Alkitab Mobile SABDA
[VER] : [ARALLE]     [PL]  [PB] 
 <<  1 Korintus 14 >> 

1Dahi, solasohong, pahallu tapengkabela-belai ungkalemui tau senga'. Anna mahasa toi ke tapemalai yato kakuasaang ang nabeaingkea' Inaha Masero, londonang kakuasaang untula' pangngelo'na Puang Alataala.

2Aka' ponna mesa tau ma'kuasa ma'kara yaling di ma'kahupa-hupa basa ang nabea Inaha Masero, ya' tadia hupatau ang si napa'karai, ampo' Puang Alataalaetee'. Yato solana ang nasibahaing dai si nainsang aka' ma'kara ang dai si napähäng hupatau, situhu' ang naoa Inaha Masero tama di inahanna.

3Ampo' yatone' tau ang ma'kuasa untula' pangngelo'na Puang Alataala, ma'tula' panone' di hupatau. Karanna umpamatoto' anna umpasumanga' inahanna solana sibaha napakahanga.

4Yato tau ang ma'tula' yaling di ma'kahupa-hupa basa ang nabea Inaha Masero umpamatoto' inahanna toboe', ampo' yatone' tau ang untula' pangngelo'na Puang Alataala umpamatoto'ne' inahanna solana ang tihimpung.

5Ke la malai anna ingkämmuia' la ma'kuasa ma'tula' yaling di ma'kahupa-hupa basa. Ampo' mapia puha nei' ke umbelai untula' pangngelo'na Puang Alataala. Aka' tau ang untula' pangngelo'na Puang Alataala kekuna puha nei' pano di jumaa' andana tau ang ma'tula' yaling di ma'kahupa-hupa basa. Supung ke ahai ang la mala umparende karanna tama di basa solana lambi' sika napähäng, anna malai umpamatoto' inahanna yato tau ang manghingngi.

6Oa' solasohong, ke la hapangannai anna tamaä' di pa'himpungammu mane ma'karaä' umpake basa ang daia' ungnginsang umpebahtuang, ya' la kekunaraka pano di dioa'? Ampo' ponna ke la kupakalesoingkoa' mating pahtuyunna Puang Alataala, bahtu' untula'ä' Bahtakara Dehata ang dake' ungnginsang, bahtu' untula'ä' pangngelo'na Puang Alataala, bahtu' kupatururakakoa', ya' inang la kekuna si'da mating.

7Hapanganna poni-poniang, noanna suling anna katapi, ponna dai diponi mahasa, ya' dai la nainsang tau ang manghingngi naoatee penaniang aka yatoo.

8Bahtu' hapanganna terompe', ponna dibuhhu'i untambai tantara umpasadiai kalaena la ma'tolla', ampo' sadibuhhu'inna, ya' dai la aha tantara ang sadia la mao ma'tolla'.

9Noa tumokoa' dio, solasohong, ponna ma'tula'koa' umpake basa ang dai nainsang tau senga', umbane' noa la napähäng yato ang untula'? La sinnoakoa' tau ang umpa'karai supu pepahi.

10Mai'di basa yaling inde di lino anna ingkänna yatoo kebahtuang asang.

11Ampo' ponna ke la ahai ang mampa'karaiä' anna dai kuinsang kupebahtuang, ya' la kupasihapang to sule di lau' mai di bohto senga'. Noa tunne' pano di kalaena, la sihapangngä' to sule ponna ke kupanoai.

12Noa tumokoa' dio. Aka' umpemalaa' umpake yato kakuasaang ang nabeakoa' Inaha Masero, ya' palaui dai' di Puang Alataala anna ke la malai anna nabeakoa' ang la handang napahallu jumaa'.

13Dianto anna kuoaitee: menna-menna ang si ma'tula' yaling di mesa basa ang nabea Inaha Masero, ya' la mahasa ke napalaui dai' di Puang Alataala anna nabea toinne' kakuasaang mamparende tama di basa ang la mala napähäng solana.

14Aka' ponna ke ma'sambayangngä' yaling di mesa basa ang nabeaä' Inaha Masero, ya' inahangku ang ma'sambayang, ampo' daine' aha aka ang kupihki'.

15Dahi aka ang la sihatang tababe? Mahasa ke ma'sambayangngingkea' yaling di inahanta umpake basa ang nabeaingkea' Inaha Masero, anna ma'sambayang toingkea' nei' umpake basa ang la napähäng tau senga'. La menaniingkea' yaling di inahanta umpudi Puang Alataala umpake basa ang nabeaingkea' Inaha Masero, anna menani toingkea'nei' umpudi Puang Alataala umpake basa ang la napähäng tau senga'.

16Aka' ponna ke umpudii Puang Alataala yaling di basa senga' ang nabeaingkea' Inaha Masero, ya' dai la nainsang solamu napebahtuang lambi' dai mala mengngio naoate, "Aming."

17Moinnakato anna mahasai yato pampudianta ma'kuhhu'sumanga' dai' di Puang Alataala, ampo' dai la umpamatoto' inahanna tau senga'.

18Ma'kuhhu'sumanga'ä' dai' di Puang Alataala aka' didiona yato tula' yaling di ma'kahupa-hupa basa ang mebea Inaha Masero, ya' mala kupanoa la'bi puha nei' andana ingkämmua'.

19Ampo' ke ma'himpung bumi tau, ya' si pemala puhaä'ne' ma'tula' moi lima supu kara ke diang ang la napebahtuang solaku, andana sampulo sa'bunna yaling di basa senga' ang dai napähäng.

20Oa' solasohong, didiona membabe karake, kuhannuang la sinnoakoa' änä' ang dake' nainsang nababe. Ampo' didionane' ma'pihki', ya' daa umpa'pihki' lolo sinnoa pihki'na änä', ampo' diare' pa'pihki' tobaha'koa'.

21Anna yaling di Suha' Masero aha tiuki', "Naoate Puang Alataala, 'La kupa'karai petauangku umpake basana to sule ang dai diinsang, ampo' moinnakato noa, ya' dai la sika naaku umpehingngii bahtakarangku.'"

22Dahi, ke ma'karai tau yaling di basa senga' ang mebea Inaha Masero, ya' yato karanta mendahi tanda kakuasaanna Dehata pano di tau ang dake' umpetahpa' Puang Yesus, tadia pano di tau ang inang mampetahpa'mi. Ampo' ponna tau ke untula'i pangngelo'na Puang Alataala, ya' yato karanta mendahi tanda kakuasaanna Dehata pano di tau ang inang umpetahpa'mi Puang Yesus, tadia to tamampetahpa'.

23Hapanganna ke ma'himpung bumokoa' anna ahai to sule yato di pa'himpungammu ang tadia to Sahani, bahtu' ang dake' ungnginsang Bahtakara Dehata, anna napahandu' asammi tau ma'kara yaling di ma'kahupa-hupa basa, ya' aka la naoa yato to sule? Tantu anna la nasangakoa' to tahta'.

24Ampo' ke untula'koa' pangngelo'na Puang Alataala, anna ahai sule tau ang dai mampetahpa', bahtu' tau ang dake' ungnginsang Bahtakara Dehata, ya' la tahpa nainsang tama di inahanna naoatee, "to madosaä'," ke nahingnging yato ang untula'.

25Lambi' ingkänna ang tibuni yaling di inahanna la landa' pole'. Katämpä'anna la mengkuntu' anna menombai dai' di Puang Alataala anna naoaitee, "Tahpa'etee'. Inang di alla'-alla'mua' Puang Alataala!"

26Oa' solasohong, la tapihki' kalemba'anna ingkänna yatoo. Ponna ke ma'himpungkoa' la menomba, ingkänna tau aha baheanna: dianto aha piha la menani, aha piha la mampakuhu, aha piha la untula' pangngelo'na Puang Alataala, aha piha la ma'tula' yaling di ma'kahupa-hupa basa ang sule yaho mai di Inaha Masero, aha piha la mamparende yato aka ang natula' anna malai napähäng ingkänna tau. Ampo' ingkänna ang umbabe pahallu kekuna yaling umpamatoto' inahanna solamu.

27Ponna ke ahai ang la ma'tula' yaling di ma'kahupa-hupa basa ang sule yaho mai di Inaha Masero, ya' dotanne' derua bahtu' tallu supu ang la mampanoa. Anna dai sika mala napihsangngi ma'tula', ampo' pahallu sibala'-bala'. Dia tuke' pahallu la aha tau ang ma'kuasa umparende yato tula'na tama di basa ang napähäng tau.

28Ponna ke dai aha ang ma'kuasa umparende yato tula', ya' yato ingkänna tau ang ma'kuasa ma'tula' yaling di ma'kahupa-hupa basa pahallu mahtang yato di pa'himpungang, supung mala sika ma'tula' dai' di Puang Alataala yaling di inahanna.

29Didionane' tau ang ma'kuasa untula' pangngelo'na Puang Alataala, ya' noa toi dotanne' derua bahtu' tallu supu ang la mampanoa, lella' napehingngii tau senga' ang la mampahehsa tula'na naoatee sule si'daraka yaho mai di Puang Alataala, daraka.

30Ponna ke ahai ang menge ma'tula', mane ahai tau ang mengeke' mohko' ang nabea Puang Alataala kara, ya' yato ang menge ma'kara pahallu naboli anna malai yato solana ke'de' toe' ma'tula'.

31Ponna ke la umpanoaia', ya' mala asangkoa' sibala'-bala' untula' pangngelo'na Puang Alataala lambi' ingkämmua' untahimbo pepaturu anna ingkänna inahammua' dipamatoto' asang.

32Tau ang untula' pangngelo'na Puang Alataala mala ungkuasai kalaena; mala ma'kara, mala toi naboli ma'kara situhu' inaha kalaena.

33Aka' pangngelo'na Puang Alataala ke tiäto' mapiai ingkänna aka-aka ke ma'himpung bumi tau lella' menomba. Aka' dai nakärä'i kaha-kaha ang dai tiäto'. Sinnoa lalanna ang si napake ingkänna jumaa' senga',

34bahine pahallu mahtang lella' tau menomba. Dai sika mala ma'tula', ampo' pahallu mohko' ma'pehingngi sinnoa ang tiuki' yaling di Atohanna Musa.

35Ponna ke sika pemalai ungnginsang kaha-kaha ang dake' maleso, ya' pahallu sika mekutana pano di muanena di hao di dasanna, aka' dai sihatang la napanoa lolo ma'tula' yaling di pa'himpunganna to penomba.

36Unsangarakaa'to ungngoatee yato Bahtakaranna Puang Alataala sule yaling mai di alla'mua'? Bahtu' supung dioa' ang hali mantahimbo?

37Ponna ke ahai di alla'mu ang unsanga kalaena nabi, bahtu' tau ang mai'di kakuasaanna yaho mai di Inaha Masero, ya' tantunte' anna la nainsangngi naoatee indee ang menge kutula' pahentaete' yaho mai di Kalaena Dehata.

38Ampo' ponna ke ahai ang dai untahimbo inde karangku, ya' daa untahimboia' yato tau.

39Dahi, solasohong, sihatang ke la pemalakoa' untula' pangngelo'na Puang Alataala, ampo' daa ullahang tau ang si ma'tula' yaling di ma'kahupa-hupa basa yaho mai di Inaha Masero.

40Kalehaii: ingkänna ang dibabe pahallu untuhu'i lalang ang la sihatang anna tiäto' mapia.



 <<  1 Korintus 14 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel