1Kam Sabat ne or, Maria gato bi nat mo Magdala, si Maria gato Yakobus bi im ne, si Salome, nggon ka gri ne mu so manik gato grik ndo ne, subere án ka gri gwat mu wa án ka gri sye mo Yefun Yesus mukri mo makwe.
2Sane kam Sabat or, bi kam Ari, bundugan, kam it sim, ete nggon ka gri ne mu mo makwe.
3Nggon ka gri ne kom mo os miten saresa, án ka gri ki mo yu do, "Je u anato bere ós men ka gri wa wop jok ne wé kadit jokwak syo ne?" An ka gri ndo nai yu sane, we jok ne sye ndo nde.
4Sarewo nggon ka gri ne mu kom motu, ete án ka gri sokme jokwak ne sa, án ka gri me do, jok gato ye grem kewa jokwak syo ne, yé wop jok sye ne wé kadit ne or re.
5Nggon ka gri ne sok mo jokwak mit sa, nggon ne me pa yemsok dik yo gato it san syu gato kwo. Pa yemsok ne kem mo jokwak mit tak de syim ge. Nggon ka gri ne gen mo pa ne.
6Pa yemsok ne ki nai nggon ne do, "Nin nyu nde. Ji jam do, nin meret Yefun Yesus ye Nazaret gato yé mban mo kwesukwin ne. An mbau re! An sun re! An yo more o nde. Nin dakai me nat gato yé grem An mone.
7Sane su ré nin mu kekro. Nin ki sukdu ré nai An bi pakon si Petrus do, 'Yefun Yesus mu nyim mo bur Galilea re. Bere nin mu sakanwa An motu, tepsu sukdu gato An ki nai nin mó re ne.' "
8Nggon ka gri ne tetet, án ka gri kwabom kro mo pa yemsok ne. Sane án ka gri syesyar kadit jokwak ne, án ka gri titi sor. Nggon ka gri ne yo nuk sukdu ne nai ye yi dom nde, we án ka gri nyu ndo nde.
9[Kam Ari nyotkwo, Yefun Yesus sun kadit sukkwop sa, ketke Yefun Yesus kadum An nggwa nai Maria gato bi nat mo Magdala. (Maria ré, suga nyim Yefun Yesus syun semda ge mufit wé kadit mom.)
10Sane Maria mu nuk sukdu subot suk gato bor mone napyo nai Yefun Yesus bi yesyim bok neya jam. Yé bok ne wo nderbot Yefun Yesus tó.
11Maria ki bi sukdu nai Yefun Yesus bi yesyim ne do, Yefun Yesus mbau satu re, ete Maria ku Yefun Yesus re, sarewo Yefun Yesus bi yesyim ré yo jammo sukdu ne nde.
12Or o kapyo tak Yefun Yesus kadum An nggwa nai An bi pakon ge we gato mubot os mo nden. Yefun Yesus mu ku ye we ne sa, Yefun Yesus kaim tara re.
13Pakon ge we ne satu mu kibot sukdu ne nai pakon deyi neya. Sarewo pakon ne yo onyar kem mo sukdu gato an we ki ne dom nde.
14Kapyo tak o, Yefun Yesus bi pakon ge musyu dik sop dik git sugit sino saresa, Yefun Yesus kadum An nggwa nai An bi pakon ne. Yefun Yesus ndantom An bi pakon ne do, "Nin yo onyar kem mo Ji nde wa suma ne? Ji sun kadit sukkwop re. Ji kadum Ji nggwa nai yetu ge bok yo, án dakai me su án gro re. Sarewo nin su krat wa yé ne bi sukdu-i wa suma ne?"
15Orete Yefun Yesus ki nai An bi pakon do, "Nin mu mo yewis mwa ne sino mo bur ré iwedewe. Nin mu ki sukdu subot os ndo gato Yefun Allah fro wa yetu subere yé ku os wa yé gum sok mo Yefun Allah bi rus-i.
16Ye to onyar kem mo Ji, eteyo yé ras an mo syur, bere an kem ndo to kapyo mato kapyo. Sarewo ye to bariwa sukdu ne, yo onyar kem mo Ji nde, bere Yefun Allah syo sukye nai ye ne mo bot gesyos.
17Ye gato onyar kem mo Ji ne, bere Ji syo suktinggi nai án subere án ben suk gato ben yé yeket. Bere án ben suk sato ré do, án ki suk su Ji gum wa án syun semda wé, ete bere án ki su a be gato án yo farkorbot nde.
18Kapre yé ne syimtok siri is kwis gato bi ri mó, ete kwis jau án, bere án yo kwop nde. Yé ne da siri is mut, da siri is kwe kri e suk yo sane, bere án yo kwop nde. Án do ak syim mo ye gato i yo, bere ye gato i ne ge kadit bi suki ne re."
19Yefun Yesus ki An bi sukdu nai An bi pakon, or Yefun Yesus it mu mo gu, ete Yefun Yesus kem tak Yefun Allah de syim ge subere Yefun Yesus si Yefun Allah, An we jowa suk mwa ne sino.
20Sane Yefun Yesus bi pakon mu ki sukdu subot os ndo gato Yefun Allah fro ne mo peyo-peyo. Yefun Yesus syo An bi suktinggi nai An bi pakon ne. Yefun Yesus yo misyar An bi pakon nde anato An bi pakon ben suk mwa gato ben nje yeket. Yefun Yesus bi pakon ben suk mwa gato ben nje yeket ne anato yé jam do, sukdu gato An bi pakon ki ne sangge anane.] [(16-9) Nggon ka gri ne mu ku Petrus si bi yesyim bok ne, orete an ka gri ki sukdu sap subot suk mwa gato pa yemsok ki nai án. (16-10) Orete Yefun Yesus syogat bi pakon ne mu ki sukdu subot os ndo gato Yefun kak wa men yetu ne. Yefun Yesus syogat pakon ne mu ki frekbot nje mo peyo-peyo kadit nobu nim sor kom mo nobu ket, subere yé jam os ndo gato án sibot subere Yefun nai án kadit sukye, ete án gum sok mo Yefun bi rus-i, subere án kem ndo to kapyo mato kapyo.]
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel