Alkitab Mobile SABDA
[VER] : [ARALLE]     [PL]  [PB] 
 <<  2 Korintus 11 >> 

1Oa' solasohong, kalemuiä' sa'bara'koa' kupatulu'ke' sai'di' inde karangku umpudi kalaeku, ang umbai unsangaa' karanna to maho.

2Keaha'ä' situhu' kakeaha'anna Puang Alataala ke ahai ang untehtekoa' umpellei Puang Yesus Kristus. Aka' kodi'mitoo ang handang dolu umpaturukoa' mampetahpa' pano, anna ang kupemala dianto la tontongkoa' mampetahpa'. Malakoa' dipasihapang änä' bahine ang puha ma'dandi la siala mesa muane. Anna Kristusmitoo mala dipasihapang muane ang la unsialaingnga'.

3Ampo' malaya'ä' dinoa, daa-daa la aha ang mambulitu'koa' lambi' damokoa' umpatontong kapampetahpa'ammu sibaha sangkalebu inahammu. Sinnoa Hawa dolu ang nasändä'i ile kamba' malunä' karanna, ya' noa tunne' si aha tau ang pemalakoa' nasändä'i natehte umpellei yato kapampetahpa'ammu pano di Kristus.

4Puhamokoa' kipaturu didiona Puang Yesus anna umpehingngii yato pepaturungki' lambi' untahimbokoa' Inaha Masero. Ampo' puhai yatoo, umpabeirea' dio are' tau senga' mampaturukoa' didiona Yesus ang senga'. Dinoa sadiamokoa' are' umpehingngii pepaturunna anna untahimbokoa' inaha senga'!

5Ampo' dä' ungngangka' kalaeku madihoi'ang andana inde solamu ang unsanga kalaena "pesuo tehtongang."

6Moinnakato anna dä' manähäng ma'kara, ampo' datouä'ne' to maho. Kuinsang koo pepaturu ang tahpa'. Puhakoa' kipamaleso loloing inde kaha-kaha yaling di ma'kahupa-hupa lalang.

7Naonge anna kupainsangngikoa' Kaheba Mapia dolu, dä' aha malau saho moi poro la sai'di'. Kupamahempo' katuhoangku anna malakoa' diängkä' di hoi' mai di dosammu. Salarakakä' aka' dä' umpalau saho di hao mai di dioa'?

8Naonge anna ditingngä' di bohtomu, ya' to mampetahpa' di bohto senga' ang mampapebahaingkä' doi'. Mala dioatee sika huki nei' anna mala toukoa' dio kupainsangngi Kaheba Mapia.

9Donetoo anna ahai kapahalluangku, ya' dakoa' kupalaui. Aka' sule solasohonta di hao mai di Makedonia nabahaingkä' doi' ang umpasundung kapahalluangku. Mengkalao dolu dai aha si kupalau aka-aka di dioa'. Noa toi di allo ang la sule dai aha ang la kupalau.

10Indee tula'ku ang kupokale'de dä' aha mala mansängkäi moi menna di ingkänna Poropensi Akhaya, aka' ahana inang tahpa' sinnoa tahpa'na pa'karanna Kristus.

11Aka anna ma'tula'ä' noa indee? Umbai unsangaa' dakoa' kukalemui, i? Kukalemui liukoa', naitaä' Puang Alataala.

12Dahi la kupatulu' kabiasaangku, dianto dai la kupalau mating saho, anna yato tau dai sika mala umpudi kalaenaii naoatee sinnoa siang pembabena anna pembabeki'.

13Tau ang noa yatoo dianto rasul ang ma'loseng-loseng. Sika mengkähäng di alla'-alla'mua' sihapang rasulna si'da Kristus, ampo' setonganna to pa'bulitu'!

14Ampo' daingkea' pahallu pusa' napobua' yato pembabenaii, aka' moi Pongkahana setang mala toe' umpasenga' hupanna anna nasangai tau malaeka' ang umbaha kamabayaang.

15Dahi daingkea' pahallu pusa' ponna sabua'na Pongkahana setang umbuni pembabe karakenaii anna kamba' membabe mapiai boheng sabua'na Dehata. Katämpä'anna sika la ditahungkung situhu' pembabena.

16Sinnoa ang kutula' langngena', moinnakato anna sihapang mentomahoä' dinoa, ya' pabeiä' untula' sämpäi' yato ang kupokale'de. Daumpihki'ia' ungngoatee to maho si'daä', hapang ke la ahai tula'ku ang mentomaho, ampo' pabeiä' ma'tula' noa.

17Ke umpudiä' kalaeku noa indee, ya' kupanoa sihapang to maho, dai sihapang pesuona Dehata.

18Mai'di tau ang si umpudi kalaena untula' yato ingkänna ang nakähäng mentolinona, ya' noa tunto koo umpudiä' kalaeku.

19Kupanoa aka' unsangakoa' kalaemu manähäng lambi' si umpehingngikoa' to maho!

20Ponna ke ahai to pambahanang ang mamposabua'koa', ya' sika untahimbo. Anna ponna ke ahai ang mambulitu'koa' bahtu' napabokoikoa', ya' umpabei tomande' napanoa. Noa tunne' tau ang ungngangka'-angka' kalaena umpabei tomande' natampilingkoa'.

21Unsangarakaa' la kuposili aka' daang bahani untindo' pembabena yato to ungngangka'-angka' kalaena diting? Ampo' ponna ke sika umpudii kalaena, ya' la mengkabahaniä' umpudi touä' kodi' kalaeku. (Kalehaiia', mengeä' ma'tula' sihapang to maho.)

22Si unsanga are' kalaena to Ibrani. Ya' noa tunto koo. Si unsanga are' kalaena to Yahudi. Ya' noa tunto koo. Si unsanga are' kalaena peänä'anna Abraham? Ya' noa tunto koo.

23Si unsanga are' kalaena to pengkähänna Kristus. Ya' la'bi puhaä' kodi' andanaii. (Mengeä' ma'tula' sihapangngä' to sala-salaang.) Inang sika kutondongngete' yaling di pengkähängangku. Pemmai'diä' ditahungkung la'bi andanaii! Pemmai'diä' dipohetong la'bi andanaii! Pemmai'diä' sai'di' tala mate.

24Pellimamä' natahungkung to Yahudi. Si napohetongngä' pentallumpulo kamehsa, situhu' kabiasaanna.

25Pentallung natahungkungngä' to Roma. Si napohetongngä'. Pihsang tempo naleboä' tau mai'di, nasaleba'i batu, pemalaä' sika napatei. Pentallung kahpala' ang kuongei limmi' tama di le'bo'. Pihsang tempo molangiä' di le'bo' sangngallo sambengi aka' limmi' kahpala'ku.

26Yaling di pellaoangku pemmai'di kuoloi ang mehea'-hea', sinnoanna mala'bu', to bokoti, napakauho-uhoä' noa to Yahudi, noa ang tadia to Yahudi. Kuoloi ang mehea'-hea' yaling di bohto, pano di alla' kalane, yaling di le'bo'. Kuoloi ang mehea'-hea' di hao mai di tau ang kamba' unsanga kalaena to mampetahpa', ampo' setonganna tadia.

27Si untanangngä' sikungku mengkähäng. Pemmai'di dä' hali hahe, dä' hali menu' bahtu' mande. Pemmai'diä' manono, madinging anna dai kanna' kaya'ku.

28Diakantoo anna matingngi durungangku umpihki' lolo ingkänna jumaa'.

29Ponna matingngi inahanna solaku aka' malamma kapampetahpa'anna, ya' matingngi tou ko inahangku. Ponna ke ahai ang manaho tama di dosa, ya' mapi'di' liu inahangku.

30Ponna ke la umpudiä' kalaeku, ya' supung yaling untula' kamalammaangku.

31Yato ingkänna ang mane kutula', tahpa' asang, dä' loseng. Puang Alataala, Ambena Puang Yesus ang mansa'bii. Pudii sapano-panona!

32Naonge anna di haoä' di Damsyik di tempona Tomaraya Aretas, ya' pemalaä' napatei Tuambahsa'. Lambi' unsuo änä' buana undakai baba hala bohto anna malaä' nasahka.

33Ampo' naduluiä' solaku. Sika napatuhungngä' yaho mai di mesa pengngollengang yaho di hala bohto, napatamaä' di mesa kalahohäng lambi' malaä' lahpa' di hao mai diii.



 <<  2 Korintus 11 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel