1Donetoo suleing sangngaka-sangngaka to Farisi anna to Saduki pemala la sika unsändä'i Puang Yesus. Sika malau pano ke la malai napaitai mesa tanda ang mepusa'-pusa' anna malai sika nainsang naoatee sule si'daraka yaho mai di Puang Alataala.
2Ampo' mentimba' Puang Yesus naoatee, "Ponna ungngitakoa' langi' malea di maloe, ya' ungngoaa'tee la kulla'.
3Anna ponna ungngitakoa' langi' malea di mebengngi' sitonda salehu', ya' ungngoaa'te la kene'. Dahi, ungnginsangnga'ne' ullosa tanda kalane yaho di langi' ampo' bilang daia'ne' ungnginsang ullosa aka ang la dahi di tempo dinoa.
4Diongnga'to inde tau karake anna daia' ungngaku umpetahpa'ä', anna la pemalakoa' ungngita tanda ang mepusa'-pusa' ang kubabe? Inang dakoa' la kupaitai. Supungnga'te' tanda didiona Nabi Yunus ang mala dipaitaikoa'. " Puhai ma'tula' noa, ya' le'ba'mi umpellei yato ingkänna tau.
5Menge sika molopi ullambang yato Le'bo' Galilea pahsikolana Puang Yesus, mane nakalehaii dae' aha sika umbaha roti ang la naande.
6Ma'tula'mi Puang Yesus pano diii naoatee, "Madakakoa' pano di raginna to Farisi anna to Saduki."
7Sika napihki'mi aka bahtuanna anna ma'tula' noai, lambi' sipa'kara-kara naoatee, "Aka' umbai daingkea' umbaha roti."
8Tahpana nainsang Puang Yesus yato ang sika nasitula'-tula'i, ma'karang pano diii naoatee, "Oa' ingkämmu ang dai kanna' kapampetahpa'ammu, akana unsitula'-tula'irakoa' dio yato roti ang dai umbaha?
9Dasiake'a' mala umpähäng kakuasaangku? Darangkaa' dio ungkalehai umba noa yato lima roti mala umpaboho limang sa'bu tau anna mai'di tuke' la'binna ang unghimpungnga'?
10Noa tunne' yato pitu roti ang umpaboho uhpa' sa'bu la'bi tau anna mai'di tuke' la'binna ang unghimpungnga'?
11Akana darea' dio umpähäng? Aka' inde ang kutula' daete' aha kasilombunganna ne roti ang mengea' unsibehta-behtai. Aka' kuoae Kodi'te, 'Madakakoa' pano di raginna to Farisi anna to Saduki.'"
12Donetoo mane sika napähängngi pole' tadiae' yato ragi pebolo roti ang natula' Puang Yesus, ampo' pepakuhunnae' to Farisi anna to Saduki.
13Tahpana sika lambi' Puang Yesus sibaha pahsikolana pano di mesa ongeang ang sirungku' Bohto Kaisarea Filipi, ya' mekutanang pano di pahsikolana naoatee, "Situhu' tula'na tau ang unghingngia', mennaä' Ko are' inde Änä' to Lino?"
14Sika mentimba'mi naoatee, "Aha ang mansangao Yohanes to Pantero', aha toe' ang mansangao Nabi Elia, aha toe' piha ang mansangao Nabi Yeremia bahtu' mesa di alla'na yato nabi-nabi ang aha dolu."
15Ya' mekutana sala bumi Puang Yesus pano diii naoatee, "Ampo' ponna dioa', mennaä' Ko indee?"
16Mentimba'mi Simon Petrus naoatee, "Dio, Tuang, To Dilanti' la Mepasalama', Änä'nao Puang Alataala ang tuho."
17Ma'tula'mi Puang Yesus pano naoatee, "Kahsio, Simon änä'na Yunus, aka' ne ang untula' daete' sule di hao mai di pihki'na hupatau ampo' suleete' yaho mai di Ambeku Puang Alataala.
18Kutula' touingko mating: dionto Petrus, bahtuanna: batu, anna yaho di hahona inde batu la kupake'de' pa'alloangku, bahtuanna ingkänna tau ang la mentindo' pano di Kalaeku. Anna dai aha la mantalo moi kakuasaanna kakarakeang.
19Pano di dio la kubeao kakuasaang umbahanang petauangku, lambi' aka ang ullahang dai mala nababe tau yaling inde di lino la nalahang toete' Puang Alataala yaho di suruka. Anna aka ang umpabei dibabe yaling inde di lino la napabei toete' Puang Alataala yaho di suruka."
20Puhai yatoo, ya' ullahang si'da-si'dang ingkänna pahsikolana anna malai dai napepainsangnging pano di tau senga' naoate Puang Yesus dianto To Dilanti' la Mepasalama'.
21Mengkalaonto donetoo napahandu'mi Puang Yesus untula'ing pahsikolana didiona kamadahhaang ang pahallu naolai, naoatee, "Dang masae anna la maomä' dai' di Yerusalem anna ungngolaiä' mai'di kamasuhsaang di hao mai di setobaha'ang, kapala-kapala imang anna to pampakuhu ada' lambi' la dipateiä'. Ampo' yaling di tallu allona la tuhoä' sumule."
22Nahingnginna ta Petrus umba noa yato tula'na, ya' nahui' siang pano di behinna anna napa'karaii naoaintee, "Daa Puang! Inang dai la napabei Puang Alataala ingkänna ne ang untula' la dahi pano di Kalaemu!"
23Ya' mensaile siang Puang Yesus unsaile ta Petrus anna naoaitee, "Palaio done indee, Pongkahana setang! Menge ungkalapai pa'elo'na Puang Alataala pano di Kalaeku, aka' dao dio umpihki' aka ang napihki' Puang Alataala, supung ang napihki' to lino."
24Mane ma'kara boi Puang Yesus pano di pahsikolana naoatee, "Tau ang la pemala mampentindo'iä' pahallu ungkalimpängngi pangngelo'na toboe' sibaha umbulle kayu sitambeng, mane napentindo'iä'.
25Aka' menna ang pemala umpamahendeng katuhoanna, la bilang mateetee'; ampo' menna ang tontong mampetahpa' moi dipatei aka' Kodi', dianto ang la dipasalama' sungnga'na.
26Dai aha suhunna mesa tau untahongkongngi ingkänna aka-aka ang aha yaling inde di lino ke dasiang la salama' sungnga'na. Aka' dai aha la mala nabea mesa hupatau ang la napopangngalli tama di suruka.
27Aka' Kodi' inde Änä' to Lino la suleä' yaling di kamatandeanna Ambeku natindo'ä' ingkänna malaeka'ku. Tempo donento yatoo, ingkänna tau la kubala' situhu' pembabena.
28Kutula'ingkoa' setonganna yalingnga' inde di alla'-alla'mu dinoa aha sangngaka-sangngaka tau ang dai la mate, dolunna sika naitaä' Kodi' inde Änä' to Lino kupahandu' ma'pahenta sihapang tomaraya."
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel