut Paulus yo ku suki mo nde.
6Yé gato kem mo ef ne me kwis ne jau Paulus, sane án nut do, bergan Paulus syim gun, ondeyo bergan án gensu Paulus ges kwop mo án gwem. Án eswa nam it, wo suk yo mo nde, Paulus ndo tó. Sane án bi sukjimnut brek or re, án ki do, Paulus anato tepsu yefun ge dik yo, án nut do Paulus bi suktinggi mó.
7Karowa pe ne, yesan mo ef ne gato gum do yenggras Publius bi bur det-i ne mó. Yesan kendo men ma kem mo an bi nu. Men kem mone kam gri rek, an ben sukndo su men.
8Tomgane yesan bi ai kaim kam, an on i, an sem, an i ndo nde. Paulus mu ku yesan bi ai, Paulus ki suk su Yefun Allah, Paulus ak syim mó yenggras ne, orete yenggras ne ge satu re.
9Yé mo ef ne jam sukdu ne sa, yé gato i ne sino ma ku Paulus, or yé bok ne sino ge re.
10Yé gato kem mo ef jimnotku men. Án ós men su suk mwa. Men fro wa men bi win mo kapal be o sa, án syo suk mwa gato men yewa ne nai men subere men gwat mo kapal ne.
11Men kem mo ef Malta kom mo aina gri, or men it mo kapal dik yo gato nor mone su aina gato nobu kas. Kapal ne ma kadit Aleksandria. Yé mbrau kapal ne sú su kwe gato ye wi ka sa yefun ge we gato yé som subere yefun we ne mewa kapal. Yefun ge we ne ye kendo gum do, "Kastor si Poluks."
12Men mu kadit Malta, or men kom mo kota Sirakusa sa, men is mone. Men kem mone kam gri rek.
13Orge men bi win o mu mo kota Regium. Bi ik, ete nobu nyot kas, sane men bi win kam we rek, ete men mu kom mo kota Putioli.
14Men ku ye gato onyar kem mo Yefun Yesus ge bok yo mone. Yé bok ne ki nai men do, men si án kem mone kom mo ari dik et. Sane, men kem mone ari dik, orge men mu mo kota Roma.
15Yé gato onyar kem mo Yefun Yesus mo kota Roma jam do men ma mone, sane yé bok yo ma kom mo pasar Apius eswa men mone. Yé bok yo o ma kom mo pe dik yo gato gum do Nu Pos Ke Gri, ete án eswa men mone. Paulus do ku yé bok ne sa, Paulus ki ndo mo Yefun Allah, an mit at wa yé bok ne sakanwa an.
16Men mu kom mo kota Roma sa, yesukmise bi padosye yo sok Paulus mo penjara nde, wo an misyar Paulus kem mo nu yi, mo an dakai. An syogat yesukmise ge dik yo mewa Paulus mo nu ne.
17Kam gri rek or, Paulus kendo ye Yahudi bi yekwesu ma sum mo an bi nu. Yenggras bok ne ma sum sino, ete Paulus ki nai án do, "Yenggras, ji bi nji, ji yo ben sukibit nai men ye Yahudi nde, ji yo ben siri kadit men bi amui bi sukduno-i nde, wo ye but ji mo Yerusalem, ete syo ji mo ye Roma syim.
18Ye Roma ndobot ji, orete án ki do, án sombok ji wé, we ji yo ben sukibit tepsu ye syogat ye gu ji kwop nde.
19Sarewo ye Yahudi bok yo ndak ji gat, sane ji yo ku os nde, ji kiwa Kaisar kibot ji bi sukdu ne. Ji yo bi sukjimnut wa ji ndak ji bi yewis-i, ye Yahudi mo suk yo mo nde, wo ji kiwa Kaisar kibot ji bi sukdu, we ye Yahudi ndak ji gat sor.
20Sane anato ji kendo nin ma wa men kibot sukdu ne. Ji kwabom kam mo Ye gato ma wa kak os ndo wa Yefun Allah nai men gum sok mo Yefun Allah bi rus-i do, Ye ne ma tepsu ye Yahudi bok ne sino eswa An ma ne. Kadit ji kwabom kam mo Ye ne anato ye rai ji su rantai ré."
21Ye Yahudi gato sum mone ki do, "Men yo ku surat kadit bur Yudea su sukdu subot nan yo mo nde tó. Ye Yahudi gato ma kadit bur Yudea, án yo ki suk gato ibit subot nan dom nde.
22Sarewo men iwa men jam sukdu subot suk gato nan onyar kem mone, we men jam do, yé mo pe mwa neya ki do, sukdu gato nan jom ne siri re."
23Sane án si Paulus tom yu su kam gato bere án ku yu o wa kibot sukdu ne. Su kam ne, án si yetu ge bok yo o ma mo nat gato Paulus kem mone. Kadit nyotkwo sor kom mo noru Paulus nuk sukdu subot os gato Yefun Yesus kak wa men yetu gum sok mo Yefun Allah bi rus-i, ete bere Yefun Allah tepsu men bi yekwesu mone or re. Paulus nukbot Musa si yenabi bok ne bi sukdu-i, subere yé jam rer do, Musa si yenabi ne krom bi sukdu-i subot Yefun Yesus anato bor re. Paulus ki bi sukdu-i, Paulus werwa ye Yahudi gato ma ne jammo an bi sukdu-i, ete brek ma onyar kem mo Yefun Yesus.
24Yé deyo nut do, Paulus bi sukdu-i ne sangge, án jammo, wo yé deyo bariwa re.
25Án sino duwer yu mo sukdu ne. Paulus ki bi sukdu-i kwa wari, orete án sino mu kadit nu ne re. Paulus bi sukdu-i wari anare, "Yefun Allah Gen bi sukdu-i gato An ki nai men bi amui ne sangge. An taru sukdu ne bot yenabi Yesaya.
26Yefun Allah ki do, 'Yesaya, nan mu ki nai yewis ye Yahudi do: Nin da syaretwa sukdu petok sor, sarewo nin jam nde bi sukjimnut ne ware; nin da sokwa suk ne petok sor, sarewo nin jam nde suk gato bor ne ware.
27Yewis ye Yahudi gare jam nde suk, we yé ne su krat ware; án dabe mbut it, ondesor sa, án jam suk; án gro ndu it, ondesor sa, án me suk sisu ndo; án bi sukjimnut yo nggi o nde it, ondesor sa, án jam sukdu ne kom mo mit ete bere án brek ma mo Ji, orete yo, Ji ben án kem ndo it.' "
28Orete Paulus ki do, "Ji iwa nin jam do, os ndo gato Yefun Allah fro wa nai men yetu wé kadit sukye subere men kem ndo to kapyo mato kapyo, ye Yahudi misyar or re. Sane su ré yé gwat sukdu ne mu ki frekbot yewis yi neya jam re. Yewis yi bere iwa jammo sukdu ne."
29[Paulus ki bi sukdu-i kom mone, orete ye Yahudi mu kadit, án duwer yu bot os mo sukdu ne.]
30Paulus kem mo nu gato an bi sugum wa ye gato bi nu ne sor kom mo tahun we. Paulus mit iwa ku yé mwa gato ma wa ku an mo nu ne.
31Paulus yo nyu nde, an ki sukdu subot men bi Yekwesu Yesus Kristus, an ki subot os ndo gato Yesus Kristus kak wa men yetu gum sok mo Yefun Allah bi rus-i, bere Yefun Allah tepsu yekwesu wa men mone. Paulus duno nje sane sor, yé yo ma duyawa an nde.
<< Kisah Para Rasul 28 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel