Alkitab Mobile SABDA
[VER] : [ARALLE]     [PL]  [PB] 
 <<  Lukas 21 >> 

1Yaling yato di Dasang Ada'na Puang Alataala naitang Puang Yesus yato ingkänna to makaka pantang sika umpatama derema di pahti derema ang aha di behing baba.

2Naita tunne' mesa balu bahine ang memase-mase anna umpatamai derua doi' bahsi, dianto doi' ang handang sai'di'.

3Ya' ma'tula'mi Puang Yesus naoatee, "Kutula'ingkoa' setonganna inde deremana balu bahine keangka' puha nei' andana deremana ne pano to makaka.

4Aka' ne pano to makaka umpoderema nei' la'bi katomakakaanna, ampo' indene' kasi to pemase-mase ulluhpe' nei' doi'na napoderema ang setonganna la napotuho."

5Donetoo aha di alla'-alla'na pahsikolana ang unsitula'i umba noa malehke'na yato Dasang Ada'na Puang Alataala aka' dibunga-bungai umpake batu maleke anna ma'kahupa-hupa pebea ang dibeho dai' di Puang Alataala. Ya' ma'tula'mi Puang Yesus naoatee,

6"Kutula'mingkoa'te' dinoa, indo batu ang ungngitaa' sipapa'-papa' manahpa daete' la noa lolo; ingkänna indoo la titale-tale asang ke dako'mi."

7Mekutanang pahsikolana naoatee, "O Tuang, pihhang ne la dahii ang untula', anna umba noa tanda-tandana ke la dahing nee?"

8Natimba'mi naoatee, "Madaka lolokoa' andana napasähsä'lalangkoa' tau senga'. Aka' mai'di tau la kende' umpake sangangku anna naoaitee, 'Kodi'mi to indee ang ungngempeia'! Dang masae anna tallammi lino.' Daa untindo'i yato tau.

9Anna ponna unghingngia' kaheba didiona to sitolla', bahtu' moi unghingngia' oninna, ya' dakoa' la pahallu mahea'. Aka' ingkänna yatoo inang pahallu la dahi ampo' tadiake' tempona la tallang lino."

10Napatahhi'ke' tula'na pano diii naoatee, "Bohto ang mesa la kende' umbali bohto senga', anna katomarayaang ang mesa la kende' umbali katomarayaang senga'.

11La aha lino' käyyäng di umba-umba naongei. Noa tunne' la kende' kabuhohangang anna korong silele ang tamahamu'. La dahi toi tanda-tanda yaho mai di langi' ang mepakahea'-hea'.

12Ampo' dolunna la dahi ingkänna indee, la disahkakoa' anna la didahha tuhokoa', mane dipapengngolokoa' pano di tomaraya bahtu' to pa'kuasa ang senga'. La dihohto'koa' yaling di pa'sambayangang mane dipatamakoa' di tahungkung aka' mampetahpa'koa' mai di Kodi'.

13Doneto yatoo la aha tempomu ungngongeia' unsa'biiä' di olona tau.

14Ampo' datomande' umpihki'ia' yaling di inahammu aka ang la ungngoa pano di tau ang manghohto'koa'.

15Aka' Kalaeku ang la mambeakoa' tula' ang la sihatang untula' sitonda kakeaka'ang, lambi' ingkänna balimmu dai mala umbahoi yato aka ang untula'.

16Donetoo yato to baha'mu, ullu'mu, pa'solasohongammu anna ingkänna solamu la nabehokoa' pano di to panghohto' anna ahaa' piha di alla'mu la napatei.

17La mai'di tau mangkahi'di'koa' aka' untindo'ä'.

18Ampo' moinnakato noa, ya' dakoa' la aha maaka; moi poro la sallamba' beluhä'mua' dang la aha tituli.

19Anna ponna tähängnga' kapampetahpa'ammu, ya' la salama'koa'too."

20Napatahhi' bumi tula'na Puang Yesus naoatee, "Ponna ungngitamokoa' setantaraang ungkapupu' Yerusalem, ya' kalehaiia'too la lambi'mi tempona la sitale-tale.

21Donetoo ingkänna tau ang aha dinne di Yudea pahallu la malai siang dai' di bohto mahulla-hulla anna dai dipatei. Anna tau ang tohho yaling di bohto mahoa' pahallu le'ba'i umpasalama' kalaena. Panone' di tau ang inang tohho di aneanna bohto mahoa', dai la mala maoke' pano di bohto mahoa'.

22Aka' doneto yatoo ang dioainte tempo kamadahhaang, anna malai sundung asang aka ang inang tiuki' yaling di Suha' Masero.

23Donetoo la madahha si'da-si'da nasa'ding to dipoindo ang sipatu menge kehähtäng, noa tunne' ang keänä'-änä' maleake', aka' inde bohto la nahoa katilakaang käyyäng anna kamadahhaang pano di tau.

24Aha piha tau ang la dipatei umpake pa'dang, anna aha piha ang la ditahungkung sau di bohto makahao, anna inde Bohto Mahoa' Yerusalem la naindä'-indä' ingkänna tau ang tadia to Yahudi, lambi' sundung yato tempo ang puha napama'tantu Dehata didiona Yerusalem."

25Nalombungngi bumi tula'na Puang Yesus naoatee, "La aha ma'kahupa-hupa tanda ang dahi yaho di langi' noanna mata allo, bulang anna bintäng. Anna yaling inde di lino la mahea' asang ingkänna tau anna pusa' ungngita bombang tamahamu' di le'bo' ang nasau pepahi.

26Ingkänna hupatau la sikalalla' kale bukunna tandana mahea' umpihki' aka ang tamahamu' ang la dahi yaling inde di lino, aka' ingkänna ang landa' yaho di langi' la sisähä'-sähä'.

27Donento yatoo ingkänna tau la naitaä', Kodi' inde Änä' to Lino, sule yaling di alla'-alla'na salehu' sitonda kakuasaang anna kamatandeang käyyäng.

28Ponna ke napahandu'mi dahi ingkänna yatoo, ya' ke'de'mokoa' anna sika tongakoa' dai' di langi' aka' bahtuanna marungku'mia' kasalama'ammu."

29Mane napake pohapangang Puang Yesus naoatee, "Alai mesa pohapangang pano di poang ara. Monna napahandu'mi mentahe', bahtuanna dang masae anna la kulla' bantimmi.

30(21:29)

31Noa tunto nei', ponna ungngitamokoa' tanda ang puha kupakalesoingkoa' langngena', la ungnginsammi ungngoatee marungku'mi tempona Puang Alataala ma'pahenta sihapang tomaraya.

32Kutula'ingkoa' setonganna ingkänna tau ang tuho tempo dinoa inang dake' la hopu asang akinna dake' dahi ingkänna inde aka ang mane kutula'.

33Langi' anna lino la tallang, ampo' ingkänna aka ang kutula' la tontong lolo nei' lambi' sapano-panona.

34Dakaikoa' kalaemu andana daia' supu ma'rame-rame anna menu' ma'mahoa'-hoa' anna supung umpihki' aka ang umpahallua'. Aka' daa-daa pihsa'koa' napatungke'du' kasuleangku lambi' dakoa' sadia.

35Aka' inde ang kutula' la unghoa asang ingkänna to lino.

36Madaka lolokoa' sitonda sambayang anna malakoa' lahpa' di hao mai di ingkänna katilakaang ang la dahi donetoo, anna mala toukoa' tähäng mengngolo di Kodi' inde Änä' to Lino."

37Donetoo ponna di allo, ya' si mampakuhu Puang Yesus tama di Dasang Ada' ampo' ponna di bengi, ya' si maone' bete' di mesa tanete ang disanga Tanete Zaitun ma'bengi di hipe.

38Anna ponna mebengngi'-bengngi'mi, ya' suleing ingkänna tau tihimpung di hao di Dasang Ada' sika umpehingngii pepakuhunna.



 <<  Lukas 21 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel