1Mo buku ré, ji krom sukdu subot os ndo gato Yesus Kristus kak wa men yetu ne. Yesus Kristus, gato Yefun Allah bi Gan, anato kak os subere Yefun Allah nai men gum sok mo An bi rus-i.
2Yenabi Yesaya krom mo bi buku subot ye ne sare do, "Yefun Allah ki do, 'Ye gato ji syokom gwat Ji bi suktaru anare. Ji syokom an mu nyim mo Nan gwem, subere an fro os wa Nan.'
3Mo pe gato kwe yo kom mo nde, ye yo saiye do, 'Men fro os gato ndo wa Yefun, men bi Yekwesu ne se! Men duk os wa An muket se!' "
4Sane Yohanes ma, Yohanes anato fro os gane. Yohanes kem mo pe gato kwe yo kom mo nde. An ras nje mo syur, an kibot Yefun Allah bi suktaru. An ki nai nje gato ma mo an do, "Nin kwet kadit sukibit gato nin ben ne, nin jammo Yefun, ete nin ma wa ji ras nin mo syur subere Yefun Allah yo maskwa nin mo sukibit gato nin ben ne o nde, tepsu An tot sukibit ne wé kadit nin re."
5Yé bok ne sino mo bur Yudea si yé bok ne sino mo kota Yerusalem dom, yé mwa ne ma wa syaretwa sukdu gato Yohanes ki ne. Yé gato rek sukibit gato án ben ne nai Yohanes sa, Yohanes ras yé ne mo Syur Yordan.
6Mo pe ne, Yohanes it san gato ye jom kadit unta go, an far an jakuke su suge da. Mo pe ne, kwe yo kom mo nde, sane Yohanes git yoi tepsu an bi sugit-i, an da for rom dom.
7Sane Yohanes ki nai yé mwa gato ma mo an ne do, "Bere Ye yo gato gum kok sye wai kadit ji waii ma bori. Sane ji iwa ben suk wa An yo, bere ji yo tepsu nde, ji gum wok teker mu bur ware. Bere ji gum yo tep wa ji sombok jamtu mo An bi sepatu dom nde.
8Ji anato ras nin mo syur, sarewo Ye gato gum kok sye wai ne ma it yo, bere An syogat Yefun Allah Gen bok nggwa mo nin, ben sato An ras nin mo Yefun Allah Gen."
9Yohanes ras nje mo Syur Yordan sa, sugane Yefun Yesus ma kadit kota Nazaret gato mo bur Galilea. Yefun Yesus ma mone, ete Yohanes ras Yefun Yesus mo Syur Yordan.
10Yefun Yesus mu nden kadit Syur Yordan saresa, Yefun Yesus me gu det. An me gu det sa, Yefun Allah Gen is ma mo Yefun Yesus. Yefun Allah Gen is ma mo Yefun Yesus ne su kaim sato ndabu.
11Orge yé mwa ne jam Yefun Allah ki sukdu kadit gu sare do, "Nan anato Ji bi Gan. Ji bi sukjimnut sye kas subot Nan. Ji iwa Nan ndo nde."
12Yefun Allah ki sukdu ne or sa, sugane Yefun Allah Gen syogat Yesus Kristus mu mo pe gato kwe yo kom mo nde.
13Kam musyu at rek Yefun Yesus kem mone. Biris bi yekwesu ma mone meret os wa Yefun Yesus subere Yefun Yesus ben suk siri kadit Yefun Allah bi os-i mone. Sarewo Yefun Yesus yo ges mo os ibit ne mo nde. Mo pe gato Yefun Allah Gen syogat Yefun Yesus mu mone, suge krok kem mo pe ne, ete malaikat deyo ma mewa Yefun Yesus.
14Yé grem Yohanes mo penjara or sa, Yefun Yesus mu mo bur Galilea wa An ki sukdu subot os ndo gato Yefun Allah tarubot An.
15Yefun Yesus ki nai nje mone do, "Yefun Allah ma jowa nin tepsu nin bi Yekwesu it anare! Sane nin kwet kadit sukibit gato nin ben ne, ete nin onyar kem mo sukdu subot os ndo gato Yefun Allah fro wa nin ne et."
16Wam dik yo Yefun Yesus mubot Em Galilea de. Yefun Yesus mu mone saresa, An me yetu ge we gato bare mwi mo em ne. Yetu ge we ne gum do, Simon si bi nji dowok Andreas. Kamdik-kamdik an we ne sok boge wa an we ku sugum. Yefun Yesus me an we mone,
17ete Yefun Yesus ki nai an we do, "Nin ka we ma. Nin ka we simo Ji se! Bere Ji duno nin ka we but yetu tepsu nin ka we but boge su mwi ne."
18Yefun Yesus ki nai an we or sa, sugane it, an we misyar an we bi mwi kem, orete an we si Yefun Yesus mu sino.
19Yefun Yesus mubot em de ne, Yefun Yesus muket em de ne ko gan yo o, ete Yefun Yesus me yetu ge we yo o. Yetu ge we ne gum do, Yakobus si bi nji Yohanes, án ka we anato Zebedeus bi gan. An we fro an we bi mwi mo kwem mit.
20Yefun Yesus do me an we mo kwem sa, Yefun Yesus kendo an we ma simo An it anane. Sane an we misyar an we bi ai si ye gato ós an mo kwem si suk mwa ne, ete an we simo Yefun Yesus mu sino.
21Yefun Yesus si bi pakon ka at ne sino mu mo kota Kapernaum. Ye Yahudi bi kam sye, kam Sabat ne, ete Yefun Yesus sok ari mo ye Yahudi bi nu ari. An duno nje mone subot Yefun Allah bi suktaru.
22Yé bok gato jam sukdu ne, án yeket Yefun Yesus, we Yefun Yesus ki bi sukdu-i ne tepsu Yefun Allah dakai ki bi sukdu-i, Yefun Yesus ki bi sukdu-i ne pet mo nje. Sarewo ye Yahudi bi yeguru agama ne, án ki ye yi gum mo án bi sukdu-i subere yé jammo án, wo Yefun Yesus yo duno nje sane nde, Yefun dakai duno nje, ete yé iwa jammo Yefun bi sukdu-i ne sor.
23Yefun Yesus duno nje mo nu ari mit ne saresa, yetu ge dik yo gato semda ben saiye nai Yefun Yesus sare do,
24"Yesus, ye Nazaret, Nan ma more wa suma ne? Te, Nan ma more wa Nan gu men e? Ji jam do Yefun Allah fro Nan ma mo bur ré wa Nan gwat Yefun Allah bi suktaru."
25Sane Yefun Yesus ndantom semda ne do, "Nan not se! Nan titi wé kadit ye ne tom!"
26Orge semda ne ben ye ne tetet wai o re. Semda ne saiye nggi, orete semda ne titi wé kadit ye ne.
27Yé mwa mone me suk gato Yefun Yesus ben ne, án yeket, án nutbot ndo nde, ete án ki nai yu do, "Bei! Suma ré ne? Sukduno be yo bado? Ye gare ki bi sukdu-i pet mo nje it. Ye gare bi suktinggi nggi wai kadit semda dom. Ye gare ndantom semda yo, semda jammo An, ete titi kekro."
28Orge yé mwa ki sukdu subot suk gato Yefun Yesus ben ne mu frekbot peyo-peyo mo bur Galilea sino.
29Yefun Yesus si An bi pakon mu kadit ye Yahudi bi nu ari sa, án mu mo Simon si Andreas bi nu. Yakobus si Yohanes sisu án mu sino dom.
30Yefun Yesus si An bi pakon mu kom mo Simon bi nu sa, yé ki nai Yefun Yesus do, "Simon bi om ne i, mom kaim kam teker. Simon bi om sem mo kwatka sor."
31Sane Yefun Yesus mu me Simon bi om. Yefun Yesus jom nggongras ne syim, ete ós mom ti ma. Yefun Yesus bes Simon bi om ti sa, nggongras kaim dek satu re. Orge Simon bi om gwat sugit si syur wa nje mone git.
32Kam bok or, ndendu re, yé mwa ma mo Simon bi nu. Yé gwat ye gato i si ye gato semda ben ne ma mo Yefun Yesus.
33Yé mwa mo kota ne sino, án ma sum mo nu de gwem.
34Orge yé mwa gato i su suki mwa ne, Yefun Yesus ben yé mwa ne ge wé kadit án bi suki ne or re. Yefun Yesus syun semda titi wé kadit yé mwa gato semda ben ne. Semda ne jam do, Yefun Yesus ma kadit Yefun Allah. Sane Yefun Yesus duyawa semda ne subere semda yo ki napyo nai nje mone jam nde.
35Ik nyotkwo, kam yo it nde tó, Yefun Yesus mu mo nden kadit kota ne. An mu mo pe gato nje yo mo nde. An ki suk su Yefun Allah mone.
36Sarewo Simon si bi yesyim, án mu meret Yefun Yesus.
37Simon si bi yesyim ku Yefun Yesus or sa, Simon ki nai Yefun do, "Yé mwa ne sino meret Nan it anare!"
38Sarewo Yefun Yesus ki do, "Nin ma, men mu mo nat yi et! Men mu mo kampung yi gato karowa more et, subere Ji ki subot Yefun Allah bi sukdu mone dom, we Yefun Allah anato syogat Ji ma mo bur ré wa Ji ki subot Yefun Allah bi sukdu nai nje mo pe mwa ne."
39Sane Yefun Yesus mu ki subot Yefun Allah bi sukdu mo bur Galilea sino. Yefun Yesus duno nje mo ye Yahudi bi nu ari mone. An syun semda wé kadit ye gato semda ben ne dom.
40Yefun Yesus mubot bur Galilea sa, yebris ge dik yo gato suki borbuk git ne ma mo Yefun Yesus. Suki ne git an kaim ibit or re. An do me Yefun Yesus sa, an tu an umsu mo Yefun Yesus gwem. An ndek mo Yefun Yesus do, "Yenggras, Nan imo yo, Nan nggiwa Nan ben ji ge kadit suki ré, subere ji yo fowa ku ye yi o nde."
41Yefun Yesus dakai jimnotku ye ne ndo nde, sane Yefun bes An syim, ete An syimtok ye ne sa, Yefun Yesus ki do, "Ji iwa, nan ge tom!"
42Yefun Yesus do ki or-i, ye ne ge-i, an kaim ndo satu re.
43Orge Yefun Yesus syokom ye ne do,
44"Nan mu nan nuk sukdu subot suk gato Ji ben ne nai ye yi daret nde. Nan mu nan kadum nan nggwa nai yesu gato ben suk mo Yefun Allah bi nu subere an watbot nan. An watbot nan, ete yesu ne ki do, sangge, nan ge it, sane yo nan gwat suge sato Musa ki ne ma tepsu suksom. Nan syo nai yesu ne gre mo bot subere ye jam do, nan ge it anare."
45Yefun Yesus da ki nai ye ne, sarewo ye ne mu nuk sukdu ne nai yé mwa mo peyo-peyo, subere yé mwa mone jam. Sane Yefun Yesus yo ku os wa An sok mo kampung bok yo mone nde, we yé mwa mone jam suk gato Yefun Yesus ben ne, ete yé mwa ne iwa ku An. Sane Yefun Yesus mu sem mo nden, mo pe gato yé yo mo nde. Sarewo yé mwa kadit pe bok ne sino ma meret An petok gat sor.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel