1Donetoo mai'di liu tau ullebo Puang Yesus, lambi' siindä'-indä' kale aka' sihpi' liu. Lella' sisihpi'-sihpi' yato tau mai'di, ya' ma'tula'mi Puang Yesus pano di pahsikolana naoatee, "Madakakoa' pano di raginna to Farisi! Bahtuanna pepakuhu kakalasiannaii.
2Daete' aha aka-aka ang titutu' tala tibuhke; noa tunne' daete' aha kaha-kaha ang tibuni tala diinsang ke dako'mi.
3Ingkänna ang hali untula' ang dake' maleso liu, sihapang yaling di kamalillingang, la dipamapekalesoing pano di ingkänna tau, sihapang yaling di kamabayaang. Anna aka ang hali ungkuti' tama di talinga la dipekäyyängngi lambi' nainsang ingkänna tau.
4Kutula'ingkoa', ingkänna sammuaneku, daa ummahea' pano di tau ang supung mala umpatei bätäng kalae ampo' dai mala membabe la'bi anna yatoo.
5La kutula'ingkoa' menna setonganna ang pahallu ungkahea'. Dianto pahallukoa' supung mahea' dai' di Puang Alataala ang dai supung mala umpatei bätäng kalae ampo' mala tuke' natibe tama di api nahaka. Kupakaenga' salakangkoa' kuoaingkoa'tee: Diangnga'to supu kahea'i.
6Mapiaa' ungnginsang, moinnakato masempo si'da-si'da allinna lima dena', ampo' datoete' la dioatee, nakalimpängnging Puang Alataala moi la mesa.
7Londonangnga' dio, moi lamba' beluhä'mu puha tung naihsa' asang. Dianto anna dakoa' pahallu mahea', aka' keangka' puharakoa'to dio andana mai'di dena'.
8Menna ang mangngakuiä' di hao di olona tau senga', la kuakui toe' di hao di olona semalaeka'anna Puang Alataala.
9Ampo' menna ang mambahoiä' di olona tau, la kubahoi toete' di olona semalaeka'anna Puang Alataala.
10Ponna aha tau ang ma'tula' napa'baliä' Kodi', inde Änä to Lino, ya' mala siake'te'ne' diampungngi. Ampo' pano di tau ang ma'tula' tahuhu umpa'bali Inaha Masero inang daine' la diampungngi.
11Ponna dibehokoa' pano di to pampahehsa yaling di pa'limboanna pebulle ada', bahtu' pano di to pa'pahenta anna to pa'kuasa, anna malai napahehsa aka kasalaammu, daaa' ummasuhsa didiona aka bahtu' umba la umpanoa ma'tula' mengngolo pano diii.
12Aka' donetoo inang la naposolaikoa' Inaha Masero ma'tula' aka ang pahallu untula'a'."
13Aha mesa di alla'na yato tau mai'di ma'tula' pano di Puang Yesus naoatee, "O Tuang, kalemuiä' pa'karaiingkä' ullu'ku anna malai nabea touä' kodi' piha ahtasa'ki' ang napatohhoingkang to baha'ki'."
14Ampo' natimba' Puang Yesus naoaintee, "O sammuane, dä' aha diängkä' la mendahi to pambahe ahtasa'mua'."
15Nalombungngike' tula'na pano di ingkänna tau ang aha donetoo naoatee, "Madaka manahpakoa', andamu la pemala supu untombong ahtasa', aka' moinnakato anna mai'di ahtasa'na mesa tau, ampo' daete' dioatee diang ang la umpamahendeng katuhoanna."
16Mane napatahhi' boi tula'na untula' mesa pohapangang naoatee, "Aha mesa to makaka ang mai'di liu tampona. Yato tampona malambu liu lambi' ingkänna pinamulanna keboa mapia asang liu.
17Pihsang tempo mekutanang yaling di inahanna naoatee, 'Aka inde ang pahallu kubabe anna malai aha kupantombongngi ingkänna boana pinamulangku?'
18O' io, la kupanoa indee: la kutalei asang ingkänna lokoku ang sisaohko', mane kupake'de' salai loko ang sikäyyäng anna malai kupambe'bei asang ingkänna boa pinamulangku anna ingkänna ahtasa'ku.
19Puhaitoo, ya' la kutula'mi pano di kalaeku kuoatee: Mai'di si'da-si'da ahtasa'ku dinoa, mala kuande anna kuenu' ma'taung-taung masaena. Dahi la ma'masannang-sannangngä' pole' mengkalao dinoa, umpesanta'i andeangku!'
20Ampo' ma'tula' Puang Alataala naoaintee, 'O to maho, dinoa siang di bengi la mateo. Dahi mennang ne la umpesannangngi ingkänna ahtasa'mu ang masae allong untombongnging kalaemu tobou dio?'
21Noanto katämpä'anna tau ang supung pemala untombong ahtasa' kalaena, ampo' daine' aha kasikenteanna dai' di Puang Alataala ang setonganna keangka' puha nei'."
22Ma'tula'mi Puang Yesus pano di pahsikolana naoatee, "Dahi kutula'ingkoa' dinoa kuoatee: dakoa' pahallu masuhsa umpihki' katuhoammu, hapanganna aka ang pahallu ungngande. Anna datoukoa' pahallu masuhsa umpihki' bätäng kalaemu, hapanganna yato aka ang pahallu umpake.
23Darakaa' dio ungnginsang pahallu puhaete'ne' katuhoang andana andeang? Noa tunne' pahallu puhaete'ne' bätäng kalae andana pakeang.
24Itarea' karoaya; daine' nainsang mopinamula anna datoe' nainsang la umpepahe pinamulanna, londonang la umpailoko boa pengkähänganna. Ampo' tontong ture' motuho-tuho lolo aka' napakande Puang Alataala. Darakaa' dio ungnginsang keangka' puha tubumokoa'to dio andana sedansiang.
25Aharakaa' di alla'-alla'mu ang mala umpakalambe' sungnga'na moi poro santehte'mi aka' bata-bata didiona katuhoanna?
26Dahi ponna ke moia' dio kaha-kaha ang handang saohko' dang mala umbabe, ya' akana la masuhsakoa' umpihki' ang senga'na?
27Pekalesoia' bunga ang tuho tomande' pano di alla' kalane. Dai aha mengkähäng bahtu' untannung pakeanna, ampo' kutula'ingkoa' dinoa, moinnakato to makahka' si'da-si'da Tomaraya Salomo, ampo' daete' aha yaling di katuhoanna la umpake pakeang mahahsa' ang umpensinnoai mahasanna inde pano bunga di alla' kalane.
28Dahi aka' mala ture' napamalehke' Puang Alataala yato bunga ang tuho dinoa ampo' la naande siang api marondonna, ya' londonangnga'te' dio ang kuhang kapampetahpa'ammu mala turakoa'to dio nabea asang aka ang umpahallu.
29Dahi datomande'a' pahallu semata la umpihki' yato aka ang la ungngande anna ang la ungngenu'; anna daa umpamasuhsaia' inahammu.
30Aka' ingkänna asang yatoo napeäng tau ang dai ungnginsang Puang Alataala. Ampo' dioa' dio, inang nainsandea'to dio Ambemu ingkänna kapahalluammu.
31Ampo' diarea' nei', ang handang pahallua' dolu la umpihki' dianto: kapahentaanna. Ponna umpanoa, ya' kapahalluammu la napasundungngingkoa'.
32Moinnakato anna sai'di'koa' supu, ampo' daa ummahea' aka' inang la nabearakoa'te' Puang Alataala Ambemu yato kapahentaanna.
33Dianto anna kuoatee, balu'ia' ingkänna ahtasa'mu anna umbeaia' allinna pano di to pemase-mase. Aka' ungngolai pembabe ang noa yatoo, umbe'beia' ahtasa'mu yaho di suruka ang dai la aha puhanna, ang mala dipasihapang dompe' ang inang dai la aha karake, dai aha la naboko to paboko anna dai la aha nakarakei bu'bi'.
34Dianto anna kuoatee, be'beia' ahtasa'mu yaho di suruka, aka' umba naongei aha ahtasa'mu, di hao tunto nei' naongei inahammu."
35Napatahhi' bumi tula'na Puang Yesus naoatee, "Pahallukoa' madaka lolo, payaling loloi pakemu anna papuhpu loloi lampummu.
36Anna pahallukoa' umpensinnoai mesa sabua' ang sadia lolo ungngempei kasuleanna pongkahana di hao mai di pa'rame-rameang kakabengang, anna malai, ke suleng yato pongkahana, la tahhi' umbuhkeiing baba, dai mangki' mende'de' masae.
37Kahsi si'da-si'dane' sabua' ang madaka nalambi' pongkahana. Kutula'ingkoa' setonganna yato sabua' la umpatama pakena anna umpakandei yato pongkahana anna natahiai manahpai.
38La kahsi si'da-si'da yato sabua' ke nalambi'i pongkahana madaka anna sadiai di tempona sule yato pongkahana, moi sule di tängngä bengi bahtu' sule dake' mebengngi'.
39Ampo' pengnginsangngiia' indee: Ponna aha mesa puäng dasang ang inang nainsammi tehte' sangngaka la sulei to paboko, tantuntee' anna dai aha napabei yato to paboko mentama di dasanna.
40Noanto pahallu toukoa' dio sadia lolo aka' Kodi' inde Änä' to Lino la suleä' di tempo ang daia' ungnginsang."
41Mekutanang Petrus naoatee, "O Puang, kami'raka ne supu ang nahoa pohapangammu, bahtu' ingkännaraka inde mai tau?"
42Natimba'mi Puang Yesus yaling di mesa pohapangang naoaintee, "Ang dioainte sabua' ang tuhu'-tuhu'ang anna manähäng, dianto ang la naängkä' pongkahana umpongkahai anna la umpakande ingkänna sabua' ang senga' ke lambi'mi tehte' ang sihatang.
43La kahsi liu yato sabua' ang nalambi' pongkahana ungkähäng manahpa kähänganna naonge sulei yato pongkahana.
44Kutula'ingkoa' setonganna yato pongkaha la umpetahpa' yato sabua' lambi' la naängkä' mendahi to pandaka ingkänna aka-akanna.
45Ampo' sabua' ang karake inaha, la naoane'te yaling di pihki'na, 'Poso aka' masaeke'ne' mane sumulei pongkahaku, dahi beba'ä' aka siamo kubabe.' Ya' napahandu'mi undahha ingkänna sabua' senga' ang nasibahaing mengkähäng, moi muane moi bahine, anna maoi ma'masannang-sannang mande, menu' anna ma'malango-lango.
46Pihsananna sumulee' yato pongkahana di tempo ang dai nainsang. Lambi' yato sabua' la nadahha si'da-si'da yato pongkahana. Napasinnoa kamadahhaanna ingkänna tau ang dai mampetahpa' dai' di Puang Alataala.
47Noa tunne' sabua' ang nainsang siang aka pangkärä'na pongkahana ampo' dai sadia anna dai nababe yato aka pangkärä'na pongkahana, ya' inang la nadahhaete' yato pongkahana.
48Ampo' pano di sabua' ang inang daine' nainsang aka pangkärä'na pongkahana anna membabei aka ang dai nakärä'i pongkahana, ya' dasiaete'ne' la nadahha sakali. Pano di tau ang mai'di dibea aka-aka, la mai'di toete' dipemitaiing anna pano di tau ang dipetahpa' tatoo, ya' mai'di toete' dipemitaiing."
49Napatahhi' bumi tula'na Puang Yesus naoatee, "Kasuleangku tama inde di lino dianto anna malaä' umpapuhpu api. Mahasa liu kusa'ding ke puhpung yato api.
50Ahake' kamadahhaang käyyäng ang pahallu kuoloi, dianto ang umpamakekung inahangku dolunna kuoloi yato kamadahhaang.
51Umbai unsangaa' tamaä' inde di lino la umbaha kasikapiaiang, ampo' setonganna dai. Tadia kasikapiaiang ang kubaha sule, ampo' setonganna kasikallaang.
52Napahandu' dinoa la aha kasikallaang yaling di mesa dasang. Hapanganna yaling di mesa dasang aha lima tau: yato to tallui la umpa'bali yato to deruai, bahtu' to deruai umpa'bali yato to tallui.
53La sika sikalla-kalla: to dipoambe la umpa'bali änä'na ang muane anna yato änä'na ang muane la umpa'bali ambena. Noa tunne' to dipoindo la umpa'bali änä'na ang bahine anna yato änä'na ang bahine la umpa'bali indona. Noa tunne' pasanang bahine la umpa'bali manintunna ang bahine anna yato manintunna ang bahine la umpa'bali pasananna ang bahine."
54Ma'tula'mi Puang Yesus pano di tau mai'di naoatee, "Ponna ungngitaa' malilling kalane, ya' ungnginsangnga' ungngoate la kene', anna ahana inang la kene' si'da.
55Anna ponna unsa'dingnga' pepahi ma'tantu, ya' ungnginsangnga' ungngoatee, la mapana' allo, anna inang la noa si'da yatoo.
56Oa' ingkämmu to pa'manähäng-nähäng, supungnga' ungnginsang ullosa tanda kalane yaho di langi' ampo' bilang daia'ne' ungnginsang ullosa aka ang la dahi di tempo dinoa.
57Anna datoia' mala umbohtu tobou dio kaha-kaha ang tahpa' ang pahallu untindo'ia'.
58Ponna hapang aha mesa tau manghahpo'koa' pano di to pambohtu kaha-kaha, ya' dotangnga'te' umpengkalambi'-lambi'i sikapiai yato tau ang la manghahpo'o naonge mengekangkoa' yaling di pellaoang. Ponna daia' umpanoa, ya' la napapengngolokoa' pano di olona to panghohto', anna yato to panghohto' la napapengngolokoa' pano di polisi ang la mampatamakoa' di tahungkung.
59Kutula'ingkoa', inang darakoa'te' la mala nalahpa' yaling yato mai di tahungkung ke dai umbaya' asang dolu yato indammu."
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel