1Sane, ji bi nji, ji bi nyanggon, Yefun Allah dakai jimnotku men anato An yo ben suk su men tepsu sukibit gato men ben su An nde, wo An ben sukndo su men sor. Sane nin benbot suk gato ji ki ré et: Tepsu suga nyim yé gu suge kwop wa yé som Yefun su ne, su ré men bi men nggwa su mbau wa men som Yefun su et. Men werwa men bi men nggwa wa men ben Yefun bi suk-i tepsu An mit sor. Men som Yefun Allah su sangge it anane.
2Men ben men bi suk-i tepsu yetu mo bur ré ben bi suk-i ne o nde, wo men bi men nggwa mo Yefun Allah subere Yefun Allah win men bi sukjimnut-i su sukjimnut-i gato be o re. Sane bere men ku os wa men jam suk mwa gato tepsu Yefun Allah mit re, bere men jam suk gato ndo, bere men jam suk gato Yefun Allah iwa men ben ne, kwa yo gwet mo nde.
3Yefun Allah syo suktinggi nai ji dakai yi, sane ji ki nai nin sino sare do, nin bes nin nggwa kok teker eta nde, wo nin nutbot nin nggwa pare et. Nin onyar kem mo Yesus Kristus anato Yefun Allah syo suktinggi nai nin. Sane nin gedik-gedik nutbot nin nggwa pare tepsu pe gato nin onyar kem mo Yesus Kristus ne et.
4Men bes men nggwa kok nde, we men sino tepsu yetu kaim dik, men mitmo yu. Tepsu men dakai kaim, men syim mó e, men gro mó e, men gwes mó e ne ut mo men kaim, suk mwa neya mo men kaim ne mó re. Suk mwa gato ut mo men kaim ne yo ben bi suk-i tepsu yu nde, wo suk mwa gato ut mo men kaim ne ben bi suk-i tara kadit yu.
5Sane dom, men yé mwa gato sok mo Kristus bi rus-i anato tepsu yetu kaim dik. Sane men ge dik yo bes men nggwa kok wai kadit ge dik yo nde, we men gedik-gedik mitmo yu, men ut mo yu tepsu suk mwa mo yetu kaim ut mo yu ne. Men sino yedik, men sino sok mo rus dik.
6Men gedik-gedik ku bi suktinggi-i tara kadit yu re. Sane ge dik yo bes nggwa kok wai kadit ge dik yo o nde. Men gedik-gedik ku suktinggi tepsu pe gato Yefun Allah iwa syo nai men dakai yi ne. Sane men ben suk su suktinggi ne et. Ye gato ku suktinggi wa ki subot sukdu gato Yefun Allah tarubot an ne yo, an ki sukdu ne su an mit dik si an onyar dik tepsu suktinggi gato Yefun Allah Gen syo nai an ne sor.
7Ye gato ku suktinggi wa ben suk wa ós ye yi it yo, an ben su an mit dik si an onyar dik sor. Ye gato ku suktinggi wa duno nje it yo, an duno nje su an mit dik si an onyar dik sor.
8Ye gato ku suktinggi wa ki sukdu gato ndo wa tik ye yi mit wa ben suk gato ndo it yo, an ki sukdu ne su an mit dik si an onyar dik sor. Ye gato ku suktinggi wa syo suk nai ye gato yewa suk it yo, an syo suk mwa su an mit iwa sor. Ye gato ku suktinggi wa an tepsu yekwesu it yo, an jom nje, an ben an bi suk-i su an mit dik si an onyar dik sor. Ye gato ku suktinggi wa an dakai jimnotku ye yi gato ku sukye it yo, an ós ye ne su an mit iwa sor.
9Men ben kidar do, men bi sukjimnut sye kas subot nje, wo men mit-i tara re, bere siri re, wo men bi sukjimnut sye kas subot nje sisu sangge. Men bariket suk gato ibit. Men jom suk gato ndo ne pe sor.
10Men bi nggwa nai yu, men mewa yu tepsu men yedik. Men bes ye yi gum-i kok wai kadit men dakai bes men gum-i ne.
11Men ben Yefun Allah bi suk-i, men ben suk su men bambrai nde, wo men ben suk su men samok. Men jammo Yefun Allah Gen, ete men ben Yefun Allah bi suk-i su men mit iwa ne sor.
12Men kwabom kam mo Yefun Allah, ete men mit at mone. Men ku sukye yo, men misyar Yefun nde, wo men eswa sukye ne or kadit men. Men ki suk su Yefun Allah petok sor.
13Men ós Yefun Allah bi rus-i dogato yewa suk. Men kendo ye Kristen gato men jam nde ma si men sem mo men bi nu-i, men bambrai wa nde, wo men mit iwa sor.
14Men ndek mo Yefun Allah subere An ben sukndo su ye gato ben sukibit nai men. Sangge, men ndekwa Yefun Allah ben sukndo su ye ne. Men dufo mo ye ne nde.
15Ye to mit at mo suk gato ndo yo, men sino dom mit at su an et. Ye to wo yo, men si an wo sino dom.
16Men kem ndo su yu. Men bes men nggwa kok nde, wo men ben suk su ye gato gum wok mo bur ne dom. Men ben suk su yé mwa ne su men gro njep. Men bes men nggwa kok wai kadit ye yi mo suk gato men jam ne nde.
17Ye yo ben sukibit nai men it yo, men waii ben sukibit nai an satu o nde, wo men werwa men ben suk gato ndo nai ye ne sor. Men werwa men ben men bi suk-i subere yé mwa ne sino nut do, men ben suk mwa ne ndo sino.
18Men werwa men meret os yo sa u subere men si yé mwa ne sino kem ndo su yu sor. Men werwa mone sor kom mo pe gato men dakai bi suktinggi tut mó.
19Ji bi nji, ji bi nyanggon, ye yo ben sukibit ma nai men it yo, men waii ben sukibit mu nai ye ne satu o nde, wo men misyar Yefun Allah dakai maskwa ye ne sor, tepsu ye krom mo Yefun Allah bi sukdu do, "Bere Ji dakai sor anato maskwa nje tepsu sukibit gato án ben ne. Bere Ji anato syo sukye nai án tepsu sukibit gato án ben ne."
20Yetu ge dik yo ben sukibit ma nai men it yo, men waii ben sukibit nai ye ne satu o nde, wo men ben suk tepsu ye krom mo Yefun Allah bi sukdu do, "Ye gato nggau yeko ma wa gu men ne do on de it yo, men syo sugit nai an git. An do sosa it yo, men syo syur nai an da et." Men syo sugit si syur nai an yo, bere an jam nggwa mo sukibit gato an ben mone, bere an krer bot mbam gato ru tó mo an su, subere ye jam do, an jam nggwa ete kwet kadit os ibit anane.
21Sane men bi sukjimnut kas subot sukibit gato ye ben ma nai men ne sane sor men ben sukibit satu nde, wo men ben sukndo satu subere ye gato ben sukibit ne kwet o re.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel