1Didiona yato doi' ang menge unghimpungnging solata ang memase-mase yaho di Yerusalem, ya' kupalau anna la umbabei sinnoa ang kupahentaing ingkänna jumaa' di hao di Galatia.
2Ke lambi' bumi allo Mingku, ya' inang pasenga'mi piha doi'mu yaling di dasammu, situhu' ang sihatang sahomu. Be'beii lambi' kasuleangku anna dangnga' pahallu la unghimpung ke donentoo.
3Ke lambi'mä' mating, ya' pilleii sangngaka-sangngaka solamu ang umpetahpa'. Aka' la kusuo dai' sibaha la kubea suha' ang la nabaha.
4Anna ke unsangai la mahasa ke mao touä' koo, ya' la kalaeku mamposolai dai'.
5Puhake' kuolai Makedonia, mane matingngä', aka' pemalaä' ungngolai Makedonia dolu.
6Ke la malai la masaeä' diting, umbai la lambi' puha tempo madinging. Anna ke donentoo malakoa' unduluiä' le'ba' pano di umba-umba ang la kuongei.
7Aka' dai kuaku la lempäng kale sämpäi', dahi ke napabeiä' Dehata, ya' la masaeä' diting.
8Ampo' la donekä' dolu di Bohto Efesus lambi' allo pa'rame-rameang Pentakosta,
9aka' mai'dike' ang la mala kubabe dinne, moinnakato anna aha toi ang mampa'baliä'.
10Ke matimmi ta Timotius, ya' potosule manahpai anna dai la malaya' sibahakoa', aka' sinnoa siang pengkähängangki' ang kibabe aka' Dehata.
11Daa umpabeii la aha ang dai mampakeangka'. Duluii ke la mengkalaong sumule mai di kodi' anna malai masahke yaling di pellaoanna. Kuempei dinne, sibahaang to Efesus ang mampetahpa'.
12Didionane' ta Apolos, kupengkabela-belai anna malai mating sibaha-baha to mampetahpa' ang senga' natammuikoa', ampo' dake' naaku. Ampo' ponna ke la halii, ya' la mating.
13Dakaii anna pamatoto'i kapampetahpa'ammu; pengkabahanii anna matohokoa'.
14Ingkänna ang umbabea', babe asangngi sitonda pa'kalemu.
15Ungnginsangnga' ungngoatee Stefanus sanghapu ang handang dolu mendahi to Sahani di Poropensi Akhaya anna puha sika umbeho katuhoanna dai' di Dehata undului to pentindo'na. Dahi kupalau, solasohong,
16la tuhu'-tuhu'angkoa' pano inde di tau, sibaha tau senga' ang nasibahaing umpengkähängnging Dehata.
17Masannang liuä' aka' lambi'mi sule ta Stefanus, ta Fortunatus anna ta Akhaikus. Sika kupasihapang bala'mua' ang manduluiä' dinne.
18Sika umpamatoho inahangku, sinnoa naonge sika umpamatoho toine' inahammua' dolu. Tau ang noa indee sihatang dipakeangka'.
19Salama'na mating ingkänna jumaa' dinne di Poropensi Asia. Noa tunne' ta Akwila anna ta Priskila sibaha to mampetahpa' ang si ma'himpung yato di dasanna umpapebaha salama'na mating.
20To mampetahpa' senga' ang kusibahaing dinne umpapebaha toe' salama'na mating. Sisalama'koa' mesa anna mesa mengkalao di inahammu ke si ma'himpung bumokoa'.
21Salama'ku mating. (Inde salama'ku, teyye kalaeku ang mangnguki'.) Paulus.
22Tau ang dai ungkalemui Puang Yesus, la ditändo nei'. Maio, Puang!
23Kuhannuang namana'koa' Puang Yesus kamasahkeang!
24Kukalemui asangkoa' yaling di Kristus Yesus. Samantoo.
<< 1 Korintus 16 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel