1Tahpana sisähä'-sähä'ang, ya' mokahpala'mang tahhi' lusau di Kos. Marondonnai, ya' lambi'mang sau di Rodos. Dianto kipengkalaoi tahhi' sau di Patara.
2Lambi'ang sau di Patara sipatu toe' aha kahpala' ang la mengkalao sau di Fenisia. Dai'mang yato di kahpala', ya' mengkalao siang.
3Pihsananna diitang Siprus di hao di tando kaihi ampo' dipellehangngi tahhi' sau di Siria. Tahpana lambi'ang sau di Tirus, tohhong yato kahpala' ang kiongei aka' la dipatuhung ingkänna aka-aka ang nabaha.
4Tohhokang di hao sammingku, ya' le'ba'mang umpellambi'i ingkänna to mampetahpa' di hao. Anna situhu' pekambi'na Inaha Masero pano di to mampetahpa' di hao, ullahang Paulus naoaintee, "Damong undai' di Yerusalem."
5Ampo' tahpana puhang tempoki' di hao, kipatahhi' bung pellaoangki'. Sika naposolaang to mampetahpa' di hao sibaha-baha sanghapunna mensohong yaling mai di bohto mahoa'. Tahpana kilambi' behing le'bo', ya' para-paramang malimuntu' anna ma'sambayang.
6Puhaang ma'sambayang sipasa'bi-sa'bimang lambi' sisähä'-sähä'ang. Dai'mang kami' di kahpala' anna sumuleine' pano di dasannaii.
7Mengkalaoang di hao di Tirus kipatahhi' pellaoangki' lambi' pano di Ptolemais. Silambi' tumanne' ingkänna to mampetahpa' di hao, ya' sisalama'mang anna tohhokang sibaha sangngallo.
8Marondonna mengkalao bumang tahhi' pano di Kaisarea. Lambi'ki' pano, tahhi'mang pano di dasanna Filipus mesa toe' to umpepainsangnging Kaheba Mapia ang dihekeng toe' di alla'na to pitu yato ang puha dipillei unsusa andeang yaho di Yerusalem. Ya' di haong kiongei tohho.
9Inde Filipus aha änä'na uhpa' sangka' änä' bahineke', ang diangka' nabi aka' si ullombung kara Dehata.
10Tahpana sangngaka-sangngaka benginna di haoang, ya' ahang sule mesa nabi yaho mai di Yudea disanga Agabus.
11Tahpa napellambi'iang anna ungngalai salipinna Paulus. Yato salipi napungoing teyyena sibaha bihti'na anna naoaitee, "Noantoo situhu' karanna Inaha Masero naoatee, 'La dipanoanto inde puänna salipi, la napungo to Yahudi yaho di Yerusalem aka' la nabeho pano di tau ang tadia to Yahudi.'"
12Tahpana kihingngi inde tula', para-paramang sibaha to mampetahpa' di hao malau pano di Paulus anna malai dai le'ba' dai' di Yerusalem.
13Ampo' natimba' Paulus naoatee, "Daundusengnga' andana umpamanahokoa' inahangku. Aka' kodi' sadiamä', dai la supung dipungo, ampo' moi mate touä' yaho di Yerusalem aka' sanganna Dehatanta Puang Yesus."
14Ampo' aka' dai napehingngii tula'ki', ya' mahtammang supu. Supurang kioatee, "Tala Dehatarang."
15Tahpana puha sangngaka-sangngaka allona kionge tohho di hao di Kaisarea, ya' mangkahahpimang la mengkalao dai' di Yerusalem.
16Naposolaimang sangngaka-sangngaka to mampetahpa' di hao mai di Kaisarea. Sibaha lolomang yatoii pano di dasanna mesa to Siprus ang disanga ta Manason yaho di Yerusalem, ang masae tunne' mendahi to mampetahpa'. Ya' tohhomang di hao di dasanna.
17Yahoki' di Yerusalem natammuimang ingkänna to mampetahpa' yaho mahasa inahanna.
18Ya' marondonnai le'ba'mang sibaha Paulus umpellambi'i Yakobus, dianto to pambahanang yaho. Lambi'ang pano, di hao asang tunne' pebulle ada' kilambi'.
19Nasalama'i asammi Paulus mane natula' manahpaing yato samai ang puha napadahi Puang Alataala yaling di pengkähänganna, umbea lalang pengkatoba'ang pano di tau ang tadia to Yahudi anna malai ullambi' kasalama'ang.
20Tahpana sika unghingngi tula'na Paulus sangka' umpamatandeng Puang Alataala, mane sika naoaitee, "O solasohongki', ma'sa'bu-sa'bu toe' to Yahudi dinne ang umpetahpa' Puang Yesus anna sika bansa' asang umpembabeing pepakuhunna Nabi Musa.
21Ampo' napelele toe' to dinne di Yerusalem didiona pepakuhu ang umbea pano di to Yahudi di lau' di bohto senga' ungngoatee, 'Dakoa' la untuhu'i pepakuhunna Nabi Musa.' Aka' nasanga umpakuhu loloo tau dai la untille änä'-änä'na anna dai la untindo' kabiasaanna to Yahudi.
22Dahi umbang noa dinoa? Aka' la sika nainsammito inde kasuleammu.
23Dahi yaling di kaha-kaha yatoo aha inde tula'ki' ang la pahallu umpembabeing. Aha uhpa' solaki' dinne ang puha mopinda.
24Dianto ang la umposola umpamasero sumule kalaemua' untunu ang la pahallu ditunu. Ampo' dio la mantangkung ingkänna kapahalluang yaling indee, anna malai sika ungkulli'i asang beluhä'na, aka' la donentoo pole' naongei tandaang dai tahpa' yato kaheba nahingngi to Yahudi dinne. Aka' tontong touo dio untokei pepakuhunna Nabi Musa.
25Noa tunne' pano di tau ang tadia to Yahudi ang umpetahpa' tunne' Puang Yesus, puhang kipapebaha suha' didiona kasibohtuantaa' dai la ungngande ingkänna andeang ang puha dipenombaing pano di dehata senga'; dai la ungngande haha anna balena olo'-olo' mate ditehke; anna dai la samangkamahoinna."
26Marondonnai, naposolang Paulus yato to uhpa' do napembabeing situhu' kabiasaang umpamasero kalae. Ya' tahpana puha, tamang di Dasang Ada'na Puang Alataala la untula' lohpo' allo aka ang la naonge diangka' masero, anna tempona la pantang naongei umbeho penombaanna.
27Tahpana la puhang pitu allona tempo pampamaseroang, aha sangngaka-sangngaka to Yahudi ang di lau' mai di Poropensi Asia sika ungngita Paulus yaling di tähämpä' Dasang Ada'na Puang Alataala. Ya' sika naangka'ing umpakeaha' tau mai'di sibaha to Yahudi, mane unsahkai Paulus.
28Sika koha naoatee, "O ingkämmua' to Israel, duluiang! Aka' dianto inde ang si le'ba' ullelengngi bohto umpakuhu tau anna malai nabaliingkea' anna umbali-bali pepakuhunna Musa. Napanoa toi pano inde di ongeang ang taongei. Anna dinoa umposola sule to Yunani tama di Dasang Ada'na Puang Alataala ungkärähko'i inde ongeang masero."
29Aka' puhang sika ungngita Trofimus ang to Efesus sibaha Paulus yaling di bohto mahoa', dahi sika nasanga naposola tama di Dasang Ada'na Puang Alataala.
30Ya' bongnga' siarang ingkänna tau yaling di Yerusalem lambi' mokalipumpung ullebo Paulus nasahka anna sika nahui'i yaling mai di Dasang Ada'na Puang Alataala. Ya' tahpa natutu'i asammi baba hala Dasang Ada'na Puang Alataala.
31Mane lella' sika mopahtuyu la umpatei Paulus, ya' lambi' sia tunne' kaheba pano di pongkahana tantara Katomarayaang Roma naoatee, siba'di-ba'di samai ihsinna Yerusalem.
32Nalambi'na kaheba, mengkalao siang inde pongkahana tantara sibaha sangngaka-sangngaka solana umposola änä' buana le'ba' pano yato di ongeang ang naongei tau mai'di. Ya' naitanna yato tau mai'di tantara sule, tahpa naboli siarang undangku' Paulus.
33Lambi'na pano yato pongkahana tantara tahpa umpellambi'ing Paulus anna natokeii. Mane unsuoi änä' buana napungo umpake hante bahsi derua anna napekutanaing naoatee, "Menna inde tau? Aka nababe?"
34Ampo' aka' sika koha sanda-sanda tanaoa, dahi dai aha maleso ang nahingngi yato pongkahana tantara aka setonganna ang dahi. Lambi' umpesuoi Paulus dibaha pano di ongeang tantara.
35Tahpana lambi' pano di eheng inde Paulus, bilang nasiängkä'-ängkä'ing tantara aka' sibuhsu'-buhsu'mi yato tau mai'di la umbamba Paulus.
36Yato tau mai'di sibuhsu'-buhsu' liung lella' sika koha naoatee, "Pateiia'!"
37Tahpana Paulus la mentamang di babana ongeang tantara, ya' ma'karang pano yato di pongkahana tantara naoatee, "Malaraka kupa'tula'io Tuang, aka' aha ang kupahallu." Ya' nakutanaing naoaintee, "Aka' ungnginsang ma'basa Yunani, ne?
38Dahi tadiao yato to Mesir ang puha umposola uhpa' sa'bu tau ang käyyäng inaha pano di ongeang makä'däng aka' la umbali to ma'pahenta?"
39Ya' natimba'mi ta Paulus naoatee, "To Yahudiä' ihsinnaä' Tarsus, mesa bohto mahoa' ang kainsangang di hao di Kilikia. Kupalau ke la malai anna dipabeiä' ma'tula' pano inde di tau mai'di.
40Napabeing yato pongkahana tantara. Ya' ke'de'mi Paulus yaho di eheng anna ungngängkä'i teyyena umpamahtang yato tau mai'di. Tahpana mahtang naita, ya' ma'tula'mi ma'basa Ibrani anna malai nainsang naoatee,
<< Kisah Para Rasul 21 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel