Alkitab Mobile SABDA
[VER] : [ABUN]     [PL]  [PB] 
 <<  Wahyu 4 >> 

1Sukdu wa yé gato onyar kem mo Yefun Yesus mo nu ari bok ne, ji jam or sa, ben sato ji semda ete ji sokme nusyo mo gu kak re. Ye gato ji jam ki suk su ketke, gato saiye tepsu ye fuf dut, tepsu trompet ne, an ki do, "Nan ma more et. Ji kadum suk gato bere bor wari wa nan jam."

2Sugane Yefun Allah Gen pet mo ji. Orete ji me Yefun bi kursi mo gu. Ji me Yekwesu ge dik yo kem mo kursi ne.

3An nggren tepsu sukru we, ru er si ru kur, tepsu jok gato sugum sye bi warna. Bres dik yo ru nggi wairi wa kursi ne. Bres ne ru tepsu jok zamrud gato nggren.

4Kursi musyu we sop at yo o kem wairi wa Yekwesu gato gum kok wai ne bi kursi. Mo kursi mwa ne, yenggras gato gum kok ge musyu we sop at kem mó. Yenggras bok ne it san gato kwo ndo. Án bom yekwesu bi topi emas mo án su.

5Ji me nowarek, ji jam sukyo-sukyo pu. Ji jam nogu pu gato sye syesyar kadit kursi mo miten ne. Kak ru mufit ti mo kursi ne gwem. Kak ru mufit ne anato tepsu Yefun Allah Gen mufit gato ben Yefun Allah bi suk-i.

6Sane dom, ji me suk yo tepsu em mo kursi ne gwem. Em ne tepsu kaca gato rer ok tepsu syur gun gato ram nde. Yefun Allah bi pakwerut ge at mo gu ka sato suge ne mó. Suge at ne kem wairi wa Yefun bi kursi, ge dik yo mo kursi de gwem, ge dik yo o mo kursi de dari, ge dik yo o mo kursi de syim ge, ge dik yo o mo kursi de syim jam. Suge at ne gro gan mo án kaim ne sino, gro deyo mo án kaim de gwem si gro deyo o mo án kaim de dari ne sino.

7Suge doketke ne ka sato singa. Suge kedowe ka sato sapi ge ndi. Suge kedogri gro-i ka sato yetu gro-i. Suge kedoat ka sato ndam syap tu gato ok.

8Suge at ne sino í mumat mó. Suge at ne sino gro gan bot kaim ne sino, gro gan deyo mo i de nden si gro gan deyo o mo i de mit dom. Noru nombrak suge at ne yo not nde, án badek petok sare do, "Yefun ga kok wai ne, Yefun ga ndo wai ne, Nan gum kok wai 'dit men, Nan anato men bi Yekwesu ga nggi wai. Yefun ga ketke ne mó e, Yefun ga su ré mó e, Bere kam sari Nan mó o, Bere Nan mó o tó e."

9Suge at ne ba sukbadek wa bes Yefun gato kem mo kursi ne gum kok e, un Yefun e, ki ndo mo Yefun e ne. Suge at ne ba syek Yefun gato kem to kapyo mato kapyo ne sa,

10yenggras ge musyu we sop at bare nggwa mo An gato kem mo kursi ne gwem. Yenggras ne un Yefun gato kem to kapyo mato kapyo. Yenggras ne bare bi topi gato án bom tepsu yekwesu ne mo Yefun bi kursi de gwem, ete án badek su do,

11"Men bi Yekwesu ne e, Yefun gato jom men ne e, Nan sa, tep wa men bes Nan gum kok ne o, Men bes Nan gum sye ne o. Men bi Yekwesu ne e, Yefun gato jom men ne e, Nan sa, tep wa men un Nan gum ne o, Nan sa, tep wa ku suktinggi ne o. Men bes Nan gum kok a we, Men un Nan gum a we, Nan ut suk mwa ne sino o, Nan bi mas mo suk mwa ne sino o."



 <<  Wahyu 4 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel