1Tontong loloke' pa'dandianna Puang Alataala la mala tau ullambi' yato pehileanna, dahi pahallu tadakai andana ahai di alla'-alla'ta ang daine' la nalambi'.
2Aka' yato Kaheba Mapia napainsangngi toingkea' kita', sinnoa ang napainsangngi toe' pano di to Israel dolu. Ampo' yato Kaheba Mapia dai umbaha behe pano diii, aka' sika nahingngi supu, dai sika mampetahpa'.
3Supung kita' ang mampetahpa' ang la ullambi' yato pehileang sibaha Puang Alataala. Pano di tau ang dai mampetahpa', naoane'tee Puang Alataala, "Yaling di kakeaha'angku mopindaä', kuoatee, 'Daliui la kupabei sika mentama yato di ongeang kapehileang ang kupatokaing.'" Ma'tula' noa, moinnakato anna yato ongeang kapehileanna puha napatokaing mengkalao anna dipapiai inde lino.
4Tainsammi taoatee tokang aka' aha tiuki' didiona allo katohhoang yaling di Suha' Masero naoatee, "Pihsananna di allo kapitunna mehileng aka' puhang pengkähänganna."
5Anna yato tula'na Puang Alataala ang tahingngia' di langngena' naoatee, "Daliui la kupabei sika mentama yato di ongeang kapehileang ang kupatokaing."
6Dai sika ullambi' kapehileang sibaha Puang Alataala aka' dai sika untuhu'i pahentana. Ampo' situhu' pahtuyunna Puang Alataala pahallu aha tau ang la ullambi' yato kapehileang.
7Dianto anna napilleing Puang Alataala tempo ang senga' ang naonge mala tau ullambi' yato kapehileanna, dianto allo dinoa. Indee napepainsangnging Puang Alataala ungngolai Tomaraya Daud, masaeng puhanna naonge anna tuhoi Nabi Musa, umpake yato tula' ang tahingngi langngena' naoatee, "Allo dinoa pahallukoa' umpehingngii kamahanna. Daumpamakahha'i inahammu dai'."
8Dolu Yosua umbahanang to Israel mentama di Bohto Kanaan, ampo' tadia yatoo ang disangai "kapehileang" dinne. Ponna ke dianto supu yatoo ang mendahi kapehileang sibaha Puang Alataala, ya' dai la ma'tula' Puang Alataala didiona allo ang senga'na.
9Dahi ahake' kapehileang sibaha Puang Alataala pano di petauanna. Kapehileang yatoo sinnoa kapehileanna di allo kapitunna.
10Aka' ingkänna tau ang mentama yato di kapehileanna Puang Alataala la mehile di hao mai di pengkähängannaii, sinnoa Puang Alataala mehileng puhanna pengkähänganna dianto untampa lino.
11Dahi, solasohong, la tapengkabela-belaia' anna malaingkea' ullambi' yato kapehileang, andana ahai di alla'-alla'ta ang umpellei kapampetahpa'anna sinnoa yato to Israel dolu.
12Aka' Bahtakaranna Puang Alataala tuho anna ma'kuasa, pahela puha nei' andana pa'dang ang pahe'la' sibali. Aka' noanna mesa pa'dang ullosa kasitammuang buku, moi lambi' tama di eti'na buku, ya' noa tunne' Bahtakaranna Puang Alataala ullosa pihki'ta anna ihsi inahanta. Yaling inde di Bahtakaranna, Puang Alataala umpalanda'mi umba noa kalaeta ang setonganna.
13Dai aha ang tibuni di hao mai di matanna. Dia asanna yatoo landa' anna maleso di olona. Di olonantoo la pahallu taakui asang ingkänna pembabeta.
14Dahi aha Handang Pongkahana Imang ang tahannuang ang käyyäng si'da-si'da, dianto Puang Yesus, Änä'na Puang Alataala, ang hali dai' di suruka mengngolo pano di Ambena. Dianto anna pahallui tatokei mahha' kapampetahpa'anta pano, sibaha taakui lolo taoatee Puang Yesus dianto Dehatanta.
15Aka' inde Handang Pongkahana Imang ang tahannuang, ungnginsang kamalammaanta aka' hali nasa'ding ingkänna pesändä' ang tasa'ding, ampo' daine' umbabe dosa.
16Dahi mala tapengkabahanii undungku'i ohko'ang kamatandeanna Puang Alataala ang punno pa'kalemu. Aka' yaho di olona la talambi' mana' pa'kalemunna ang la mekalemui ke ahai kapahalluanta.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel