Alkitab Mobile SABDA
[VER] : [ARALLE]     [PL]  [PB] 
 <<  Kisah Para Rasul 7 >> 

1Mekutanang handang pongkahana imang pano di Stefanus naoatee, "Tahpa' si'daraka pantanda'na inde mai tau?"

2Ya' ma'tula'mi Stefanus naoatee, "Ingkänna ang kupotobaha' sibaha solasohongku, pehingngii tula'ku: Tempona anna di haoke' di Mesopotamia neneta Abraham, naonge dake' tohho di hao di Haran, napa'karai Puang Alataala To Handang Matande

3naoaintee, 'Pelleio bohtomu anna solasohommu anna le'ba'o pano di mesa bohto ang la kutuhoingko.'

4Ya' mengkalao siang Abraham umpellei Tampo Kasdim, mendende pano di Haran anna tohhoi di hao. Tahpana mate ambena, nasuo bung Puang Alataala mendende di hao mai done di bohto ang taongeia' dinoa.

5Tempo donetoo, dake' aha nabea Puang Alataala tampo la mendahi mana'na moi poro la sallama'. Ampo' ma'dandi Puang Alataala naoatee, 'Pihsang tempo inde tampo la kubeao ungngampuia' sibaha ingkänna peänä'ammu.' Napanoa ma'dandi, moinnakato dake' aha änä'na Abraham donetoo.

6Mane ma'kara boi Puang Alataala pano di Abraham naoatee, 'Ingkänna peänä'ammu la mendahi to sule di hao di bohtona tau senga', la naposabua' anna la nadahha uhpa' atu' pahiamanna.

7Ampo' yato ang mamposabua' la kubala' akinna mengkalahsu' peänä'ammu sule napenombaiä' done indee.'

8Mane napakuhui Puang Alataala didiona kapotilleang tanda pa'dandianna pano di hupataunna. Ya' tahpana kahua allona dahinna Ishak änä'na Abraham, natilleng. Ishak umpadahi Yakub anna Yakub umpadahine' to sampulo derua ang mendahi peneneantaa' ingkänna to Yahudi.

9Yato sangngaka-sangngaka to siullu' umbalu' arinna disanga Yusuf mendahi sabua'na tau di hao di Mesir aka' natimbuhui. Ampo' inde Yusuf naposolai Puang Alataala

10lambi' si napakahaoing ingkänna kamasuhsaang. Tempona naonge mellambi'i Yusuf pano di Firaun, tomarayanna Mesir, nabea Puang Alataala inaha mapia anna kakeaka'ang. Nasuhung naängkä' tomarayanna Mesir mendahi bahke'na untokei kakuasaang di hao di Mesir anna ungkapalai toi ingkänna ang mengkähäng yaling di dasanna tomaraya.

11Donetoo dahing kabuhohangang di hao di Mesir anna Kanaan lambi' yato nenetaa' unsa'ding kamasuhsaang käyyäng aka' dang aha napangngalai andeang.

12Tahpana nainsang Yakub naoatee aha gandum di hao di Mesir, ya' unsuong änä'na pano. Donentoo yatoo napampahandu'i le'ba' yato neneta pano di Mesir.

13Tahpana le'ba' bumi pano kapendoanna, ya' umpepainsamming kalaena Yusuf pano di ullu'na. Lambi' inde tomarayanna Mesir ungnginsammi solasohonna Yusuf.

14Ya' umpapealang ambena inde ta Yusuf sibaha ingkänna sanghapunna mendende pano di Mesir. Donetoo pitumpulo lima tau dia asanna.

15Ya' le'ba'mi Yakub pano di Mesir. Lambi' mate di hao sibaha yato neneta ang senga'.

16Anna bahkena dibaha sumule pano di Sikhem anna dipatamai yato di ku'bu' ang puha naalli Abraham di hao mai di peänä'anna Hemor di Sikhem.

17Tempona la marungku'mi Puang Alataala umpasundung pa'dandianna pano di Abraham didiona yato tampo ang la nabea peänä'anna, ya' tuhtuang membea'mi neneta di hao di Mesir.

18Pihsananna ahang pole' mesa tomaraya senga' ang ma'pahenta di hao di Mesir, ampo' dai nainsang didiona umba napanoa ta Yusuf undului to Mesir.

19Tomaraya yatoo umpakamaho-maho neneta lambi' nadahha anna napahentai naoatee, 'Ingkänna änä'-änä'mua' ang mane sohong muane la untibei lambi' mate.'

20Donentoo yatoo naonge dahi Musa. Naitang Puang Alataala dai aha tau senga' nasinnoaing. Tallu bulanna yaling di dasang naempei to baha'na

21mane dipasohongngi dipapembuni. Ampo' naala änä'na tomaraya ang bahine anna napoänä'i sihapang änä'na toboe'.

22Inde Musa dipakuhu ingkänna kamanähänganna to Mesir, lambi' kainsangang ma'kuasa moi tula'na noa toi pembabena.

23Tahpana uhpa' pulo pahiamanna dahinna, pemalang la mao umpellambi'i solasohonna dianto to Israel.

24Pihsananna ungngita mesa to Israel nadahha mesa to Mesir, ya' napetunduing, lambi' umpatei yato to Mesir.

25Nasangang Musa la nainsammi yato solana to Israel naoatee dia ang la napake Puang Alataala mampasohong di hao mai di kasabua'ang, ampo' dae' nainsang.

26Tahpana marondonna sule bumi, ke ungngita buranne' derua tau sahing to Israel lella' siba'di. Tahpa napellambi'ing Musa aka' la napasikapiai anna naoaintee, 'O solasohongku, akana siba'dirakoa' dio? Sahing dio siangnga'!'

27Ampo' yato ang kekasalaang pano di solana umbuhsu' Musa anna naoaitee, 'Menna mangngängkä'o mendahi pongkahaki' anna la unghohto'o kaha-kahangki'?

28Umbai umpahtuyu toe' la umpateiä' sinnoa yato to Mesir ang umpatei di pehengi.'

29Nahingnginna Musa yato tula', ya' tahpa lumumpa'mi anna le'ba'i pano di Midian. Ya' di haong tohho, lambi' dahi di hao derua änä'na sahing muane.

30Tahpana puha uhpa' pulo pahiamanna, unghingnging kamahanna mesa malaeka' yaling mai di alla' dui ang naongei api meleä'-leä', di hao di ongeang makä'däng sirungku' Tanete Sinai.

31Pusa' Musa ungngita yato kadahiang. Tahpa le'ba'mi pano napendungku'i, ya' unghingnging kamahanna Puang Alataala naoatee,

32'Kodi'mitoo Dehata ang si napenombai nenemu, dianto Dehatanna Abraham, Ishak anna Yakub.' Ya' tahpa sikalalla' siang Musa anna dai nasaha mennenne'.

33Ya' ma'karang Puang Alataala naoatee, 'Lälä'i sapatummu aka' ne tampo ang ungngongei, tampo masero aka' ke'de'o di hao di oloku.

34Puhang kuita kamadahhaanna petauangku di hao di Mesir anna kuinsang kamasuhsaanna, dianto anna sulemä' la kulahpa'. Dahi maio anna kusuoo sumule pano di Mesir.'

35Dianto inde Musa ang hali dai sika natahimbo to Israel yato naonge naoaitee, 'Menna mangngängkä'o mendahi pongkahaki' anna la unghohto'o kaha-kahangki'?' Dia siang ang puha nasuo malaeka'na Puang Alataala ang yaling mai di alla' dui mendahi pongkahana ang la ullahpa' to Israel.

36Anna dia siang umbaha mensohong to Israel yaling mai di Mesir umbabe ma'hupa-hupa tanda anna ang mepusa'-pusa' di hao di Mesir, di hao di Le'bo' Malea anna pano di ongeang makä'däng uhpa' pulo pahiamanna.

37Dia toi puha ma'tula' pano di to Israel didiona Puang Yesus naoatee, 'Puang Alataala la umpaaha mesa Nabi ang sinnoaä' yaling mai di alla'na solasohommua'.'

38Anna dia siang yaling di alla'na petauanna Puang Alataala di hao di ongeang makä'däng ullombung tula'na malaeka' pano di neneta naonge ma'karai yaho di Tanete Sinai. Anna dia toboe' ang untahimbo kara ang tontong lolo ang puha napainsangngiingkea'."

39Napatahhi' bumi tula'na Stefanus pano di to mantanda' naoatee, "Ampo' dai sika naaku neneta tuhu'-tuhu'ang pano di Musa, aka' dai sika natahimbo ampo' pemala sumule pano di Mesir.

40Sika napalau pano di Harun naoatee, 'Papiaingkang sangngaka-sangngaka tau-tau ang la mala kipenombai anna ang la mampatehteang sumule, aka' dai kiinsang aka ang dahi pano di kalaena Musa ang umpatehteang yaling mai di Mesir.'

41Lambi' tempo donetoo umpapiang ang la napenombai, noa hupanna saping lundaha, mane umbahai penombaang pano anna ma'rame-ramei umpakahoa' pambabe kalaena.

42Dianto anna napengkebo'i Puang Alataala anna napatiolaii umpenombai bintäng noa ang puha tiuki' yaling di suha'na nabinna ang naoatee, 'O to Israel inang tadia Kodi' ang umpenombai anna umbahaing penombaang yaling di uhpa' pulo pahiamanna naonge di haokoa' di ongeang makä'däng.

43Aka' puhamokoa' umbaha leleng bansulinna dehata Molokh sibaha tau-taunna bintäng Refan. Dianto pampapia kalaemu ang umpenombaia'. Dahi la kuhambaikoa' le'ba' makahao pano di tando panona Babel.'

44Yato bansuli ang si naongei Puang Alataala umpellambi'i petauanna, naparende leleng neneta di hao di ongeang makä'däng. Yato bansuli nababe Musa sinnoa ang puha napahentaing anna napaitai Puang Alataala pano.

45Yato bansuli puha natahimbo neneta naonge nabahanangngi Yosua tama done inde di tampo. Donetoo yato tampo sika nakuasaing, aka' untalo ingkänna to pa'bohto ang nahambaiing Puang Alataala. Yato bansuli tontong lolo lambi' tempona Tomaraya Daud ma'pahenta.

46Inde Tomaraya Daud nabehe liu Puang Alataala. Dahi napalau umbato ke la malai umpake'de' dasang ang la naongei Puang Alataala, ang la napenombai to Israel.

47Ampo' Salomorang änä'na ang mampake'de' yato dasang.

48Ampo' dai la dioatee Puang Alataala bahtu' dioatee to Handang Matande la tohho yaling di ongeang pampapianna hupatau. Sinnoa ang natula' nabi naoatee:

49Ma'kara Puang Alataala naoatee, 'Ang di suruka Kodi' mangkuasai anna ihsinna lino kupahenta. Umba la noa hupanna dasang ang la umpake'de'ingkä', bahtu' ongeang aka la kuongei mehile?

50Tadiarakate' pampapiangku asang siang?'

51O ingkämmua' to makahha' bää' anna ang tama'pehingngi! Supungnga' umbabe umbali-bali Inaha Masero. Sinnoa neneta, noa tumokoa' dio!

52Dai aha nabi ang tala nadahha neneta. Sika umpatei pesuona Puang Alataala, ang umpepainsangnging kasuleanna To Takekasalaang. Anna dinoa dio siangnga' ang puha mambahoi lambi' umpapepateia'.

53Puha siamokoa' unghingngi pepaondona Musa ang napalambi'ingkoa' malaeka', ampo' daia' untuhu'i."

54Tahpana sika nahingngi To Mahkeada' ingkänna yato tula', sangka' keaha'mi anna ungkiki' isinna pano di Stefanus.

55Ampo' naposolai Inaha Masero inde Stefanus lambi' mentonga dai' di suruka anna ungngitai kamatandeanna Puang Alataala sibaha Puang Yesus ke'de' yaho di tandoi kuananna, bahtu' dioatee ongeang kakeangka'ang.

56Tahpa ma'karang naoatee, "Nenne'ia' ungngitaä' suruka tibilläng anna Änä' to Lino ke'de' yaho di tando kuananna Puang Alataala."

57Ampo' sangka' untimping talinganna anna sika kohai napekäyyängngi, mane mengkahtibei ullebo Stefanus.

58Sika nahui'mi tama di aneang bohto anna nasisaleba'-leba'i batu. Ingkänna yato ang mansaleba'i umpatoko kaya' kalambe'na di hao di olona mesa änä' muane disanga Saulus ang mampongkahai.

59Yatoo lella' nasisaleba'-leba'i, ma'sambayammi Stefanus napekäyyängngi, naoatee, "O Puang Yesus, tahimboi sungnga'ku!"

60Sitonda malimuntu' anna metamba napekäyyängngi naoatee, "O Puang, daa umpasuhungngii inde dosa pano inde di tau." Puhai naoa, ya' pohsu'mi penanahanna.



 <<  Kisah Para Rasul 7 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel