1Pano di Timotius, änä'ku ang si'danna yaling di kapampetahpa'ang. Hao mai di Paulus, ang napillei Puang Alataala To Pepasalama'ta anna Kristus Yesus Panghannuanta la mendahi rasulna Kristus Yesus. Ke la malai ullambi'o behe, pa'kalemu anna kamasahkeang yaho mai di Ambe' Puang Alataala anna Kristus Yesus, To Pepasalama'ta.
2(1:1)
3Kupemala anna malai tontongngo tohho diting di Efesus, sinnoa ang puha kutula'ingko naonge maoä' pano di Poropensi Makedonia, aka' diting di Efesus mai'di tau ang umbaha pepakuhu salao-laona. Dianto ang la pahallu ullahang anna dai napanoa lolo.
4Pa'karaii anna malai dai sika umpehingngii supu tohodolu kalosengang anna ma'nene lolo ang si umpakende' kasiba'di-ba'diang. Aka' indee dai aha kasilombunganna yaling di pahtuyunna Puang Alataala pano di kita' ang supung mala diinsang ke mampetahpa'i tau dai'.
5Inde pahtuyungku anna malai sikalemu-lemui tau umpake inaha ang masero anna mampetahpa' si'da-si'da.
6Ampo' inang ahang sangngaka-sangngaka tau ang dang mantuhu'i, nasuhung si ma'tula' tomande' ang dai aha kunanna lambi' sähsä' lalammi nei'.
7Pemala la sika mendahi to pampakuhu ada' Yahudi, ampo' dasiang sika nainsang bahtuanna yato ang napepakuhuing.
8Tainsammi yato Atohanna Musa mapia ahsala' dipembabe manahpaing.
9Pahallu dipengkakalehai: ingkänna atohang tadia pano di to maroho inaha, ampo' pano di tau ang untehkai bahtu' umpa'bali atohang, to ungkebo'i pa'elo'na Puang Alataala bahtu' to madosa, to taungkahea' Dehata ampo' untuhu'i supu elo'na toboe'; to umpatei tobaha'na, to papateang senga';
10to sikamaho-mahoi ang dipemalii, noa muane anna bahine, noa muane anna muane, noa toi bahine anna bahine; to umbalu' tau mendahi sabua', to pa'loseng-loseng bahtu' to saboä anna ingkänna ang dai situhu' pepakuhu ang tahpa'.
11Inde pepakuhu situhu' Kaheba Mapia ang umpamaleso kamatandeanna Puang Alataala. Puhang kutahimbo indee yaho mai di Puang Alataala, ang sihatang dipudi, anna malai kupopepainsangnging.
12Ma'kuhhu'sumanga'ä' dai' di Kristus Yesus, Dehatanta, ang puha mambeaä' kamatohoang yaling di pengkähängangku aka' naangka'ä' sihatang mendahi sabua'na.
13Napanoa moinnakato dolu anna puhai kutula' tahuhu sanganna sibaha kudahha to pentindo'na anna maromi'ä' pakambeang. Ampo' nakalemuiä' Puang Alataala aka' dakä' mampetahpa' donetoo, dahi dai kuinsang aka ang kubabe.
14Napunnoiä' pa'kalemunna ang mepasalama' nasuhung malaä' mampetahpa' anna ungkalemuiä' para-parangku hupatau. Mala asangngingkea' membabe noa aka' ma'kamesaingkea' yaling di Kristus Yesus.
15Tula' indee tahpa' si'da-si'da anna sihatang ditahimbo manahpa, diantoo: Kristus Yesus mentama di lino anna malai umpasalama' to madosa, anna kodi'mito indee mesa ang handang madosa.
16Ampo' nakalemuiä' Puang Alataala anna malai napalanda' Kristus Yesus umba noa ingkänna kasa'bara'anna aka' napasalama'ä'. Anna aka' to handang madosaä', malaä' mendahi pohapangang pano di ingkänna tau ang la mampetahpa' dai' lambi' untahimbo katuhoang sapano-panona.
17Puang Alataala, Tomaraya ang tontong aha, pahallu dipamatande anna dipudi lolo aka' Dianto supu ang tontong sapano-panona, dai mala mate anna dai tandaang. Aming.
18O änä'ku Timotius, pengkähängang indee kupamatingngingko situhu' karanna Puang Alataala ang puha natula' umpake nabinna yaling di jumaa' didiomu. Pahallu la umpake inde kara sinnoa pa'dang yaling di pa'tolla'ang kamapiaang.
19Dahi pa'tolla'o mentoke di kapampetahpa'ang anna di inaha bahahsi. Aka' inang ahang ang dai mampentokei lambi' pa'da kapampetahpa'anna sinnoa kahpala' ang tallang tama di le'bo'.
20Sinnoa ta Himeneus anna ta Aleksander ang puha kubeho pano di kakuasaanna Pongkahana setang anna malai dai untula' tahuhu lolo Puang Alataala yaling di pampakuhu salao-laona.
<< 1 Timotius 1 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel