1Pihsang tempo di maloe tehte' tallu, ya' le'ba' bung Petrus sibaha Yohanes dai' di Dasang Ada'na Puang Alataala aka' la lambi'mi tempona ma'sambayang.
2Donetoo aha mesa muane dibulle sule aka' makule, inang noa mengkalao dahi. Allo-allo si dipadiale di behing baba Dasang Ada'na Puang Alataala (ang si disanga Baba Mahahsa') anna malai si umpalau aka-aka pano di tau ang sule ma'sambayang.
3Tahpana ungngita Petrus sibaha Yohanes la tamang di Dasang Ada'na Puang Alataala, ya' tahpa napalauing yato to makule.
4Ya' nanenne'ing Petrus sibaha Yohanes mane ma'karai Petrus naoatee, "Nenne'iang mai."
5Unnenne'ing Petrus sibaha Yohanes yato to makule aka' naoate yaling di inahanna, "Aka amo ang la nabeaä'?"
6Ma'karang Petrus naoatee, "Bulahang sibaha pera' dai aha kuampui ampo' aka ang aha di kalaeku, dianto la kubeao. Yaling di sanganna Puang Yesus Kristus, to Nazaret, pellaomo!"
7Natokeing teyye kuananna anna napake'de'i, ya' tahpa matoho siang bihti'na.
8Tahpa ke'de' katibe-tibe anna kalao-lao lelengngi mane umpentindo'i Petrus sibaha Yohanes tama di Dasang Ada' lella' siang kabuäng-buäng anna umpudi sanganna Puang Alataala.
9Anna ingkänna tau ang mangngita yato ang dipabono' kalao-lao sibaha umpudi Puang Alataala,
10sika tahpa nainsang naoatee, "Dianto ang si mohko' di hao di alena di Baba Mahahsa'na Dasang Ada' si kapalau-lau." Ya' sika pusa' liung anna tungke'du' ungngita yato ang dahi pano di kalaena yato tau.
11Umpentindo'i loloke' Petrus anna Yohanes yato tau tama di mesa ongeang ang si dioaintee: Serambi Salomo. Ya' suleng tau mai'di sisihpi'-sihpi' napellambi'i sika pusa' pihki'na.
12Ungngitanna yato tau mai'di inde Petrus, ma'karang naoatee, "Oa' to Israel, akana pusa'koa' ungngita inde kadahiang, anna aka boi anna umpahandangngang noa yato ang kami' umpapellao inde tau umpake kakuasaang anna kamaseroang di kalaeki'?
13Dehatanna neneta Abraham, Ishak anna Yakub puha umpamatande Sabua'na disanga Puang Yesus ang puhang umbehoa' pano di Tuambahsa' Pilatus anna umbahoi di olona, moinnakato pemalane' nalahpa'.
14Ampo' umbahoikoa' dio To Masero ang To Maroho, anna umpalaukoa' to papateang pano di Pilatus la dilahpa'.
15Yato tau ang mebea katuhoang lambi' sapano-panona puhaa' dio umpatei, ampo' napatuho sumule Puang Alataala di hoi' mai di alla'na to mate, anna didiona kaha-kaha yatoo kami' ang mansa'bii.
16Aka' kapampetahpa'ang yaling di sanganna Puang Yesus lambi' matoho inde to makorong sinnoa ang ungngitaa', anna inde tau inang ungnginsammia'. Bono'mi koronna aka' kapampetahpa'anna yaling di sanganna Puang Yesus.
17Oa' ingkämmu solasohongku, kuinsammi nasuhung umbabea' noa aka' bala' taungnginsannaa', noa dioa' noa toi to pambahanammua'.
18Ampo' nasuhung napanoa Puang Alataala yatoo anna malai umpasundung aka ang puha natula' lohpo' ungngolai ingkänna nabi, ang naoatee, 'To Puha Kulanti' la Mepasalama' inang la ungngolai kamasuhsaang.'
19Dahi pengkatoba'mokoa' di hao mai di ingkänna dosammu, sumulekoa' dai' di Puang Alataala, anna malai nasapuiingkoa' dosammu.
20Anna malai napatialaingkoa' inahammu Puang Alataala anna nasuo bouingkea' sule Puang Yesus, To Dilanti' la Mepasalama'.
21Puang Yesus la tohho yaho di suruka lambi' tempona umpadahi sumule ingkänna aka-aka, situhu' ang puha nadandi Puang Alataala umpake ingkänna nabi ang napillei mengkalao di pampahandu'anna.
22Aka' puhang napepakuhuing Nabi Musa naoatee, 'Puang Alataala Dehatammu la umpaaha mesa nabi ang sinnoaä' yaling mai di alla'na solasohontaa'. Pehingngi manahpaia' ingkänna tula'na.
23Anna menna-menna dai umpehingngii tula'na yato nabi, la dialaine' yaling mai di alla'-alla'taa' anna dipa'daii.'
24Noa tunne' ingkänna nabinna Puang Alataala ang puha umpalambi' Bahtakaranna, napatahhi' mengkalao Nabi Samuel sibala'-bala' untula' lohpo' pembabena Puang Yesus.
25Tula' ang napalambi' nabinna, dianto ang la umpomana'a'. Anna la untahimbo toukoa' taha yaling di pa'dandianna Puang Alataala pano di nenetaa'. Aka' puhang ma'kara Puang Alataala pano di Abraham naoatee, 'Aka' mesa peänä'ammu, ingkänna hupatau yaling inde di lino la kubehe.'
26Aka' yato Sabua'na Puang Alataala, napaaha yaling mai di alla'mua' anna dioa' ang handang dolu napalambi'i. Napanoa anna malakoa' nabehe, natehte mensohong yaling mai di lalang kakarakeang."
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel