1Domba Gan kak lilin gum domufit ne wé sa, suk mwa gato mo gu ne not re. Suk mwa mone yo ki sukdu kwa dik yo mo nde sane sor kom mo jam napyo or,
2ete ji sokme malaikat ge mufit ti mo Yefun Allah gwem. Malaikat ge mufit ne ku trompet sino, ge dik ku trompet bo dik subere án fuf bi trompet ne ba sye. Trompet ne ba sye tepsu ye fuf dut.
3Malaikat ge dik yo o mu mo meja gato ye grem suk wa ye som Yefun Allah su mone, ete an ti mo meja ne de. Malaikat ne jom sukbo emas. Malaikat ne ku suk gato ye gre ete i-bu basmi grik ndo ne mwa tepsu suksom wa ye som Yefun Allah su. Yé gato onyar kem mo Yefun, án ki suk su Yefun petok sor. Sukdu gato án ki nai Yefun Allah ne, malaikat gwat sukdu ne, ete syo nai Yefun sisu suksom gato grik ndo ne. Malaikat ne grem suksom si sukdu mwa gato yé ki nai Yefun ne mo meja gato ye gre suk wa som Yefun Allah su mone. Meja gane, ye nggo su emas ete ye grem mo Yefun bi kursi tak de gwem.
4Suk gato grik ne, ye syo bot git, ete i-bu gato basmi grik ndo it sisu sukdu gato yé gato onyar kem mo Yefun Yesus ki nai Yefun Allah ne sino. I-bu gato grik ndo it kadit sukbo mo malaikat syim mu kom mo Yefun Allah gwem. Yé gato onyar kem mo Yefun ki suk su Yefun ete sukdu gato án ki ne it mu kom mo Yefun Allah gwem dom.
5Orete malaikat gwat sukbo, ete nai bot kadit meja gato ye grem suk wa som Yefun Allah su ne. An bok bot mo sukbo mit, orete an am sukbo ne ges mo bur ré re. Sukbo ne ma rek mo bur ré sa, nogu pu e, sukyo-sukyo pu e, nowarek e, sui juwai bur ré e ne.
6Orete malaikat ge mufit gato jom trompet bo mufit ne fro wa fuf bi trompet bok ne ba.
7Malaikat dofutmo fuf bi trompet-i ba sa, yé yo am es gato krat sa jok tepsu nogi si bot fros su yetu dé ges mo bur ré re. Bur napyo bot git or re. Kweke mwa ne sino napyo bot git or re. Kadit kweke gri, ke dik bot git, wo ke we kem. Es kur mwa ne sino, bot git or re.
8Malaikat kedowe fuf bi trompet-i ba o sa, yé yo am suk yo ka sa banbo sye gato bot ru mone mu ngga mo sem. Sem ne napyo tepsu yetu dé mone or re.
9Suk gato kem mo sem ne napyo kwop or re. Kwem mwa ne mo sem napyo ibit or re. Kwem gri mo yo, dik yo ibit, we ndo tó.
10Malaikat kedogri fuf bi trompet-i ba o sa, bí sye dik yo ges kadit gu. Bí ne ru sye tepsu sukru sye. Bí ne ges mo syur napyo si syur nggrup napyo.
11Bí ne gum do Ndó. Sane syur napyo ndó, ete yetu mwa gato da syur gato ndó ne kwop or re.
12Malaikat kedoat fuf bi trompet-i ba o sa, suk yo gwa kam su ne pet det gri, det dik yo ibit re. Suk yo gwa aina digane dom. Suk yo gwa bí napyo digane dom re. Sane kam su e, aina e, bí e ne napyo te re. Nombrak napyo ndendu yut re, noru napyo ndendu yut re.
13Ji sokme saresa, ji jam ndam syap tu ge dik yo gato ok mo gu nim ne saiye do, "Sukye o, sukye o, sukye o, sukye ndo nde wa yetu gato kem mo bur. Bergan malaikat ge gri yo o fuf bi trompet-i ne ba yo, yetu mo bur ku sukye ndo nde!"
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel