Alkitab Mobile SABDA
[VER] : [ARALLE]     [PL]  [PB] 
 <<  Kisah Para Rasul 19 >> 

1Naonge di lau'ke' di Korintus Apolos, ya' napapuhang Paulus ullelengngi yato Frigia anna Galatia, ya' lambi'mi sumule naung di Bohto Efesus. Ullambi'mi di hoi' sangngaka-sangngaka to mampetahpa'.

2Mekutanang Paulus pano diii naoatee, "Ahangkaa' untahimbo Inaha Masero tahpamu mampetahpa'?" Sika mentimba'mi naoatee, "Dake', aka' moi ditula' datuke' aha kihingngi ang dioaintee Inaha Masero."

3Mekutana sala bung Paulus naoatee, "Ponna noa, pantero'ang aka ang puha ditero'ingkoa'?" Sika mentimba'mi naoatee, "Pantero'anna Yohanes."

4Ma'tula'mi Paulus naoatee, "Yato pantero'anna Yohanes supung tanda pengkatoba'ang. Si naoate pano di tau mai'di, 'Pahallukoa' mampetahpa' pano yato di tau ang la sule ke puhamä',' aka' dianto Puang Yesus."

5Tahpana sika unghingngi yato tula', ya' sika umbeho siarang kalaena ditero' yaling di sanganna Puang Yesus.

6Lella' nasahpa Paulus, tahpa napentamai siang Inaha Masero lambi' sika manähäng asang pole' umpake ma'kahupa-hupa basa aka' napainsangngi Inaha Masero, anna tahpa manähäng untula' pangngelo'na Puang Alataala.

7Tau yatoo umbai sampulo derua dia asanna.

8Tallu bulanna naongei Paulus si mentama yato di pa'sambayanganna to Yahudi anna bahani ma'tula'. Si unsitula'-tula'i pepakuhu didiona Puang Yesus sibaha to Yahudi, aka' umpeäng lalang anna malai yato tau mampetahpa' didiona Kapahentaanna Puang Alataala.

9Ampo' aha toi sangngaka-sangngaka tau tontong makahha' bää', dai umpetahpa' yato kaheba. Supung siumpetaha-tahai Lalanna Puang Yesus yaling di alla'na tau mai'di. Dianto anna umpasähä'mi kalaena Paulus sibaha ingkänna to mampetahpa' lupano di pahsikolaang Tiranus. Ya' diang naongei sika unsitula'-tula'i kara Dehata allo-allo.

10Dompahiama naonge Paulus napanoa lolo lambi' ingkänna ihsinna Poropensi Asia umpehingngii pepakuhu didiona Puang Yesus, noa to Yahudi, noa toi ang tadia to Yahudi.

11Puang Alataala umpake Paulus umpadahi tanda ang mepusa'-pusa',

12lambi' mai'di tau si ungngala pondona, bahtu' lensonaraka ang hali nasahpa Paulus anna nabahai pano di to makoronnaii. Ya' malang yato ang makorong tahpa bono', anna ang napentamai setang mala malai yaling mai di kalaena.

13Donetoo aha sangngaka-sangngaka to Yahudi ang si ma'ihsang-ihsang kalao-lao toe' di bohto anna si unghambai toine' setang yaling mai di kalaena tau. Ya' sika nasändä'mi napanoa umpake sanganna Puang Yesus. Si naoate pano yato di setang, "Kuhambaio umpake sanganna Yesus situhu' ang si natula' Paulus."

14Aha toi pitu to siullu', änä'na mesa kapala imanna to Yahudi ang disanga Skewa, si le'ba' toe' napanoa.

15Ampo' pihsang tempo natimba'i yato setang yaling mai di kalaena tau naoaintee, "Yesus sibaha Paulus sahing kuinsang, ampo' dioa', mennakoa' dio indee? Aka dio kakuasaammu?"

16Lambi' yato ang napentamai setang sika unghopängngi anna umbobo'i yato pitu to ma'ullu', lambi' sika talo yato to pitui. Ya' sika lumpa'mi le'ba' mohobeläng kale anna bila'-bila' kalaena.

17Kaha-kaha yatoo napelele asang ingkänna tau yaling di Efesus, noa to Yahudi noa ang tadia to Yahudi lambi' sika mahea' asang. Ya' donento yatoo tuhtuang dipakäyyäng sanganna Puang Yesus.

18Mai'ding pole' to mampetahpa' donetoo ungngakui ingkänna kasalaanna di olona tau mai'di ang puha nababe.

19Noa toi pano di to pa'ihsang-ihsang unghimpung asang suha' pa'ihsanganna anna natunui di hao di olona tau mai'di. Ponna ke diihsa'i allinna yato ingkänna suha', umbai pa'sahtaungang nasaho sangngatu' limampulo tau.

20Lambi' napahandu'mi pole' donetoo tisembu' Bahtakara Dehata yaling di bohto yatoo anna tuhtuang mai'di tau tibali' pihki'na aka' tandaammi kakuasaanna Puang Alataala.

21Tahpana puha yato kadahiang, mopahtuyung Paulus la le'ba' dai' di Yerusalem ungngola Makedonia anna Akhaya, aka' naoatee, "Puhaito kulelengngi asang ingkänna yato bohto, ya' la pahallu tukä' le'ba' sau di Roma."

22Ya' unsuong derua änä' buana disanga Timotius sibaha Erastus mendolu pano di Makedonia aka' la tohhoke'ne' masae-sae di Poropensi Asia.

23Umbai donento yatoo tempona naongei aha kasiba'di-ba'diang käyyäng yaling di Efesus didiona Lalanna Puang Yesus.

24Aka' tempo yatoo di hao di Efesus aha mesa tau disanga Demetrius mesa to panampa pera', ang si umpapia ongeang penombaang pera' ang la dionge umpenombai dehata bahine Artemis. Yaling di pengkähänganna mai'di tau ang napopengkähäng. Ingkänna to panampa pera' donetoo mai'di asang pallolonganna.

25Dianto anna untambaing ingkänna solana ang to panampa pera' toe', sibaha samai to pengkähänna anna tihimpungngi. Tahpana tihimpung asammi, ya' ma'tula'mi Demetrius naoatee, "Ingkännakoa' solasohongku, tasa'dimmia' para-para umba noa kamasannanganta yaling inde di pengkähängang aka' mai'di pallolongang.

26Anna dinoa tasa'ding toi didiona pepakuhu ang napalao Paulus. Noa dinne di Efesus, noa toi pano di sikunna Poropensi Asia umpasähsä' lalang mai'di tau yato Paulus aka' naoatee, 'Pampapia teyyena hupatau dai mala dipodehata.'

27Dahi ke dako'mi inde pengkähänganta la napetaha-tahai tau, anna dai dia supu, ampo' dasang ada'na toi dehatanta Artemis ang tapa'käyyängngia' la dai keangka'. Noa toi kalaena dehata Artemis ang napenombai mintu'na to Asia anna ingkänna to lino, la hali dipadihoi'ang."

28Tahpana nahingngi solana ta Demetrius inde tula', sika kende'mi aha'na lambi' sika koha naoatee, "Matande Artemis, dehatantaa' to Efesus!"

29Ya' kende'mi pole' kasiba'di-ba'diang käyyäng anna tisembu'i yaling di bohto mahoa'. Lambi' sika umpamesa kalaena inde ang keaha' anna ullumpa'ing ta Gayus sibaha ta Aristarkhus, sahing to Makedonia, solana Paulus, tama di ongeang pa'himpungang.

30Paulus la mentama di alla'-alla'na yato tau mai'di ampo' dai napabei ingkänna to mampetahpa'.

31Noa toi sangngaka-sangngaka to käyyäng ang nasiinsangnging yaling di Asia umpasang Paulus naoatee, "Dauntama yato di ongeang pa'himpunganna tau mai'di."

32Ingkänna yato ang menge ma'himpung bongnga' si'da-si'da. Sika koha tasanda-sanda natula'. Tuhtuang siba'di-ba'di anna mai'di ang tamangnginsang aka yato napa'himpungnging.

33Pihsananna aha mesa to Yahudi disanga Aleksander unghingngi didiona yato kadahiang di hao mai di tau mai'di. Ya' nabuhsu'mi solana ang to Yahudi pano di olona tau mai'di anna malai ma'tula'. Ungngängkä'mi teyyena umpamahtang yato tau aka' boheng pemala la umpebayai kalae

34Ampo' tahpana naita yato tau mai'di to Yahudie', sika kohang naoatee, "Matande Artemis, dehatantaa' to Efesus!" Umbai aha derua tehte' naonge sika koha napa'sule-sulei.

35Tahpa ke'de' siarang bahke'na To Mahkeada'na bohto mahoa' umpamahtang tau mai'di mane naoaitee, "Oa' to Efesus, dai aha tau yaling inde di lino ang tala nainsang naoatee Efesus ongeanna to pandaka dasang ada'na dehata Artemis ang dipamatande, noa toi tau-taunna ang dondong yaho mai di langi'.

36Aka' kaha-kaha yatoo dai mala la dibahoi. Dahi la malinokoa' anna dakoa' la maromi' umbabe aka-aka,

37aka' puhamokoa' umbaha inde derua solana Paulus sule dinne, moinnakato dake' aha unghampa'i dasang ada'ta, anna dai aha untula' tahuhu sanganna dehatanta.

38Dahi monna ke ahai kaha-kahanna ta Demetrius sibaha ingkänna to pengkähänna pano inde di tau, bahai pano di panghohto'ang kaha-kaha. Aka' inang aha, dianto anna pahallukoa' sahing pano umbaha kaha-kahammua'.

39Anna monna ke ahake' pahtuyummua', ya' mala umbaha tama di pa'limboang ada' anna dipapuha yalingngi.

40Aka' aka ang dahi allo dinoa malaingkea' natanda' to ma'pahenta Roma la umpakende' kakarakeang yaling inde di bohto mahoa'. Aka' dai aha malesona ang la mala tapentokei aka suhunna anna ma'himpungngingkea' umpaaha tau kasiba'di-ba'diang."

41Puhai ma'tula', ya' unsuong ingkänna tau le'ba'.



 <<  Kisah Para Rasul 19 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel