Alkitab Mobile SABDA
[VER] : [ARALLE]     [PL]  [PB] 
 <<  Efesus 4 >> 

1Aka' yato kaha-kaha ang puha kutula' langngena', dianto suhunna anna kupalauia' mating. Lella'ä' ditahungkung aka' umbabeä' pengkähänganna Dehata, pemalaä' ke la malai yaling di katuhoammu anna pembabemua' la umbabe aka ang sihatang, aka' puhamokoa' natambai Dehata la mendahi petauanna.

2La pahallukoa' punno kamahempo'ang inaha anna kamalunä'ang inaha. La sisa'bara'angkoa' mesa anna mesa anna sikalemuikoa'.

3Peäng si'da-si'daia' lalang anna malakoa' tontong lolo mesa inaha. Aka' puhamokoa' napamesa inaha Inaha Masero anna la tontong lolokoa' sangkalebu ke mesa inahakoa'.

4Ingkännaingkea' to mampetahpa', sangkalebumingkea' sihapang mesa bätäng kalae, anna supung aha mesa Inaha Masero. Noa tuntone' supung aha mesa panghannuang ang dibeaingkea' naonge ditambaiingkea'.

5Supung aha mesa Dehata, mesa kapampetahpa'ang, mesa pantero'ang

6anna mesa Puang Alataala ang tapoambe ingkännaingkea' hupatau. Dianto ang ungkuasai anna ang mengkähäng yaling di ingkänna siamo. Anna tohho toi yaling di kalaetaa'.

7Ampo' pantangngingkea' namana' pengkähängang di mendehatanna situhu' aka ang mebea Kristus.

8Aka' yaling di Bahtakara Dehata aha tiuki' naoatee, "Tahpana dai' di ongeang ang matande mai'di to natalo ang nabaha anna ma'kahupa-hupa pebeana ang nasusa pano di hupatau."

9Nasuhung anna dioaitee, "dai' di ongeang ang handang matande," aka' haling tuhung mentama inde di lino, bahtu' mala dioate ongeang ang handang madihoi'ang.

10Anna Yato ang hali tuhung, Dia sia tunto nei' ang hali dai' di ongeang ang handang matande anna handang mayahoang andana langi', anna malai umpasundung ingkänna siamo.

11Dia sia tunto nei' ang umbeaingkea' yato pengkähängang. Sinnoanna aha ang nabea pengkähängang mendahi rasulna, aha ang nabea pengkähängang mendahi nabi, anna aha toi ang nasuo umpepainsangnging yato Kaheba Mapia. Senga'na mendahi to pangkambi' anna to pampakuhu yaling di jumaa'.

12Nabeaingkea' yato pengkähängang anna malai ingkänna petauanna Puang Alataala dipaturu manahpa lambi' mala asang mengkähäng yaling di bela'na Dehata, anna malai umpamatoho kakalebuanna to mampetahpa' ang dipasihapang bätäng kalaena Kristus.

13Lambi' mesa inahaingkea' yaling di kapampetahpa'anta anna kapainsanganta didiona Änä'na Puang Alataala. Anna yato lalang kapampetahpa'anta la mendahi kabiasaang lambi' sundungngingkea' sinnoa Kristus.

14Ponna ke noamingkea' yatoo, ya' damingkea'to la noa änä'-änä' ang mala dipakamaho-maho, bahtu' sihapang lopi ang napalusau-lutama bombang. Aka' ingkänna tau ang mala dipakamaho-maho napalupano luihao mai ma'kahupa-hupa pepakuhunna ingkänna to pampasähsä' lalang. Dahi damingkea' kita' la napasähsä' lalang to pa'bulitu' ang la mebulingngi.

15Ampo' kita'a'-kita', la umpembabe si'da-si'daingkea' kita' katahpa'ang sitonda punno pa'kalemu anna malai yaling di ingkänna kaha-kaha tuhtuang masae tuhtuang malaingkea' umpensinnoai Puang Yesus Kristus. Anna Kristusmitoo ang ungkapalai kakalebuanna to mampetahpa' sihapang bää' ungkapalai kalae.

16Yaling di kakuasaanna, yato kalaena sikente-kente mapia. Sanghupa boitoo, pantang tubunne' umbabe kähängang ang sihatang nababe. Anna yaling inde di pengkähänganna mala sidului, ya' tuhtuammi lobo', lambi' sanghupa boitoo yato di kalae la tuho masahke anna punno pa'kalemu.

17Dahi yaling di sanganna Dehata la kutula'ingkoa'. Aha ang pahallu la umpehingngii manahpaa', dianto: Damokoa' la tuho anna membabe sinnoa tau ang dake' ungnginsang Puang Alataala, ang supung nainsang ma'pihki' takekuna.

18Yato tau ang noa, dai kepihki'. Dai ungngampuang yato katuhoang ang mebea Puang Alataala, aka' dai ungnginsang Puang Alataala. Nasuhung sika noa aka' makahha' bää' asang.

19Dai sika ungnginsang sili, supung untuhu'i ihsi inahanna, tuho beba' supu ungngindä'-indä' pa'bannetauang.

20Ampo' ingkänna yatoo dai noa yato ang dipaturuingkoa' didiona Kristus.

21Aka' puhangnga' unghingngi didiona Kalaena. Anna yaling di kasikenteammua' Puang Yesus Kristus puhamokoa' dipaturu didiona yato kara katahpa'ang ang dilambi' yaling di Puang Yesus.

22Dahi la umpellei asammokoa' yato sipa' karakemu ang dolu yato naonge anna dakangkoa' umpetahpa' Puang Yesus Kristus. Yato kalaemu nakarakei kamailuammua' ang mampasähsä' lalangkoa'.

23Dianto anna la pahallui, noa inahammu, noa toi pihki'mu, la nabakahui Inaha Masero,

24anna la umpabala'ia' sipa' bakahu ang napadahi Puang Alataala napasinnoa sipa' Kalaena, dianto sipa' ang tahpa' si'da-si'da anna masero.

25Dahi la umpelleia' yato kalosengammu anna la untula'koa' katahpa'ang pano di solamu mesa anna mesa. Aka' kita'a'-kita' tama asammingkea' di kakalebuanna to mampetahpa'.

26Ponna ke keaha'koa', ya' la undakai manahpa andana nabahakoa' yato aha'mu pano di dosa. Anna daumpabeii yato aha'mu tontong yaling di kalaemu lambi' tempu' allo,

27andana mengkähängngi Pongkahana setang yaling di inahammu.

28Noa tunne' tau ang si biasa maboko dang mala la si maboko. Ampo' diare' la untanang sikunna mengkähäng anna malai la aha toe' pallollonganna ang la napake undului solana ang kakuhangang.

29Dia tuke' dakoa' mala umpasohong tula'-tula' karake. Ampo' pa'tula' mapiakoa' anna malai kekuna yato tula'mu pano di tau ang manghingngi, aka' dianto ang la umbaha hupatau pano di lalang mapia ang la sihatang diola.

30Datoukoa' la mala umpi'di'-pi'di' Inaha Maserona Puang Alataala. Dianto ang puha napatamaiingkoa' di kalaemu mendahi tanda pano di dioa' dioatee petauannamokoa' Puang Alataala ang la nalahpa' yaling mai inde di lino ang punno kakarakeang ke lambi'mi allo katämpä'anna.

31Pa'daiia' ingkänna pi'di' inahammu sibaha kakeaha'ang anna pahtuyu karake pano di solamu. Datoukoa' la siba'di-ba'di anna si untula' tahuhu solamu. Anna datumokoa' la sikahiri'-hiri' mesa anna mesa.

32Ampo' la pahallukoa' mapia inaha anna sikalemui mesa anna mesa anna siampungngi, umba noa Puang Alataala puhamokoa' naampungngi aka' pengkähänganna Kristus.



 <<  Efesus 4 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel