Alkitab Mobile SABDA
[VER] : [ARALLE]     [PL]  [PB] 
 <<  Kisah Para Rasul 25 >> 

1Puhanna tallu allona Tuambahsa' Festus yaling di poropensi yatoo, ya' tahpa mengkalao siang ludai' di Yerusalem.

2Lambi'na dai', suleng ingkänna kapala-kapala imang anna to keangka'na to Yahudi ang senga' umpellambi'i Festus anna sika untula' sala boing Festus yato ang natanda'ing pano di Paulus.

3Anna sika unse'de' lolo Festus umba-umba aka ke la malai sika napatiolai anna unsuoi Paulus dai' di Yerusalem, aka' sika napahtuyu la naahung pano di tängngä lalang anna napateii.

4Dahi natimba' Festus naoatee, "Aka' ditähäng di hoi' di Kaisarea anna la baha' sumule siamä' naung.

5Ampo' la noa indee: Ponna la aha si'da sia unsa'dingnga' kasalaanna, ya' la maoang sibaha to manähämmua' naung anna di hoi'ke' mane natula'i yato ang ditanda'ing."

6Umbai la'bi kahua bahtu' sampulo allona Festus yaho di Yerusalem mane sumulei naung di Kaisarea. Marondonna mohko'mi Festus yaling di ongeang panghohto'ang aka' la manghohto'mi. Ya' dipapetambaing pole' Paulus.

7Sulena sika nakapupu'mi to Yahudi ang sule yaho mai di Yerusalem anna sika natula'iing pembabe karakena ampo' inang dai aha la mala sika napepaitaing tanda ang maleso.

8Ya' untula' tunne' katahpa'anna Paulus naoatee, "Kodi' dä' aha umpentehkai pepakuhunna Nabi Musa, datouä' aha ungkarakei Dasang Ada'na Puang Alataala, anna datouä' aha untehkai atohanna Kaisar."

9Ampo' pemala Tuambahsa' Festus ungngala inahanna to Yahudi, ya' ungkutanaing Paulus naoatee, "Dahi la ungngakuraka dai' di Yerusalem anna yahoke' mane kubohtui inde kaha-kahammu?"

10Ampo' natimba' Paulus naoatee, "Dinoa di haomä' di olona mesa to panghohto' ang nabea kakuasaang Kaisar anna dai mala tala dibohtung kaha-kahangku done indee, aka' ungnginsang dai aha kasalaangku pano di to Yahudi moi poro la sai'di'.

11Ampo' ke ahai pembabe karakeku ang la sihatang dipateiä', ya' pabeimä'te' mate. Ampo' monna ke dai aha maleso ingkänna inde hahpo'ang didiona kasalaangku, daine' pole' la sihatang umbehoä' pano inde mai di tau. Dahi kupalau anna malai inde kaha-kahangku dihohto' di olona Kaisar."

12Ya' sipa'tula'-tula'mi yato ang si naposola Festus umbohtu kaha-kaha mane ma'karai naoatee, "Dahi aka' puhang umpalau la nahohto'o Kaisar, ya' dianto la dipanghohto'io."

13Puhai sangngaka-sangngaka allona, sulerang Tomaraya Agripa sibaha Bernike arinna di hao di Kaisarea umpensiitai anna unsalama'i Tuambahsa' Festus.

14Tahpana sangngaka-sangngaka allona di hao, ya' natula'ming Tuambahsa' Festus yato kaha-kahanna Paulus naoatee, "Setonganna aha tau ang ditähäng dinne, napellei Tuambahsa' Feliks naonge le'ba'i.

15Naonge yahoä' di Yerusalem natula'imingkä' ingkänna kapala imang sibaha setobaha'anna to Yahudi naoatee, 'Setonganna mai'di ponala kakarakeang nababe yato Paulus. Ke la malai anna umpahsalai.'

16Ampo' kutimba' kuoaintee, 'Setonganna tadia kabiasaanna to ma'pahenta Roma la dipebea tomande'ing supu mesa tau ke dake' aha dipahehsa dolu kasalaanna di olona tau ang mantanda' anna malai natula' katahpa'anna.'

17Ya' sibahamang sule dinne. Marondonnai yatoo, tama siamä' di ongeang panghohto'ang, anna kupapetambaii Paulus.

18Ampo' tahpana ma'tula' yato ingkänna ang mantanda', daliu aha la mantula' pembabe karakena situhu' ang kupihki'.

19Ampo' supung ang kuhingngi unsiteläng-telängngi didiona peada'anna anna mesa tau disanga Yesus ang puha mate. Ampo' naoa liune'te Paulus, 'Tuhoete' sumule.'

20Anna pusa'ä' ungngoloi inde kaha-kaha aka' dai kuinsang la kubohtu. Dianto anna kuoaminte Paulus, 'Ungngakuraka dai' di Yerusalem anna yahoke' mane kubohtui kaha-kahammu?'

21Ampo' napalau dihohto' di olona Kaisar anna ditähängke' lambi' mala dihohto'. Dahi kusuo ditähäng dinne lambi' mala dipalupano di Kaisar."

22Ya' ma'karang Tomaraya Agripa pano di Tuambahsa' Festus naoatee, "Pemalaä' kalaeku umpehingngii tula'na ne tau." Natimba'mi naoatee, "Marondongke' mane umpehingngii tula'na."

23Marondonnai suleng Tomaraya Agripa sibaha Bernike, ya' ditammui manahpang. Le'ba'mi tama yato di panghohto'ang sibaha ingkänna kapalana tantara anna ang dipakeangka' yaling yato di bohto mahoa'. Ya' unsuong tau Festus le'ba' untambai ta Paulus anna naposolai sule.

24Ma'karang Tuambahsa' Festus naoatee, "O Tomaraya Agripa sibaha ingkämmua' ang dinne done: Pahandangngia' inde tau. Dianto inde ang puha natanda' ingkänna to Yahudi, noa yaho di Yerusalem, noa dinne di Kaisarea lambi' nabaha pano di kodi'. Anna sika koha naoatee, 'Pateii!'

25Ampo' daliu aha kulambi' pembabena suhunna la mala dipatei. Anna dia toboe' mampalau ke la dihohto'i di olona Kaisar, dahi kuoaminte supu, 'La dipalupanoo di Kaisar.'

26Ampo' dake' aha ang menumpu kupentokei ang la kutula' yaling di suha'ku pano di Kaisar. Dianto anna kupapengngolong tama di alla'-alla'mua' dinoa londo-londona pano di Tomaraya Agripa, anna malai ke puhang inde dipahehsa la ahang pole' aka-aka ang la kuuki'.

27Aka' situhu' pihki'ku dake' sihatang la dibeho pano di to panghohto' senga' mesa ang ditähäng ke dai dipakaleso dolu aka suhunna anna ditanda'i.



 <<  Kisah Para Rasul 25 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2021
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran