Alkitab Mobile SABDA
[VER] : [ARALLE]     [PL]  [PB] 
 <<  2 Korintus 4 >> 

1Naängkä'ang kami' Puang Alataala mendahi to pengkähänna, anna pa'kalemunnantoo lambi' malaang umbabe inde pengkähängang. Dianto anna dai mono' inahangki'.

2Daang umbabe aka-aka ang la melongko'i. Dai aha ang kibuni anna daang umbulitu' tau senga'. Daang umputa'-puta' Bahtakaranna Dehata, ampo' di olona Puang Alataala kitula' aka ang tahpa', dai kiseming-seming, lambi' napetahpa' tau naoatee tahpa' yato kaheba ang kibaha.

3Ponna ke tibunii yato Kaheba Mapia ang kibaha, ya' supung tibuni pano di tau ang inang la lupano di nahaka.

4Pihki'na tau ang noa yatoo hali nabutai Pongkahana setang ang ma'kuasa yaling inde di lino, lambi' dai sika umpetahpa' Kaheba Mapia. Kamabayaang ang sule di hao mai yato di Kaheba Mapia dai mesilo tama di inahannaii, lambi' dai sika ungnginsang kamatandeanna Kristus ang mepaitai didiona Puang Alataala.

5Daang umpepainsangnging sanga kalaeki'. Ang kipepainsangnging dianto kaheba ang naoatee Puang Yesus Kristus dianto Dehata. Anna kami'mitoo sabua'mua' situhu' pahentana Puang Yesus.

6Naonge anna napadahii Puang Alataala langi' anna lino ma'kara naoatee, "Dahio mabaya yaling mai di kamalillingang!" Anna Puang Alataalantoo ang umballoi inahanta lambi' mala tainsang kamatandeanna ang mesilo yaling di lindona Kristus.

7Dai aha ang mantondong yato kakuasaanna ang mengkähäng yaling di inahangki', aka' nabeaang Puang Alataala ballona ang la kibaha. Ampo' tau biasa touang kami'. Sinnoaang supu kohing tampo, ampo' napangngihsiang aka-aka ang masu'li'. Lambi' maleso pano di ingkänna tau dioatee kakuasaang ang kitokei sule yaho mai di Puang Alataala, tadia kakuasaang kalaeki'.

8Pemmai'diang ungngolai kamadahhaang, ampo' dai dioatee lambi' la madahha liuang. Si aha tempona dai kiinsang aka la kibabe, ampo' dai aha mono' inahangki'.

9Mai'di balingki', ampo' naposolai loloang Dehata. Aha si mambambaang lambi' tisulungngang ampo' malaang ke'de' sumule.

10Si ungngoloi loloang kamadahhaang ang la mampateiang, sinnoa ang naoloi dolu Puang Yesus, lambi' mala maleso pano di ingkänna tau dioatee katuhoanna Puang Yesus ungkuasai katuhoangki'.

11Bahtuanna indee: akinna tuhokang yaling inde di lino, ya' aha lolo tau ang pemala mampateiang aka' untuhu'iang Puang Yesus. Nasuhung anna noai yatoo anna malai maleso pano di ingkänna tau dioatee tuhong sumule Puang Yesus, aka' sika naita kakuasaanna yaling inde di kalaeki' ang malamma.

12Dahi di hao loloang kami' di olona kamateang, ampo' kalemba'anna yatoo, ya' malakoa' tuho lambi' sapano-panona.

13Aha tiuki' yaling di Suha' Masero naoatee, "Mampetahpa'ä', dianto anna bahaniä' ma'tula'." Noa tumang kami'. Kipetahpa' dai' di Puang Alataala lambi' bahaniang ma'tula'.

14Puang Alataala umpatuho sumule Puang Yesus. Dianto anna kiinsangngi kioatee la lambi'mi tempona la napatuho touang kami' sumule sibaha Puang Yesus, anna la nahimpungngingkea' sibaha di olona.

15Ingkänna indee kidurungngingkoa' anna malakoa' untahimbo kamapiaang. Aka' tuhtuang mai'di tau ang unghingngi yato Kaheba Mapia lambi' dilahpa' di hao mai di tahungkung, ya' tuhtuang mai'di ang la ma'kuhhu'sumanga' dai' di Puang Alataala, lambi' dipamatande sanganna.

16Dianto anna daang mono' inaha. Moinnakato anna tuhtuang malammai bätäng kalaeki', ampo' allo-allo si dipamatoho lolo inahangki'.

17Kamadahhaang ang kioloi dinoa dianto kamadahhaang sämpäi' supu anna mahingang. Anna aka' sa'bara'ang menge ungngolai inde kamadahhaang, lambi' la untahimboang kamatandeang ang la lambi' sapano-panona. Yato kamadahhaang ang kiolai dinoa dai umba sama ke dipasiitai yato kamatandeang ang la kitahimbo di allo ang la sule.

18Dahi, daia' kita' tapihki' liu yato aka ang landa' diita. Ampo' ang tapihki' liua' dianto ang dai landa' diita. Aka' yatoo ang landa' diita kaha-kaha sämpäi' supu. Ampo' yato ang dai landa' diita, dianto ang la lambi' sapano-panona.



 <<  2 Korintus 4 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel