Alkitab Mobile SABDA
[VER] : [ABUN]     [PL]  [PB] 
 <<  Lukas 9 >> 

1Yefun Yesus kendo An bi pakon ge musyu dik sop we ne ma, orete Yefun Yesus syo suktinggi nai An bi pakon subere án nggiwa syun semda wé kadit ye gato semda ben ne, ete Yefun Yesus syo suktinggi nai An bi pakon subere án ben ye gato i ne ge re.

2Yefun Yesus syo suktinggi nai An bi pakon ne, orete Yefun Yesus syogat An bi pakon mu ki sukdu subot os ndo gato Yefun Allah fro wa men yetu subere Yefun Allah nai men gum sok mo An bi rus-i, ete An tepsu men bi Yekwesu mone. Yefun Yesus syogat An bi pakon mu ki sukdu ne sor nde, wo pakon ne mu ben ye gato i ne ge kadit án bi suki ne dom.

3Yefun Yesus ki nai án do, "Nin mu it yo, nin gwat suk nde. Nin gwat kwepu nde, nin gwat yu nde, nin gwat sugit nde, nin gwat sugum nde, nin gwat san sun dik yo o dom nde.

4Nin mu ré, nin kom mo kota dik yo, ete nin mu sok mo ye yo bi nu mone yo, nin kem mo nu dik ne sor nin mu kadit kota ne.

5Nin mu ré, nin do kom mo kota dik yo, ete nje mone bariwa nin yo, nin mu kadit kota ne, nin tet nin gwes tak su bofuf ne ges wé kadit nin gwes satu, subere yé gato kem mone jam do, án ben sukibit nai nin re."

6Sane Yefun Yesus bi pakon mubot kampung mwa ne wa án ki sukdu subot os ndo gato Yefun Allah fro wa men yetu ne. Pakon ne ben ye gato i ne ge kadit án bi suki dom.

7Herodes gato jowa nje mo bur Galilea ne, Herodes jam sukdu subot suk mwa gato Yefun Yesus si An bi pakon ben ne sa, Herodes nalar ket, we yé deyo ki nai an do, "Ye ne anato Yohanes gato ras nje mo syur, ete ré ne an sun kadit sukkwop. ."

8Yé deyo ki do, yenabi Elia anato satu ma re. Yé deyo o ki do, yenabi dik yo kadit yenabi bok yo gato kam nyim tuya kem mo bur re, anato sun satu re .

9Sarewo Herodes ki do, "Ji syogat ye tot Yohanes su wé re, wo Ye ne te, je u gei ne? Ji jam sukdu subot suk mwa gato An ben ne." Sane Herodes werwa an ku Yefun Yesus.

10Yefun Yesus bi pakon satu kadit nat mwa gato án mubot ne sa, pakon ne ki nai Yefun Yesus subot suk mwa gato án ben mone. Ete Yefun Yesus ki nai An bi pakon do, "Men mu kadit pe ré et." Sane Yefun Yesus si An bi pakon wadigan mu mo kota gato gum do Betsaida.

11Sarewo yé mwa mo kota bok neya jam do, Yefun Yesus si An bi pakon mu mo Betsaida sa, yé mwa ne boribot án dom. Yé mwa ne ma mone sa, Yefun Yesus kak An mit wa yé mwa ne, ete Yefun Yesus ki sukdu subot os ndo gato Yefun Allah fro wa nai men gum sok mo An bi rus-i subere An tepsu men bi Yekwesu. Yé bok ne gato i mone, Yefun Yesus ben yé bok ne ge dom.

12Karowa kam bok, ete Yefun Yesus bi pakon ge musyu dik sop we ma mo An. Pakon ne ki nai Yefun Yesus do, "Yenggras, Nan syogat yé mwa ré mu subere án mu mo kampung bok neya gato karowa pe ré, subere án mu ku nje gato kem mone, subere án so sugit wa án git si án ku nat yo wa án sem mone dom, we mo pe ré ye yo kem mo nde re."

13Sarewo Yefun Yesus ki do, "Nin dakai anato syo sugit nai yé mwa ré git et!" Pakon ne ki nai Yefun Yesus do, "Mban! Men bi roti koi mek si boge ge we sor re. Men bi sugit ne yo tep nde, sane Nan iwa men mu so sugit wa yé mwa ré git bado?"

14(Yebris gato ma mone karowa ge ribu mek.) Yefun Yesus ki nai bi pakon ne do, "Nin syogat yé mwa ré syo yu kem bokbu, bokbu dik yo karowa tepsu yetu ge musyu mek."

15Sane pakon benbot suk gato Yefun Yesus ki nai an re. Pakon syogat yé mwa ne sino syo yu kem bokbu sane, án kem bokbu dik dor kadit yu.

16Orge Yefun Yesus nai roti koi mumek si boge ge we ne. An nai, ete An sok mu nim mo gu, An ki do, "Ndo mo Nan, Yefun Allah wa sugit gato Nan syo nai men ré." Yefun Yesus ki sane or, Yefun Yesus syat roti si boge ne. An syo nai An bi pakon, ete An bi pakon ne waii syo bot yé mwa mone.

17Yé mwa ne sino git sor án on ge, orete pakon mu sum sugit napta ne bok mo yu. Sugit napta ne án sum sino bok mo yu musyu dik sop we ses.

18Wam dik yo Yefun Yesus si An bi pakon wadigan mu kadit yé mwa, ete Yefun Yesus ki suk su Yefun Allah mone. Yefun Yesus ki suk su Yefun or sa, Yefun Yesus ndo mo An bi pakon do, "Yé mwa kibot Ji ré te, yé kibot Ji sa u ne?"

19Pakon ki nai Yefun Yesus do, "Yé bok yo ki do, Nan anato Yohanes gato ras nje mo syur. Yé bok yo o ki do, Nan anato yenabi nyim gato gum do Elia. Yetu ge bok yo o ki do, Nan anato yenabi ge dik yo o gato kwop kam nyim, ete sun satu."

20Sane Yefun Yesus ndo mo An bi pakon do, "Wo nin dakai, nin nutbot Ji sa u ne?" Petrus ki do, "Nan anato Yekwesu, gato Yefun Allah bes gum Kristus, gato Yefun Allah syogat ma mo bur ré wa nai men yetu kadit sukye ete jowa men."

21Orge Yefun Yesus dumik wa An bi pakon wa sukdu gato Petrus ki subot An. Yefun Yesus syogat An bi pakon do, "Nin mu ki sukdu ne nai ye yi jam daret nde."

22Yefun Yesus ki o do, "Yetu bi Pa to Ji ré, gato Yefun Allah syogat ma kadit gu ne, bere ye Yahudi bi yepasye, yekwesú mo Yefun Allah bi nu si ye Yahudi bi yeguru agama ne, án sino bariwa Ji or re, ete án ben sukye nai Ji ket kwayo-kwayo. Bere yé gu Ji kwop, sarewo kom mo kam we rek, bere Yefun Allah sun Ji kadit sukkwop o re."

23Orge Yefun Yesus ki nai yé mwa mone do, "Ye to iwa simo Ji it yo, ye ne yo iwa ben suk ket an mit-i ne o nde, wo kamdik-kamdik an ben Ji bi suk-i sor, an tepsu ye gato sam an bi kwesukwin. Kapre an ku sukye mone, an kwop o, an mbau o an simo Ji pe sor.

24We sare, ye to bi sukjimnut sye wa an dakai kem ndo mo bur ré yo, bergan an kwop re, wo ye to bi nggwa mo Ji wa an ben Ji bi suk-i yo, bere ye ne kem ndo to kapyo mato kapyo.

25Nin ben suk ket nin mit-i subere nin ku suk mwa mo bur ré, ete nin ges mo os ibit mone. Suk mwa gato nin ku ne sato sugum e, san e, nu e ne te, bere ós nin gum sok mo Yefun Allah bi rus-i sa u ne? Bere suk mwa ne ós nin kem gesyos sa u ne? Bere suk mwa gato nin ku ne yo ós nin nde.

26Bere Yetu bi Pa to Ji ré satu ma mo bur re. Ji satu ma sisu Ji kaim rer-rik su Ji bi Ai bi suktinggi ne. Malaikat gato ben Yefun Allah bi suk-i si Ji ma sino. Sane, ye to damen wa an ki nai ye yi do, an sok mo Ji bi rus-i si ye to damen wa an kibot Ji gum nai ye yi jam yo, bere Ji do satu ma it yo, Ji waii damen wa ye ne, Ji waii bariwa Ji ki do, ye ne sok mo Ji bi rus-i dom.

27Suk gato Ji ki ré suksangge anare, yetu ge bok yo gato ti more yo kwop nde tó, bere án kem mo bur ré kom mo kam gato án me Yefun Allah bi suktinggi tepsu Yekwesu gato nggi wai ne bor re."

28Yefun Yesus ki sukdu ne or sa, ari dik yo o, ete Yefun Yesus kendo Petrus, Yakobus si Yohanes sisu An it mo banbo sye subere An ki suk su Yefun Allah mone.

29Yefun Yesus do ki suk su Yefun Allah sa, Yefun Yesus gwem tara o re. Yefun Yesus bi san gato An it ne kwo rer-rik.

30Sugane pakon ka gri ne gensu yetu ge we bor mone. An we ne gum do Musa si Elia.

31Musa si Elia ne, an we kaim rer-rik dom. An we nuk sukdu su Yefun Yesus mone. An we nukbot kam gato bere yé gu Yefun Yesus kwop mo Yerusalem. Bere su kam gane Yefun Yesus benbot suk gato Yefun Allah fro wa An ben ne.

32Sugane Petrus si bi yesyim we ne sem mit re. Sarewo an ka gri sun, an ka gri gensu Yefun Yesus kaim rer-rik. An ka gri gensu yetu ge we gato si Yefun Yesus ti mone.

33Ye we ne do mu kadit Yefun Yesus sa, Petrus ki nai Yefun Yesus do, "Yeguru o, men ka gri si Nan ma more anato ndo. Men nggo nu ti ke gri et, dik yo wa Nan, dik yo o wa Musa, dik yo o wa Elia" (Petrus ki sane, sarewo Petrus ki bi sukdu-i daret, an yo nutbot ndo nde.)

34Petrus ki suk saresa, duk is ma kewa án sino. Duk ne do is kewa án sa, Yefun Yesus bi pakon ka gri ré nyu ndo nde,

35ete án jam sukdu kadit duk mit ne ma. Yefun Allah ki sukdu kadit duk do, "Ji bi Gan gato Ji bes anare. Nin jammo An sor."

36Yefun Allah ki bi sukdu ne do or sa, an ka gri sokme Yefun Yesus wadigan ti mone sor re. Yefun Yesus bi pakon ka gri ne yo nukbot suk mwa ne nai ye yi nde. An ka gri yo ki suk yo su ye yi subot suk gato án me ne nde.

37Ik ete Yefun Yesus si bi pakon ka gri is kadit banbo ne sa, yé mwa ma ku Yefun Yesus.

38Yebris dik yo gato si yé mwa ne mone saiye do, "Yeguru, ji ndek mo Nan do, Nan ma Nan ós ji bi pa yebris et. Ji bi pa ge dik ne sor.

39Semda ben ji bi pa re. Semda do ben pa ne yo, pa saiye dakai daret. Semda et pa kaim mo bur, pa dipa mo bur sane sor, an syokwet bre. Semda ne ben ji bi pa ibit gat sor. Semda ben ji bi pa petok sor, semda yo sombok wé kadit pa nde re.

40Ji ndek mo Nan bi pakon subere án syun semda ne wé kadit ji bi pa ware, án yo nggiwa ós ji bi pa nde."

41Sane Yefun Yesus ki do, "Mban! Nin gare, nin yo onyar kem ri mo Yefun nde, nin su krat teker ware go! Ji bambrai wa Ji ben Ji bi suk-i njep si nin o it! Kam ot ete bere Yefun Allah nai Ji wé kadit nin ne? Nin gwat pa ne ma mo Ji et."

42Ye do gwat pa ne ma mo Yefun Yesus sa, semda ne ben pa ges gwa mo bur, semda ben pa kokro. Sarewo Yefun Yesus ndantom semda ne subere semda ne sombok wé kadit pa ne. Sane Yefun Yesus ben pa ne ge re, orete Yefun Yesus top pa ne satu mo pa bi ai.

43Sane yé mwa ne sino gato me suk gato Yefun Yesus ben ne án yeket Yefun Allah bi suktinggi gato bor sye wai o mone. Yé mwa ne sino yeket suk mwa gato Yefun Yesus ben mone tó, Yefun Yesus ki nai An bi pakon do,

44"Nin jammo suk gato Ji ki ré et. Bere yeko ma wa but Yetu bi Pa to Ji ré."

45Sarewo Yefun Yesus bi pakon jam nde sukdu gato An ki ne re. Sukdu gane bi sukjimnut ne, Yefun Allah gurik kadit pakon re. Sarewo pakon ne nyuwa án ndo mo Yefun Yesus subot sukdu ne bi sukjimnut-i.

46Yefun Yesus bi pakon duwer yu subot ye gato gum kok wai mo án sino.

47Sarewo Yefun Yesus jam pakon ne bi sukjimnut mo án mit, sane Yefun Yesus nai pa wokgan dik yo ma, ete An grem pa ne ti mo An de.

48Orete Yefun Yesus ki nai An bi pakon do, "Ye to mit kem mo Ji anato an kak an mit wa pa wokgan sato ré it yo, tepsu ye ne kak an mit wa Ji dom anane. Sane dom, ye to kak an mit wa Ji yo, ye ne kak an mit wa Yefun Allah gato syogat Ji ma more dom anane. Sane nin yé gato is an nggwa tepsu pa wokgan, bere Yefun Allah anato bes ye ne gum kok."

49Yohanes ki nai Yefun Yesus do, "Yeguru, men me yetu ge dik yo syun semda ge bok yo wé, an ki gum su Nan gum. Sane men duyawa ye ne do, 'Nan ki gum su Yefun Yesus gum wa syun semda o nde, we nan yo sisu men nde.' "

50Yefun Yesus ki nai Yohanes si bi pakon deyo do, "Nin duyawa ye ne nde, we ye gato yo duwer men nde sok mo men bi det-i, bere an ós men mone tó."

51Karowa bi kam gato Yefun Yesus mu kadit bur ré, ete An it mu mo gu, Yefun Yesus nai sukjimnut dik mo An mit do, An mu mo Yerusalem o et.

52Yefun Yesus yo mu nde tó, An syogat pá bok yo gwat suktaru mu nyim. Yé bok ne mu re, ete án sok mo kampung dik yo mo bur Samaria wa án ndek nje gato kem mone fro suk ndek Yefun Yesus ma mone.

53Sarewo yé mwa gato kem mone bariwa Yefun Yesus re. Yé ne yo kak án mit wa Yefun Yesus nde, we yé ne jam do, Yefun Yesus mu wai mo Yerusalem re.

54Yefun Yesus bi pakon gato gum do Yohanes si Yakobus jam do, ye Samaria bariwa Yefun Yesus ma mo án bi kampung sa, an we ndo mo Yefun Yesus do, "Yenggras, men ndek Yefun Allah syo bot is kadit gu ma git ye Samaria mo kampung ré wé, bado?"

55Sarewo Yefun Yesus brek ma ndantom an we mo sukdu gato an we ki ne, we sukdu ne yo tepsu Yefun Yesus mit nde.

56Orge Yefun Yesus si An bi pakon mu kadit pe ne mu mo kampung yi re.

57Yefun Yesus si An bi pakon mubot os ne sa, yetu ge dik yo ma ete ki nai Yefun Yesus do, "Ji kwop o, ji mbau o, ji simo Nan mu mo pe gato Nan mu mone pe sor."

58Yefun Yesus ki nai an do, "Ndar krok sa, bi jokwak wa kem mó, ndam sa, bi bat wa kem mó, wo Yetu bi Pa to Ji ré yo ku nat wa Ji kem not yo mo nde."

59Yefun Yesus ki nai yetu ge dik yo o do, "Nan simo Ji et." Sarewo ye ne ki do, "Yenggras, ji mu bi ji bi ai mo makwe orete yo, ji simo Nan."

60Yefun Yesus ki nai ye ne do, "Nan misyar ye gato jam nde Yefun gato bi sukjimnut kwop ne dakai mu bi yekwop mo makwe sor. Wo nan simo Ji, nan mu ki nai yé mwa do, 'Yefun Allah ma jowa men tepsu men bi Yekwesu it anare.' "

61Yetu ge dik yo o ki do, "Yenggras, bere ji simo Nan, sarewo ji satu mu mo ji bi nu, ji ki nai ji bi rus jam or et."

62Yefun Yesus ki nai an do, "Ye to simo Ji, ete an brek mu ben an bi suk-i kadit it yo, bere ye ne yo tep wa sok mo Yefun Allah bi rus-i nde, ye ne yo tep wa an ben Yefun Allah bi suk-i nde re."



 <<  Lukas 9 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel