1Donetoo aha sangngaka-sangngaka tau ang ma'tula' pano di Puang Yesus didiona to Galilea ang napatei Pilatus naonge mengei umpenombaing penombaang dai' di Puang Alataala.
2Natimba'mi Puang Yesus naoaintee, "Unsangarakaa' dio mai'di puhane' ne dosanna to Galilea ang napatei Pilatus ullondoi dosanna to Galilea ang senga' aka' sika dipateine' noa nee?
3Kutula'ingkoa' setonganna, daetee'! Ampo' ponna ke daia' ungngaku mengkatoba', ya' inang la noa turakoa'to dio.
4Bahtu' umbarakaa'to noa pihki'mu didiona yato sampulo kahua tau ang nakaloei candi malängkä' yaho di Siloam? Umbai unsangaa' madosa puhane' andana ingkänna tau senga' ang tohho yaho di Yerusalem.
5Kutula'ingkoa' daetee'! Ampo' ponna ke daia' ungngaku mengkatoba', ya' inang la hopu turakoa'to dio sinnoaii."
6Puhai yatoo ya' ma'tula'mi Puang Yesus yaling di pohapangang naoatee, "Aha mesa puäng bela' ang aha tuho di bela'na mesa poang ara. Ya' maong pano di bela'na la undaka' boana yato kayu, ampo' dai aha nalambi' moi poro la mesa.
7Ma'tula'mi pano di to pandaka bela' naoatee, 'Tallung taunna semata kueka' boana inde poang ara ampo' daloloi aha keboa. Dahi bilang lelleng pihsangngi, aka' ullimbi kale pinamula senga' takekuna!'
8Mentimba'mi yato tau naoatee, 'O Tuang, pabei siake' tuho sahtaung, la kusändä' kubingkungngi lipu' anna kupupu'i.
9Umbato ke malai keboa taung sala. Ponna dai, ya' dotante' bilang dilelleng.'"
10Pihsang tempo di allo katohhoang Puang Yesus lella' mampakuhu yaling di mesa pa'sambayangang.
11Donetoo di hao yato di ongeang aha mesa bahine ang sampulo kahuang taunna nadahha setang lambi' bingku' napobua' koronna ang dang mala ke'de' maroho.
12Tahpana naita Puang Yesus yato bahine, ya' natambaing anna naoaintee, "O indona, bono'mi korommu dinoa."
13Puhai yatoo, ya' nasahpang Puang Yesus, ya' ke'de' siang maroho-roho yato bahine anna umpamatandei sanganna Puang Alataala.
14Naitanna yato kapala pa'sambayangang aka ang nababe Puang Yesus, ya' keaha' liung aka' donetoo allo katohhoang anna ma'tula'i pano di tau mai'di naoatee, "Aha unnung allona tempona tau mengkähäng, dahi sulekoa' di allo yatoo anna dipabono'o, ampo' daane' ke di allo katohhoangngi."
15Ampo' natimba' Puang Yesus naoaintee, "Oa' ingkämmu to kalasi, darakae' si ullahpa'koa' patuhoammu di allo katohhoang anna do unghendengngi do umpaenu' pano di limbeng?
16Darakae' sihatang toe' inde bahine, ang sampulo kahuang taunna nadahha setang, dilahpa' di hao mai di kamadahhaanna, londonang aka' inde bahine peänä'anna toe' Abraham!"
17Menge ma'tula' noa yato Puang Yesus, ya' sangka' masili asammi yato tau ang mampa'bali, ampo' yatone' ingkänna tau mai'di sika kahsi nei' anna masannang liu ungngita yato aka ang nababe Puang Yesus ang mepusa'-pusa'.
18Ma'tula'mi Puang Yesus naoatee, "Akake' la dipasinnoaing Kapahentaanna Puang Alataala? Bahtu' pohapangang umba ang la mahasa dipasinnoai?
19Kapahentaanna Puang Alataala sihapang sallisa' batunna pinamula ang handang saohko' ang napamula tau pano di bela'na. Moinnakato anna saohko'i yato batu pinamula, ampo' ponna tuhong, ya' mala untondong asang ingkänna pinamula ang senga', anna mala toi malängkä' sinnoa poang kayu. Lambi' sulei sedansiang anna mesehängngi dai' di tangkena, tanda käyyänna."
20Naoa buntee, "Akake' la kupasihapangnging Kapahentaanna Puang Alataala?
21Sihapang bibi' roti ang naala mesa bahine anna napasiuyä'i mai'di tahpung lambi' mala membea' asang yatoo."
22Ya' le'ba'mi Puang Yesus mao dai' di Yerusalem, ampo' mampakuhu lao siang yaling di pellaoanna. Dahi ma'kuliling leleng ullelengngi bohto, noa ang mahoa', noa ang saohko'.
23Ahang mesa tau mekutana pano naoatee, "O Puang, la sai'di'rakae' supu tau ang la dipasalama'?" Natimba'mi Puang Yesus naoaintee,
24"Poinahaia' anna malao mangngola tama di baba masihki'. Aka' kutula' manahpaingkoa', mai'di liu tau pemala mangngola tama yato di baba masihki' ampo' dai sika mala tama.
25Ponna ke kalehang yato puäng dasang anna untana'mi babana, ya' la sika ke'de'mokoa' yaling di aneang anna sika tambakoa' ungngoatee, 'O Tuang, kalemuiang buhkeiingkang babamu!' Ampo' la natimba'koa' supu naoatee, 'Dakoa' kuinsang umba ungkasulei.'
26Ya' la ungngoa salangnga'tee, 'Umba isanga? Sanga haliingkea' mande anna menu' sibaha-baha anna hali touo mampakuhu di lalang käyyäng yato di bohtoki'?'
27Ampo' la naoaingkoa'tee supu, 'Mennarakakoa' dio? Dakoa' kuinsang umba ungkasulei. Dahi palaikoa' done nee, aka' diongnga'to ne ang si umbabe katasampa'ang.'
28Ponna ke ungngitamokoa' Abraham, Isak anna Yakub sibaha ingkänna senabiang masannang yaling di Kapahentaanna Puang Alataala, ya' la sikaumbumokoa' dio salamang ang kamateang aka' la dihambaikoa' dio yaling mai.
29Anna la sule toune' mai'di tau yaling mai di katimbingang allo anna di lau' mai di katempu'ang allo anna di hao mai di utara anna selatang, anna sika ohko' toine' ma'rame-rame yaling di Kapahentaanna Puang Alataala.
30Ampo' inang la aha tau ang handang katämpä' dinoa la mendahi ang handang uhuna mentama di Kapahentaanna Puang Alataala, anna la aha tau ang handang uhuna dinoa la mendahi ang handang katämpä'."
31Donetoo suleng sangngaka-sangngaka to Farisi anna ma'tula'i pano di Puang Yesus naoatee, "Dotanne' laoo, pellei inde ongeang aka' mopahtuyu Herodes la napateio."
32Sika natimba'mi Puang Yesus naoatee, "Palambi'ingkä' tula'ku pano ne di to pa'manähäng-nähäng oaintee, 'Dinoa anna marondong la umpabono'kä' to makorong anna la unghambaikä' setang anna ponna ke allo katallunnang, ya' kupapuhang yato ingkänna kähängangku.
33Ampo' dinoa, marondong anna dirombengi la umpatahhi'kä' pellaoangku, aka' inang Yerusalem loloete' supu ang naongei dipampatei ingkänna nabi.'
34Oa' ihsinna Yerusalem, palla'e dio inahammu umpatei ingkänna nabi anna unsaleba'i piha batu ang setonganna disuoingkoa' sule! Masae allong pemala liuä' la unghimpung ingkänna petauammu anna malai kudakai, sihapang indo mane' ang unsalohko'i änä'na di hoi' di pani'na, ampo' daia' ungngaku.
35Dianto anna napelleimokoa' Puang Alataala lambi' mahulla-hulla Dasang Ada'na. Pengkakalehaiia', mengkalao dinoa inang dämä' aha la ungngita lambi' ma'tula'koa' ungngoatee, 'Dibehene' tau ang sule yaling di sanganna Dehata.'"
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel