Alkitab Mobile SABDA
[VER] : [ARALLE]     [PL]  [PB] 
 <<  2 Korintus 9 >> 

1Setonganna dai pahallu kuuki' moi aka didiona inde doi' ang la kibaha sau di Yerusalem.

2Kuinsammi kuoatee pemalakoa' undului solamu. Setonganna puhakoa' kupokale'de pano di to Makedonia, kuoatee, "Yatone' solasohonta di hao di Poropensi Akhaya inang napahandu'ke' taung ang puha anna sadiang la umbea yato doi'na ang la naduluiing solana." Dahi, tahpana sika nahingngi kalebu inahammua' undului sola, ya' sika pemala tunne' napanoa.

3Ampo' moinnakato noa, ya' dotanne' kusuo lohpo' ta Titus sibaha solana mating anna malakoa' nadului ungngäto' yato pentandomu. Dahi kuhannuang ke lambi'mä' mating la tokangnga' kulambi' sinnoa ang kutula'ing to Makedonia. Daa-daa nasanga sika kuloseng yato aka ang puha kutula' pano diii.

4Aka' ponna ke ahai to Makedonia ang mamposolaiä' mating, anna dake' tihimpung yato doi' ang la umpopanduluia', ya' la masili si'da-si'daang aka' puhakoa' kipudi yaling inde di kaha-kaha. Kusanga la masili toukoa' dio ke noai yatoo.

5Dianto anna kusanga mahasa ke kusuoi mating ta Titus sibaha solana, anna malai sika naäto' lohpo' yato doi' pentandomua' ang undandi. Dahi, ke lambi'mä' mating, ya' la toka asammi yatoo. Ponna ke noai yatoo, ya' la maleso dioatee mebeakoa' mengkalao yaling di inahammu, dai aka' dise'de'koa'.

6Pihki'i inde kara: yato tau ang sai'di' naambo', ya' sai'di' toe' ang la nakohti'. Yato tau ang mai'di naambo', ya' mai'di toe' ang la nakohti'.

7Pahallu tau simesa-mesa umpihki' lohpo' sangngaka ang la dipebeaing. Dai sihatang ke umpebeaing tau aka-aka sitonda matingngi inaha, bahtu' supung aka' nase'de' tau senga'. Aka' Puang Alataala ungkalemui tau ang umpebeaing aka-akanna sitonda kamasannangang inaha.

8Ma'kuasa nabehekoa', lambi' taumpuha-puhaa', mala dioatee yato ingkänna ang umpahallu la aha asang lolo. Yato kala'biammua' la umpake umbabe ma'kahupa-hupa kamapiaang pano di tau senga'.

9Sinnoa ang tiuki' yaling di Suha' Masero dolu, "Mai'di pebehe ang nabea Puang Alataala pano di to pemase-mase. Kamapiaanna la lambi' sapano-panona."

10Puang Alataala umbea banne pano di to pangngambo' anna nabeaingkea' kita' boana la taande. Noa tunne' pentando ang la umbea pano di tau senga' la nabehe Puang Alataala anna malai tuhtuang kehängngängke' yato kamapiaang inahammu.

11Ma'kahupa-hupa behe ang la nabeakoa' anna malakoa' undului lolo tau senga'. Dahi, ke kibahaing pentandomu pano di solata ang memase-mase di lau' di Yerusalem, ya' la mai'di tau ang ma'kuhhu'sumanga' dai' di Puang Alataala.

12Inde pengkähängang mapiammu la umpasundung kakuhanganna to pentindo'na Dehata di lau'. Londonang la tuhtuang mai'di tau ang ma'kuhhu'sumanga' dai' di Puang Alataala aka' naita pengkähängang mapia ang umbabe.

13La umpamatandea' Puang Alataala ungngolai yato pentandomu. Aka' napobua' yato pentandomu pano diii, ya' la maleso dioatee tuhu'-tuhu'angkoa' pano di Kaheba Mapianna Kristus.

14Anna sika la nasambayangngikoa' mengkalao yaling mai di inahannaii, aka' la napihki' naoatee mana' pa'kalemunna Puang Alataala ang mahasa liu mengkähäng yaling di inahammu.

15Kuhhu' sumanga' dai' di Puang Alataala aka' dai tabela tatula' asang kamatandeanna pebeana pano di kita'!



 <<  2 Korintus 9 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel