1Orete Yefun Yesus bi pakon ma ku An, ete ndobot do, "Mo pe gato Nan tepsu Yekwesu mone te, je u anato gum kok wai kadit yé mwa ne sino mone ne?"
2Sane Yefun Yesus kendo pa wokgan ma si án ti mone sino,
3ete Yefun Yesus ki do, "Suk gato Ji ki ré suksangge anare, nin yo ben nin nggwa ga sato pa wokgan ré nde yo, bere nin gum yo sok mo Yefun Allah bi rus-i nde.
4Ye gato is an nggwa ga tepsu pa wokgan ré anato bere Yefun Allah bes gum kok mo An bi rus-i mo gu.
5Sane dom, ye to kak an mit wa pa wokgan sato ré, we an bi sukjimnut kem mo Ji yo, tepsu an kak an mit wa Ji dom anane."
6"Ye yo ben pa wokgan gato onyar kem mo Ji ré ges mo os ibit it yo, sa ndo sa ye rai ye ne syidem dom jok sye krat, ete ye bare an mo sem mo pe gato kru subere an rap mone.
7Yé mo bur ré ku sukye, we suk bok yo ben men yetu ges mo os ibit. Suk gane bere mó, sarewo ye gato gwat os ibit ne ma wa men, bere ku sukye ndo nde.
8Nin syim e, nin gwes e ne do ben nin ges mo os ibit it yo, nin tot wé, ete nin bare wé kadit nin et. Nin sok mo Yefun Allah bi rus-i mo gu su nin syim dik, ondeyo nin gwes dik yo sor re anato ndo wai kadit Yefun Allah bare nin mo bot gesyos su nin syim we si nin gwes we ne sino mó. Sane nin werwa nin tot suk gato gwat nin sok mo os ibit ne wé kadit nin et.
9Sane dom, nin gro dik yo ben nin ges mo os ibit it yo, nin tik nin gro ne buk, ete nin bare wé et. Nin sok mo Yefun Allah bi rus-i mo gu su nin gro dik yo sor re anato ndo wai kadit Yefun Allah bare nin mo bot gesyos su nin gro we ne sino mó."
10"Sane nin mewa nin nggwa subere nin gwat os ibit wa pa wokgan sato ré nde, we Ji ki sare do, malaikat gato mewa pa ré mu ku Yefun Allah mo gu petok sor.
11[Wo Yetu bi Pa to Ji ré ma mo bur ré wa kak os wa ye gato muket os ibit subere an brek kadit os ne ete kem ndo to kapyo mato kapyo.]
12Yetu ge dik yo bi domba ge wotin dik, ete domba ge dik yo muri yo, sane bere ye ne ben suma ne? Nin nutbot sa u ne? Bere an mu kadit ge musyu musi sop musi mo pe gato domba git sugit mone, ete an mu meret ge dik gato muri ne sor.
13An ku domba ne yo, bere an mit at wa ge dik ne wai kadit ge musyu musi sop musi gato kem ndo ne. Suk gato Ji ki ré suksangge anare, bere an mit at wa wai o re.
14Sane dom, men bi Ai mo gu bariwa ye gato sok mo An bi rus-i sim ge dik yo muri kadit An."
15"Men bi nji ben sukibit ma nai men it yo, men dakai mu ku an, ete men si an wadigan kibot et. An jammo men bi sukdu it yo, bere men si an tepsu dik satu.
16Wo an bariwa men bi sukdu-i yo, men kar yetu ge dik yo, ge we yo, si men mu kibot sukibit ne sino. Sane men ben subot Yefun Allah bi sukdu-i ne, kwa gato ki do, 'Men kibot suk yo, yetu ge we yo, ge gri yo waii kibot tepsu yu sa, bere men nut do sangge.'
17Wo ye ne yo jammo yetu ge we yo, ge gri yo ne nde yo, men kibot mo yé mwa gwem mo nu ari. Kom mo rut, ete an yo jammo yé mwa mo nu ari ne nde yo, men misyar an, ete men nutbot an do, an tepsu ye gato jam nde Yefun. Sane dom, men nutbot an o do, an tepsu ye gato ben sukibit sato ye gato nai sugum kadit nje wa pemerintah ne."
18"Suk gato Ji ki ré suksangge anare, suk gato nin kibot, ete nin nai sukjimnut dik do, nin duyawa yé ben mo bur ré yo, bere Yefun Allah mo gu duyawa yé ben dom. Sane o, suk gato nin iwa yé ben mo bur ré yo, bere Yefun Allah mo gu iwa yé ben dom.
19Sane dom, Ji ki sare do, nin mo bur ré, nin ge we yo tepsu dik mo sukdu kwa dik yo gato nin ki nai Yefun Allah ne yo, bere Ji bi Ai mo gu syo nai nin.
20We sare, mo pe gato yetu ge we yo, ge gri yo e ne sum tepsu Ji bi yetuge-i, Ji sisu án mone dom."
21Orete Petrus ma ku Yefun Yesus ete ndo mo do, "Yenggras, ji bi nji do ben sukibit ma nai ji it yo, ji misyar sukibit gato an ben ne or wé kadit an kom mo wam ot ne? Wam mufit ne tep it bado?"
22Yefun Yesus ki do, "Nde re. Ji ki sare do, wam mufit nde, wo nin maskwa wa nde, ete nin nutbot o nde kom mo wam musyu mufit sop mufit et.
23Sane Yefun Allah ben suk su ye gato Yefun Allah nai sok mo An bi rus-i tepsu yepasye mo sukamno ré: kam dik yo yepasye ge dik yo watbot an bi pakwerut bi bon, ete yenggras ne kendo bi pakwerut ne ma wa bi bon ne satu.
24Ketke ye kar pakwerut dik yo gato bi bon kom mo juta mwa yé re.
25Pa ne yo bi sugum tepsu nde, pa ne yo nggiwa bi nde, sane yepasye ne syogat ye bijual pa ne si bi nggon si bi pa si bi suk mwa ne sino, ete bi sugum mo bon ne.
26Sane pa ne bare nggwa mo yenggras ne gwem ete ki do, 'Yenggras, nan misyar yei, bere ji bi nan bi bon mone tó.'
27Sukjimnut ndo it mo yenggras ne mit subot pa ne, sane yenggras misyar bon ne wé kadit pa re, yenggras yo nutbot o nde, ete an ki do, 'Pa o, ji misyar ji bi bon mo nan ne wé re, nan dakai mu sor.'
28Pa ne syesyar kadit yenggras bi nu saresa, pa ne ku pakwerut dik yo o. Pa we wok ré bi bon wokgan kom mo ribu bok yo, sarewo pa we sye but pa we wok ete sorom pa ne syidem sane sor bergan pa we wok yo tik mas ndo o nde, ete pa we sye ki do, 'Nan bi ji bi bon mo ji kekro et.'
29Pa we wok bare nggwa mo pa we sye gwem ete ki do, 'Nan misyar yei, bere ji bi nan bi bon mone tó.'
30Pa we sye yo jammo pa we wok bi sukdu-i nde, ete syogat yé bok pa ne mo sel sane sor pa bi bon ne or wé et.
31Pakwerut yi mo nu ne me suk gato pa we sye ben ne sa, pa bok ne sino jimnutbot ndo nde sane sor pa bok ne kaim rere su. Sane pa mu ku yenggras ete frot nai.
32Sane yenggras kendo pa we sye gato ben sukibit ne ma ete ki nai do, 'Nan gare, nan ben sukibit wai teker sare wa suma ne? Nan bare nan nggwa mo ji gwem, nan ndekwa ji rus nan bi bon sye ne wé, ete ji rus bon ne wé or re.
33Sarewo nan yo dakai jimnotku pa gato bi bon wokgan mo nan nde wa suma ne? Ji rus nan bi bon sye ne wé, sane nan yo rus pa ne bi bon wokgan ne wé nde wa suma ne?'
34Sane yenggras maskwa ndo nde. Yenggras syogat ye sok pa we sye mo sel subere ye ben sukye nai pa mone sor pa ne bi bon sye ne sino satu et."
35Sane Yefun Yesus gwat sukamno ré, orete An kibot sare do, "Sane, sukibit gato ye yi ben nai men yo, men maskwa wa nde, men nutbot o nde, wo men rus sukibit ne wé sisu sangge, ondeyo, bere men bi Ai mo gu ben sukye nai men tepsu yenggras ne ben nai pa we sye ne."
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel