1Yato Atohang ang napepainsangnging Nabi Musa noa supu kambara'na bahtu' kalihayona ingkänna kamasahkeang ang la sule aka' Puang Yesus. Situhu' yato Atohanna Musa taung boitoo ingkänna tau ang pemala undungku'i Puang Alataala umbaha popenombaang ang noa lolo, ampo' dasiang mala mendahi maroho ungngolai yato popenombaannaii.
2Yato ingkänna tau, ponna ke malai mendahi maroho noa, ya' inang la naboling umbaha yato popenombaannaii. Aka' la nainsang naoatee ingkänna dosanna puhang diampungngi, lambi' sika la nasa'ding tama di inahanna naoatee dang kekasalaang.
3Ampo' setonganna daete' noa. Aka' mengkalao yato penombaannaii taung boi anna taung boi nakalehai lolo naoatee, "To madosaä'."
4Aka' hahana saping anna beke inang dai mala umpa'dai dosa.
5Dianto anna Kristus, naonge anna mentamai inde di lino, ma'kara dai' di Puang Alataala naoatee, "Dai ungkärä'i ma'kahupa-hupa penombaang, ampo' moinnakato noa, umpatoka bätäng puntingku ang la mendahi penombaang.
6Dai ungkärä'i penombaang metunu bahtu' penombaang hahana patuhoang ang la umbaya' kasalaang,
7Dahi kuoatee, 'Suleä' umpembabeing pa'elo'mu, O Dehatangku, sinnoa ang tiuki' lohpo' didiona Kalaeku yaling di Suha' Masero.'"
8Naoante Puang Yesus, "Dai ungkärä'i ma'kahupa-hupa penombaang. Dai ungkärä'i penombaang metunu bahtu' penombaang hahana patuhoang ang la umbaya' kasalaang," moinnakato anna ingkänna yatoo pahallu situhu' Atohanna Musa.
9Pihsananna naoa buntee, "Suleä' umpembabeing pa'elo'mu, O Dehatangku." Dahi napa'dai Puang Alataala yato ingkänna penombaang masae, anna nabala'i pole' penombaanna Puang Yesus.
10Anna inang Puang Yesus Kristus umpembabeming pa'elo'na Puang Alataala lambi' umpopenomba pihsang Kalaena anna malaingkea' masero lambi' sapano-panona.
11Yaling di peada'anna to Yahudi, allo-allo si ke'de' imang anna umbabe popenombaang napa'sule-sulei ang inang dai mala umpa'dai dosa.
12Ampo' Puang Yesus, ang mendahi Handang Pongkahana Imang, umpopenomba Kalaena aka' dosanta, ang pihsang liu supu nababe anna sihoang lambi' sapano-panona. Puhai yatoo, dai'mi di suruka anna mohko'i yaho di tando kuananna Puang Alataala.
13Dinoa lella'mi mangngempe lambi' ingkänna balinna dipadihoi'ing di pengngindä'anna.
14Dahi aka' yato mesa popenombaang, napamaseromingkea' di hao mai di dosanta anna napamarohoingkea' di olona Puang Alataala, lambi' dang aha takalala'i lambi' sapano-panona.
15Anna nasa'bii toe' Inaha Masero didiona inde kaha-kaha, naoatee,
16"Dianto indee pa'dandiang bakahu ang la kubabe sibaha petauangku di allo ang la sule: Atohangku la kupatama di pihki'naii, la kuuki' asang tama di inahanna." Noantoo Bahtakaranna Puang Alataala.
17Mane naoaitee, "Kasalaannaii anna ingkänna dosanna dang la kukalehai."
18Dahi ponna ke inang diampungnging dosanta anna kasalaanta, ya' dang pahallu la aha penombaang senga'na.
19Oa' solasohong, sinnoa mesa handang pongkahana imang mala mentama di Tambing Handang Masero aka' yato haha ang nabaha, noa tunne' kita' malang pole' beba' undungku'i Puang Alataala aka' hahana Puang Yesus ang titollo naonge matei.
20Dianto indee lalang bakahu ang mepatuho ang nabuhkei Puang Yesus Kristus! Dinoa tibuhkeng pole' pesapa'na Tambing Handang Masero yaho di suruka ang la diola tama. Aka' yato pesapa' mesa tunne' pohapanganna Kalaena Puang Yesus.
21Dianto ang mendahi Handang Pongkahana Imang ang umpahenta ingkänna petauanna Puang Alataala.
22Dahi maimokoa' mendungku' pano di Puang Alataala sitonda unnä' inaha anna kapampetahpa'ang matoto', aka' Puang Yesus puha umpamasero inahanta umpake hahana lambi' tainsang taoatee dang aha kasalaanta. Anna haliingke nadio' uhai ang mendahi tanda kabahahsianta.
23La hannu loloingkea' pano di Puang Yesus, anna daingkea' mahea' taakui taoatee dianto Dehatanta, aka' inang Puang Alataala la umpasundung pa'dandianna pano di kita'a'.
24Pahallu umpihki' toingkea'ne' solata anna sidulu-duluiingkea' mesa anna mesa umpalanda' pa'kalemu anna pembabe mapia.
25Daa tabolii ma'himpung sibaha-baha, sinnoa ang nababe piha tau. Ampo' diare' pahalluingkea' tontong sipakaenga' mesa anna mesa. Anna tuhtuang la tapanoa lolo aka' tuhtuang madungku'mi allo kasuleanna Puang.
26Oa' solasohong, ponna ke taangka'i umbabe lolo dosa puhanna tatahimbo anna tainsang yato kaheba katahpa'ang, ya' dang la aha popenombaang ang la mala mansulängngiingkea' di hao mai di dosa.
27Ponna ke noai pengkerota, ya' inang la mahea'ingkea' ungngempei pampahehsaanna Puang Alataala, aka' tahungkung ang la nalambi' balinna Puang Alataala dianto api ang meleä'-leä'.
28Dolu tau ang dai naaku untuhu'i Atohanna Musa tahpa ditahungkung mate ahsala' ahai deruaraka bahtu' talluraka ang mantanda'.
29Londo puhane' la makahha' tahungkunna pano di tau ang hali umpellei kapampetahpa'anna pano di Puang Yesus! Aka' tau ang noa yatoo sinnoa nei' untehkai Änä'na Puang Alataala. Sika nasanga dai kekuna yato hahana Puang Yesus, ang setonganna umpamatoto' pa'dandianna Puang Alataala anna mepamasero! Sika ungkebo'i Inaha Masero ang nabeaingkea' Puang Alataala aka' mana' pa'kalemunna.
30Dahi solasohong, daumpellei kapampetahpa'ammu, aka' tainsang yato karanna Puang Alataala ang naoatee, "Kodi'mito ang mambala'! Kodi'mito ang mantahungkung!" Anna naoa toe'tee, "Puang Alataala la umpahehsa petauanna."
31Tau ang noa kasalaanna la mahea' liu ke la napahehsang Puang Alataala ang tuho lolo.
32Daungkalimpängngii naonge anna mane untahimbokoa' kaheba katahpa'ang ang umballoi katuhoammu. Donetoo mai'di kamadahhaang ang manghoakoa', ampo' moinnakato noa umpatontongnga' kapampetahpa'ammu.
33Si aha tempona dipakauho-uhokoa' di olona tau mai'di, anna aha toi tempona si unduluikoa' solamu ang madahha noa.
34Si ungkarota'ia' tau ang ditahungkung aka' kapampetahpa'anna, anna naonge dihampa'ikoa' ingkänna aka-akammu, ya' daia' unsa'ding maaka aka' ungnginsangnga' ungngoatee ungngampui ang mahasa puha ang la tontong lambi' sapano-panona.
35Dahi daumpabeii pa'da yato kapampetahpa'ammu dolu ang matoto' si'da-si'da. Aka' ponna ke tontongkoa' mampetahpa', la ullolongangkoa' ang mahahsa'.
36Pahallua' tontong lolo umpembabeing pangngelo'na Puang Alataala sitonda kasa'bara'ang anna malai untahimbokoa' yato ang nadandiingkoa' mating.
37Aka' sämpäi'dang supu anna dahing aka ang tiuki' yaling di Suha' Masero naoatee, "Dianto ang la sule inang la sule, dang aha ang la mangkalapai kasuleanna.
38Tau ang maroho di oloku la tuho mapia aka' kapampetahpa'anna, ampo' daliune' kukärä'i tau ang ungkebo'i kapampetahpa'anna."
39Ampo' kita', solasohong, tadiaingkea' tau ang ungkebo'i kapampetahpa'anta lambi' ditahungkung. Kita'mia'too ang mampetahpa' lambi' dipasalama'.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel