1Tahpana lambi' allo Pentakosta, ma'himpummi yato ingkänna to mampetahpa' di mesa ongeang.
2Pihsananna sika nahingnging noa memuhhunna pepahi käyyäng tuhung yaho mai di langi' umpunnoi yato dasang ang naongei sika mohko'.
3Ya' sika ungngitang noa lila api puhpu tisembu', unghampoi asang yato tau ang yaling di dasang.
4Sika napunnoi Inaha Masero lambi' manähäng asang umpake ma'kahupa-hupa basa, situhu' kara ang napalosai Inaha Masero ang la natula'.
5Donetoo yaho di Yerusalem aha tohho to Yahudi ang luhao mai di ma'kahupa-hupa bohto di lino ang si untuhu'i si'da-si'da Puang Alataala.
6Nahingnginna tau mai'di yato ang memuhhung, sibuhsu'-buhsu'mi sule sisihpi'-sihpi'. Sika tungke'du' asammi aka' pantang unghingngi basana napake yato to mampetahpa' ma'kara-kara.
7Pusa' asammi anna sipa'tula'-tula'i naoatee, "Tadiarakate' to Galilea inde ang ma'kara-kara?
8Aka boi anna malai pantang unghingngiingkea' basata natula'?
9Noannaa' kita' to Partia, to Media, to Elam, ihsinna Mesopotamia, Yudea anna Kapadokia, Pontus anna Asia,
10Frigia anna Pamfilia, Mesir anna Libia ang sirungku' Kirene; anna ang sule di lau' mai di Roma
11(noa ang inang to Yahudi noa toi tau senga' ang untuhu'i ada' Yahudi), to Kreta anna to Arab; tahingngi asangnga' ma'kara-kara umpake basataa' didiona kaha-kaha ang mepusa'-pusa' nababe Puang Alataala."
12Sika tungke'du'mi anna pusa'i lella' sipa'tula'-tula' naoatee, "Aka disanga bahtuanna indee?"
13Ampo' aha sia tung nei' sangngaka-sangngaka tau ang mampetaha-tahai naoatee, "Inde mai tau sika malango aka' mai'di liu angkoro' naenu'."
14Ampo' tahpa ke'de' ta Petrus sibaha yato to sampulo mesa solana napekäyyängngi ma'kara pano yato di tau mai'di naoatee, "Oa' to Yahudi anna ingkämmua' ihsinna Yerusalem, pengnginsangngiia' anna umpayaling manahpai di inahammua' inde karangku.
15Inde mai tau daete' malango sinnoa pansangaimmua' aka' dinoa mane tehte' kamehsa mebengngi'.
16Ampo' dianto indee ang puha napepainsangnging Nabi Yoel naoatee,
17'La dahi yaling di allo katämpä'anna sinnoa karanna Puang Alataala naoatee: La kubea Inahangku pano di ingkänna hupatau, lambi' peänä'ammua' la ullombung karangku. Noa toi pano di ingkänna to mahäti'mua' la kaita-ita, anna pano di ingkänna to baha'mua' la natikaitaing yaling di pangngipi.
18Noa toi pano di ingkänna sabua'ku muane anna bahine, la kubea Inahangku di allo yatoo anna la umpalambi'i samai kaha-kaha ang la kupainsangngiing.
19Anna la kupadahi mai'di tanda ang mepusa'-pusa' yaling di lino sinnoanna haha, api, sibaha hambu ang mapulu' anna ma'kahupa-hupa tanda yaho di langi'.
20La dai aha mata allo lambi' la malilling, anna bulang la malehähhä' noa haha, akinna aha allo kasuleanna Dehata. Yato allo ang käyyäng la punnong pole' kamatandeang.
21Ampo' donetoo, pano di menna-menna ang mengkamala' dai' di Dehata, dianto ang la untahimbo kasalama'ang.'
22O ingkämmua' to Israel, pehingngi manahpaia' inde karangku: Yato ang nahoa inde tula'ku dianto Puang Yesus to Nazaret, mesa ang natuho Puang Alataala. Aka' umbabe ma'kahupa-hupa tanda anna ang mepusa'-pusa' yaling di alla'-alla'mua' umpake kakuasaanna Puang Alataala anna nakapusa'i asang ingkänna hupatau sinnoa ang puha ungnginsangnga'.
23Dianto ang puha dibeakoa' anna umpapetoke'ia' anna umpapepateii umpake to karake situhu' pahtuyunna Puang Alataala.
24Ampo' napatuhong sumule anna nalahpa' Puang Alataala di hoi' mai di kamateang aka' inang dai mala la mate lolo.
25Indee tainsangnga' aka' puha natula' lohpo' Tomaraya Daud didiona karanna Puang Yesus ang naoatee, 'Puang Alataala kupahandang lolo aka' Dia pesahpi' matoto'ku di hao di behingku lambi' dä' mala tirende.
26Lambi' napunnoi kakahsiang inahangku anna sohong kamasannangang yaling mai di suaku, noa toi bätäng puntingku la unsa'ding kamalinoang,
27aka' dä' umpabei la tohho yaling di kamateang anna datuke' la umpabei inde To Maseromu la bosi.
28Dio ang puha mampatuhoiä' lalang lupano di katuhoang sumule anna umpatiala inahangku di tingngayomu.'
29Dahi ingkämmua' solasohongku, kupasohongngingkoa' ihsi inahangku untula' didiona neneta Tomaraya Daud ang puhang mate anna puha diku'bu', anna ku'bu'na tontong loloke' taitaa' lambi' dinoa.
30Dahi dai ma'tula' Tomaraya Daud didiona kalaena toboe', ampo' mesa toe' nabi, dahi nainsang naoate puha ma'dandi Puang Alataala anna napopindai pano, la napaohko'ing mesa peänä'anna yaho di ohko'anna.
31Puha nainsang Tomaraya Daud didiona ang la nababe Puang Alataala lambi' natula' lohpo'mi katuhoanna sumule To Dilanti' la Mepasalama'. Tula'na yatoo naoatee, 'Aka' dai la napabei tohho yaling di kamateang anna datoi la bosi.'
32Puang Yesusmitoo yato ang napatuho sumule Puang Alataala anna kami'mitoo ang mansa'bii.
33Anna napaohko'mi Puang Alataala di tando kuananna, dianto ongeang kakeangka'ang, sibaha nabea kakuasaang, anna untahimbo Inaha Masero yato ang puha didandiing. Dianto ang nasuo yaho mai anna umpentamaii yato ang puha taita anna tahingngia'.
34Aka' tadia Tomaraya Daud ang le'ba' dai' di suruka ampo' diane' ang ma'kara naoatee, 'Puha ma'kara Dehata pano di Tuangku naoatee:
35Ohko'o di hao di tando kuanangku, lambi' ingkänna balimmu la kupadihoi'angngingko.'
36Dahi pahallu ungnginsang si'da-si'da ingkämmua' to Israel dianto Puang Yesus ang puha umpapetoke'a', naängkä'mi Puang Alataala mendahi Dehata anna To Dilanti' la Mepasalama'."
37Tahpana sika nahingngi kaha-kaha yatoo, tahpa manahong inahanna ingkänna tau di hao, lambi' mekutana pano di Petrus anna ingkänna solana naoatee, "Akang la kibabe?"
38Natimba'mi Petrus naoatee, "Pengkatoba' asangkoa' anna behoia' kalaemu ditero' yaling di sanganna Puang Yesus, To Dilanti' la Mepasalama', anna malai dosammu diampungngi anna la nabeakoa' Inaha Masero Puang Alataala.
39Aka' diongnga'too sibaha peänä'ammua' anna tau senga' ang makahao nahoa toe' pa'dandiang yatoo. Anna la mai'dike' tau natambai situhu' pahtuyunna Puang Alataala."
40Ya' mai'dike' tula' senga' ang natula' pano yato di tau mai'di anna napa'sule-suleii naoatee, "Alaikoa' kalaemu yaling mai di alla'-alla'na inde mai to karake ang la untahimbo kamadahhaang anna malakoa' salama'."
41Ingkänna ang untahimbo yato tula'na Petrus umbeho asang kalaena ditero'. Ya' allo donetoo kehängngämmi to mampetahpa' umbai tallung sa'bu tau.
42Ya' sangka' tontong lolong untokei pepakuhunna rasulna Puang Yesus, anna tontong lolo ma'mesa. Si ma'mesa lolo mohko' umbika-bika roti naande para-para anna ma'sambayang.
43Ingkänna tau ang di hao mahea' tahpana ungngita mai'di tanda mepusa'-pusa' sibaha ma'kahupa-hupa tanda ang napadahi Puang Alataala umpake rasulna.
44Anna ingkänna yato to mampetahpa' ma'mesa lolo anna samai aka-akanna naampui sibaha-baha.
45Noa ke ahai ang umbalu' aka-akanna, nabahe-bahe yato allinna pano di solana situhu' kapahalluanna.
46Sibaha kamesaang inaha, si ma'himpung allo-allo yaling di Dasang Ada'na Puang Alataala anna umpasibala'-bala'i dasannaii naonge umbika-bika roti ungkalehai Puang Yesus anna mande para-para sibaha kamasannangang anna sangkalebu inahanna,
47laona siang umpudi sanganna Puang Alataala. Nakärä'i asang tau anna allo-allo tuhtuang mai'di, aka' nahängngängngi lolo Puang Alataala ang lella' napasalama'.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel