Alkitab Mobile SABDA
[VER] : [ARALLE]     [PL]  [PB] 
 <<  1 Korintus 11 >> 

1Dahi tuhu'i pembabeku, sinnoa untuhu'iä' pembabena Kristus.

2Masannangngä', solasohong, anna kupudikoa' aka' si ungkalehai loloä' anna si untuhu'ikoa' yato pepaturu ang kupamating.

3Ampo' aha mesa ang pahallu kupakalehaingkoa': dianto Kristus ang ungkapalai ingkänna muane, muane ang ungkapalai bahinena anna Puang Alataala ang ungkapalai Kristus.

4Ponna muane ke unsapu'i bää'na naonge anna ma'sambayangngi bahtu' untula' Bahtakara Dehata yaling di pa'himpungang, ya' tau yato ang noa dai umpakeangka' Puang Yesus Kristus ang mangkapalai.

5Ampo' bahine nei', ponna daine' unsapu' bää'na naonge anna ma'sambayangngi bahtu' untula' Bahtakara Dehata yaling di pa'himpungang, ya' bahine yatoo dai umpakeangka' muanena ang mangkapalai. Bahine ang noa yatoo mepakasili sinnoa siang bahine ang dikulli' bää'na.

6Dahi ponna ke ahai bahine ang dai naaku unsapu' bää'na yaling di pa'himpungang, ya' dotanne' dikonting asang beluhä'na. Ampo' ke la masilii ke dikontingngi beluhä'na, bahtu' bää'na dikulli'i, ya' pahallu unsapu' bää'na.

7Muane nei' umpamatande Puang Alataala aka' dipapia sinnoa hupanna, dahi dai sika mala unsapu' bää'na ke ma'sambayangngi bahtu' untula' Bahtakara Dehata. Bahine nei' umpamatande muanena.

8Aka' muane ang uhuna dai sule yaling mai di bahine, ampo' bahine nei' dipapia di hao mai di muane.

9Dia tuke' muane dai dipapia aka' dioatee anna malai undului bahine, ampo' bahineete' ang dipapia anna malai undului muane.

10Dianto bahine anna pahallui unsapu' bää'na, ang la napotanda dioatee tuhu'-tuhu'ang pano di muanena, anna malai nainsang malaeka' ang mangngita.

11Ampo' yaling di kasikenteanna petauanna Dehata, muane umpahallu bahine anna bahine umpahallu muane.

12Aka' sinnoanna bahine ang uhuna dipapia yaling mai di muane, noa tunne' muane sohong yaling mai di bahine. Anna ingkänna ang aha sule asang yaho mai di Puang Alataala.

13Pihki'i: sihatandaka ponna bahine ma'sambayang yaling di pa'himpungang ke dai unsapu' bää'na?

14Situhu' kabiasaanta dai sihatang ponna muane umpakalambe' beluhä'na.

15Ampo' ponna bahine, ya' diangka' mahasa ke kalambe'i beluhä'na. Aka' yato beluhä'na ang kalambe' mendahi kamalekeanna, aka' inang dibea pano di bahine ang la mendahi petutu' bää'na.

16Ponna ke ahai ang pemala sikalla-kalla aka' yato inde ang kutula' dinne, ya' pehingngii: dianto indee kabiasaang ang si kituhu'i, noa tunne' ingkänna jumaa'na Puang Alataala ang senga'.

17Mane ahai inde ang pemala kutula'ingkoa' mating, anna yaling inde di kaha-kaha dakoa' mala kupudi. Aka' yaling are' di pa'himpungammua' bilang umbahae' are' kakarakeang andana kamapiaang.

18Uhuna ang kupelele, naoate are' ke ma'allo bumokoa' sibaha-baha, ya' si tibahe-bahekoa', anna inde kaheba kusanga aha ang tahpa'.

19Umbai umbahe-bahea' kamesaammu anna malai tuhtuang landa' mennakoa' ang handang maroho!

20Naonge anna ma'himpungkoa' ungngande roti anna ungngenu' angkoro' daia' si umpihki' bahtuanna kamateanna Puang Yesus.

21Aka' naoate are' aha mai'di di alla'mu ang tahhi' ungngande yato andeanna anna ungngenu' yato angkoro' lambi' baha' boho anna malango. Ampo' solamune' piha ang kakuhangang, ya' manono nei' anna mahähäng.

22Tahpa'raka inde ang kupelele? Darakaa' aha dasammu ang la malaa' ungngongei mande anna menu'? Ampo' umpakasilikoa' to pemase-mase di alla'-alla'mu anna dakoa' umpakeangka' yato kasahaniang. Aka ang la mala kutula' mating? Malaraka kupudi'koa'? Inang dai mala!

23Halimokoa' kupaturu bahtuanna aka suhunna anna mandei anna menu'i tau sibaha-baha, dianto ang la mampakalehaingkea' kamateanna Puang Yesus. Anna yato ang hali kutula' mating puha kutahimbo yaho mai di Kalaena Dehata: Doneto yato di bengi naonge anna dibalu'i Puang Yesus, ya' ungngalang roti

24anna ma'kuhhu'sumanga'i dai' di Puang Alataala, mane nabika-bikai anna ma'karai pano di pahsikolana naoatee, "Inde roti dianto bätäng kalaeku ang kubeho nasulängngikoa'. Babeia' indee anna malaä' ungkalehai lolo."

25Noa tunne' puhanna sika mande, ungngalang enu'ang punno angkoro' Puang Yesus anna naoaitee, "Ihsinna inde enu'ang dianto pa'dandiang bakahunna Puang Alataala, ang la kupasundung ungngolai hahaku. Babeia' indee anna malaä' ungkalehai lolo ke ungngenu' bumia'."

26Dahi ponna ke tapanoai ungngande yato roti anna ungngenu' yato angkoro', ya' tapepainsamminto disanga kamateanna Puang Yesus lambi' kasuleanna sumule.

27Dianto anna kuoaite mating: tau ang dai sihatang pembabena, sinnoa ang mane hali kutula' langngena', lella' ungngande inde rotinna Dehata anna ungngenu' inde angkoro'na, ya' salaetee', aka' sihapanne' dai umpakeangka' bätäng kalaena sibaha hahana Puang Yesus.

28Dianto anna pahallukoa' umpahehsa pembabe kalaemu dolu, mane malakoa' ungngande yato roti anna ungngenu' yato angkoro'.

29Aka' tau ang ungngande yato roti anna ungngenu' yato angkoro' sitonda pembabe ang dai sihatang, la natahungkung Puang Alataala, aka' dai sika umpakeangka' bätäng kalaena Puang Yesus Kristus.

30Dianto anna ahai di alla'-alla'mu ang makorong anna malamma kalaena, anna aha piha solamu ang mateng.

31Ampo' ponna ke tapahehsai dolu pembabeta, ya' daingkea' la natahungkung Puang Alataala.

32Aka' nasuhung anna natahungkungngingkea' noa, dianto nakambahoingkea' anna malai daingkea' la natahungkung sibaha to lino ang dai ungnginsang Dehata.

33Dahi, solasohong, ke ma'himpung bumokoa' ungngande yato roti anna angkoro' ang mendahi pengkakalehaang kamateanna Puang Yesus, ya' siempeikoa' mesa anna mesa, mane ungngandeia' sibaha-baha.

34Ponna ke ahai tau ang manono, ya' dotanne' mande dolu di dasanna anna malai dai ditahungkung aka' sala pembabena yaling di pa'himpungang. Anna didionane' yato kaha-kaha ang senga', ya' lambi'kä' mating mane kuäto'i.



 <<  1 Korintus 11 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel