1Ma'karang Tomaraya Agripa pano di Paulus naoatee, "Dibeamo tempo la umpebayai kalaemu." Tahpa ungngängkä'mi teyyena Paulus mane ma'tula'i naoatee,
2"O Tomaraya Agripa, natanda'ä' to Yahudi, ampo' dio ang mangnginsang si'da-si'da ingkänna ada'na to Yahudi sibaha ingkänna kaha-kaha ang si nasiteläng-telängngi. Dahi kehongko'ä' kusa'ding allo dinoa aka' malaä' sule di hao di olomu la umpebayai kalaeku. Ampo' kupalau ke malai anna sa'bara'o umpehingngii pa'tula'ku.
3(26:2)
4Ingkänna to Yahudi nainsang pembabeku mengkalao di mahäti'ku, noa di hao di bohtoku, noa toi yaho di Yerusalem.
5Aka' setonganna ke la naakui, la malaä' nasa'bii aka' mengkalaoke' di hao mai, anna mentama tumä' ko di kakalebuanna to Farisi ang umpentokei si'da-si'da peada'angki'.
6Ampo' dinoa ke'de'ä' di hao di olomua' dipahehsa aka' umpetahpa'ä' pa'dandiang ang puha nabea Puang Alataala pano di peneneanta.
7Pa'dandiang yatoo napemitai liu toe' ingkänna peänä'anna sampulo derua änä'na Israel. Lambi' menomba lolo dai' di Puang Alataala allo anna bengi. Dahi dianto suhunna anna napahsalaä' to Yahudi aka' kupetahpa' yato pa'dandiang, Tuang.
8Darakate' mentama di ahkalang ke to matei napatuho sumule Puang Alataala?
9Setonganna dolu kuoa toukotee, 'La umbaliä' pengkähänganna Puang Yesus to Nazaret sibaha ingkänna kamatohoangku.'
10Anna kaha-kaha yatoo puhang kubabe yaho di Yerusalem. Aka' tahpana puhaä' untahimbo suha' pahenta di hao mai di kapala-kapala imang, dä' supung umpatama di tahungkung to pentindo'na ampo' kuakui toi ke dipateii.
11Lambi' si bansa'ä' tama di pa'sambayangang undahha ingkänna ang untindo' Puang Yesus. Anna kusuoi nabahoi. Tandana keaha'ä' donetoo, si le'ba'kä' kupalola pano di bohto mahoa' senga'."
12Napatahhi'ke' tula'na Paulus naoatee, "O Tomaraya, pihsang tempo lella'ä' ungngola lalang lupano di Damsyik, aka' napakuasaä' anna nasuoä' ingkänna kapala imang la kupanoa toe' di hao. Tahpana yalingngä' di tängngä lalang donetoo di tängngä allo, kuitang makähhäng pansillo' yaho mai di langi' makähhäng puhane' andana mata allo, naimba' asangngang solaku.
13(26:12)
14Tahpana tipallumbängngang naung di tampo, ya' kuhingnging kamaha napa'karaiä' ma'basa Ibrani naoatee, 'Saulus, O Saulus, aka suhunna anna undahhaä'? Aka' la ungkarakeio kalaemu ke la umbalio pahtuyunna Dehata sihapangngo ullahpi' bahsi pahela.'
15Kutimba'mi kuoatee, 'Aka' mennarako Dio, Puang?' Natimba'mä' naoatee, 'Kodi'mito inde Puang Yesus ang undahha.
16Ampo' kalehao anna ke'de'o aka' la umpepaitaingkä' Kalaeku mating aka' la kuängkä'o mendahi pesuoku anna sa'bingku. Samai kaha-kaha ang ungngita allo dinoa, noa tuntone' ang mane la kupaitaio, la untula'ing tau senga'.
17Aka' la kupasalama'o di hao mai di to Yahudi anna ang tadia to Yahudi. Anna la kusuoo le'ba'
18umbuhkeiing matanna hupatau anna malai mensohong yaling mai di kamalillingang mentama di kamabayaang, bahtu' mensohong yaling mai di kakuasaanna Pongkahana setang anna mentamai di kakuasaanna Puang Alataala. Anna malai diampungngiing dosanna anna la untahimbo pebehena Puang Alataala lambi' mendahi hupataunna ang puha napamasero aka' kapampetahpa'anna pano di Kodi'.'
19Dianto suhunna, Tuang, anna dai mala tala kutuhu'i inde pahenta ang napalosaiä' Dehata yato ang puha kuita anna kuhingngi yaho mai di suruka.
20Uhuna kupepainsangnging pano di to Yahudi di hao di Damsyik, mane yahoi di Yerusalem, anna Yudea. Kupepainsang toinne' pano di tau ang tadia to Yahudi kuoatee, 'Pengkatoba'koa' anna sumulekoa' dai' di Puang Alataala anna malakoa' membabe ang la sihatang pengkatoba'ang.'
21Lambi' nasahkaä' to Yahudi yaling di Dasang Ada'na Puang Alataala anna sai'di'ä' tala napatei.
22Aka' pa'kalemunna Puang Alataala lambi' malakä' tuho lambi' dinoa. Dianto anna malakä' untula' didiona Puang Yesus, noa pano di to pemase-mase, noa pano di to keangka'. Aka' yato ang kupepainsangnging sinnoa siang yato ang puha natula' lohpo' Nabi Musa sibaha ingkänna nabi senga'.
23Aka' naoatee, 'To Dilanti' la Mepasalama' la unsa'ding kamadahhaang anna Dia handang la dolu kaleha di hoi' mai di alla'na to mate anna malai umpepainsangnging lalang kamabayaang, noa pano di to Yahudi, noa toi pano di tau ang tadia to Yahudi.'"
24Lella'ke' ma'tula' Paulus umpebayai kalaena, tahpa napentama alla'mi Tuambahsa' Festus napekäyyängngi ma'kara naoatee, "Tahta'o Paulus aka' napobua' kamanähängammu."
25Ampo' natimba' Paulus naoatee, "O Tuang Festus ang dipakeangka', dä' tahta' aka' inde ang kutula' tahpa' anna suhaka pihki'ku.
26Dianto anna bahanimä' untula' inde kaha-kaha aka' nainsang ture' Tomaraya Agripa. Aka' maleso nainsang asang anna nahingngi toi, aka' dai dahi di hao di ongeang ang membuni.
27O Tomaraya Agripa, umpetahpa'raka tula'na ingkänna nabi? Aka' kuinsang umpetahpa'."
28Mentimba'mi Tomaraya Agripa naoatee, "Unsangaraka la maromi'ä' umpadahi to pentindo'na Kristus?"
29Natimba' salang Paulus naoatee, "Setonganna la ma'sambayangngä' dai' di Puang Alataala anna malai dai la dio supu ampo' ingkänna ang unghingngi inde karangku la sinnoaä', ampo' daine' la dipungo. Dianto ang kuhannuang, supung dai kuinsang la madihhi'daka, la malelandaka mane la mampetahpa'koa'."
30Ya' ke'de'mi yato tomaraya anna tuambahsa' sibaha Bernike anna ingkänna tau ang aha di hao donetoo.
31Tahpana di aneang sipa'tula'-tula'mi naoatee, "Inde tau dai aha nababe ang la sihatang ditahungkung bahtu' la dipatei."
32Ma'karang Tomaraya Agripa pano di Tuambahsa' Festus naoatee, "Setonganna inde tau malang la dilahpa' ke la dai napalau bure' dipalupano di Kaisar."
<< Kisah Para Rasul 26 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel