Alkitab Mobile SABDA
[VER] : [ARALLE]     [PL]  [PB] 
 <<  Ibrani 13 >> 

1Patontongngia' sikalemu-lemui mesa anna mesa ang sihatang pano di to pentindo'na Puang Yesus Kristus.

2Daummali'-mali'angngi umpotosule tau ang dake' unsiinsangnging. Aka' aha ang mampanoa, aka' si ungkalemui tau, ampo' setonganna tadia tau ang napotosule ampo' malaeka'etee'!

3Daungkalimpängngi solamu ang yaling di tahungkung, ampo' pihki'i sihapang ditahungkung toukoa' dio sibaha-baha. Kalemuii tau ang didahha aka' kapampetahpa'anna, anna pihki'i sihapang didahha toukoa' dio.

4Pakeangka'koa' kasialaang anna dauntehkaii. Aka' ingkänna ang ungngindä'-indä' pa'bannetauang, bahtu' samangkamahoinna la natahungkung Puang Alataala.

5Pakahaoi kamailuang di doi', ampo' diare' masannangkoa' yaling yato di ingkänna aka-akammu ang inang ahang. Aka' ma'kara Puang Alataala naoatee, "Dakoa' la kupellei, dakoa' la kupabei kalala'."

6Dahi malaingkea' bahani lambi' ma'tula' taoatee, "Puang Alataalantoo ang mangkalemuiä', dahi dä' la mahea' pano di tau. Aka' aka ang la mala nababe hupatau pano di kalaeku?"

7Daungkalimpängngi to pambahanammu ang mampainsangngikoa' Bahtakara Dehata dolu. Padiinahammui umba noa pengkerona naonge tuhoi anna di tempona la mate, anna tindo'i yato kapampetahpa'annaii.

8Puang Yesus Kristus daine' mokarende-rende, ampo' tontong lolo mengkalao dolu, moi dinoa, lambi' sapano-panona.

9Dauntuhu'i pepakuhu ang umpasähsä' lalang tau di hao mai di lalang tahpa'. Aka' kamatohoang inaha tatahimbo yaling di mana' pa'kalemunna Puang Alataala, tadia yaling untuhu'i atohang pano di andeang. Aka' atohang ang noa dai aha kunanna pano di tau ang mantuhu'i.

10Ampo' kita'-kita' aha mesa pantunuang penombaang, ang mala taongei mangngala taha, ang daine' mala naonge mande moi imang ang sule yaling mai di Bansuli Masero.

11Situhu' peada'ang Yahudi, yato handang pongkahana imang si umbaha hahana patuhoang tama yato di Tambing Handang Masero ang la mendahi popenombaang aka' dosa. Ampo' yatone' bahkena patuhoang ditunu nei' tama di aneanna pebansuliang.

12Noa tunne' Puang Yesus mate di aneanna Bohto Mahoa' Yerusalem anna malai umpamasero tau di hao mai di dosa yaling yato di haha Kalaena.

13Dahi, solasohong, sinnoa Puang Yesus umpellei bohto anna dipakauho-uhoi, pahallu toingkea' kita' umpellei pepakuhu senga' anna untindo'ingkea' supu Puang Yesus, moinnakato anna napakauho-uhoingkea' tau.

14Aka' yaling inde di lino dai aha bohtota ang la tontong. Ampo' bohtota yahoete' di suruka ang la talambi' dako'.

15Ungngolai Puang Yesus ang ma'kadialla', la tapatontong menomba dai' di Puang Alataala. Yato penombaanta dianto tula'ta umpudi Puang Alataala ang la umpamatande sanganna.

16Daia' la taboli membabe mapia anna umbea aka siamo pano di tau ang kalala', aka' dianto ang umpamasannang Puang Alataala sinnoa penombaang.

17Tuhu'i to pambahanammu anna umpembabeing pahentana, aka' sika undakai bätäng sungnga'mu anna pahallu sika unghahpo' yato pandakainna dai' di Puang Alataala. Dahi tuhu'i anna malai sika masannang mengkähäng. Aka' ke umpamapi'di'i inahannaii, ya' dakoa' la ullambi' behe.

18Kipalau la tontong unsambayangngiang. Aka' kiinsang kioatee bahahsi inahangki' aka' yaling di ingkänna siamo pemala loloang la tuho maroho.

19Kupalau si'da-si'da la unsambayangngiä' anna malaä' baha' sumule mating.

20Anna kusambayangngikoa' anna malai Puang Alataala umbeakoa' ingkänna ang mapia lambi' malakoa' umpasundung pangngelo'na. Dianto ang umpatuho sumule Puang Yesus di hoi' mai di alla'na to mate, naonge anna titolloi hahana umpamatoto' pa'dandianna ang tontong sapano-panona. Inde Puang Yesus mangkambi'ingkea' aka' sihapangngingkea' dombana. Ke la malai Puang Alataala la mengkähäng yaling di katuhoanta umpaaha yato ang napomasannang, ungngolai Puang Yesus Kristus, ang la dipamatande lambi' sapano-panona. Aming.

21(13:20)

22Oa' solasohong, kuhannuang la sa'bara'koa' umpehingngii inde pepakahanga ang kuuki' mating, aka' kapo'de' supu inde suha'ku.

23Anna malaia' ungnginsang, solasohonta ta Timotius lahpa'mi pole' di hao mai di tahungkung. Ponna ke baha' sulei dinne, ya' la naposolaiä' mating.

24Palambi'ingkang salama'ki' pano di ingkänna to pambahanammu sibaha ingkänna petauanna Puang Alataala diting. Salama' toi are' di hao mai di to Italia ang mampetahpa'.

25Puang Alataalarang ang la mambehekoa' para-para.



 <<  Ibrani 13 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel