Alkitab Mobile SABDA
[VER] : [ARALLE]     [PL]  [PB] 
 <<  Matius 21 >> 

1Tahpana la lambi'mi Puang Yesus anna pahsikolana dai' di Bohto Betfage yaho di Tanete Zaitun sidungku' Yerusalem, ya' unsuong derua pahsikolana mendolu

2anna naoaintee, "Pendolumokoa' dai' indo di bohto ang landa'. Ke lambi'mokoa' dai', la ungngitakoa' mesa keledai bihäng tisangke' sibaha änä'na. Buhkeii pesangke'na anna unghendengngingkä' yaho mai sibaha änä'na.

3Ponna aha tau mangkutanaio bahtu' mansängkäio, ya' oaintee, 'Napahallu Puang ampo' la baha' napasule siang.'"

4Kaha-kaha yatoo dahi anna malai sundung aka ang puha natula' nabi naoatee,

5"Tula'i pano di ihsinna Yerusalem oaintee, 'Itai sule Tomarayammu napellambi'io, mahamme' inaha si'da-si'da anna umpensakei mesa keledai ang mahäti'ke' ang dake' aha napensakei tau.'"

6Ya' le'ba' si'dang yato derua pahsikolana ludai' di Bohto Betfage, anna nababei aka ang napahentaing Puang Yesus.

7Sika nahendemmi sule yato keledai sibaha änä'na anna sika ungngalai kaya'naii sallapi' anna naampi'ing yato keledai, mane nasakeii Puang Yesus.

8Mai'di si'da-si'da tau di hao yato di bohto ang naolai Puang Yesus sika ungngalai kaya'na sallapi', mane naampa'i naung di lalang tandana napakeangka'. Aha toi tau ang ungngala palapa mahäti' naampa' naung di lalang.

9Tau mai'di ang mellao di olona anna di kebo'na Puang Yesus sika koha napekäyyängngi tandana mampudi naoatee, "Pudii sanganna inde Änä'na Daud. La dibehe Inde ang nasuo Puang Alataala sule! Tapudii sanganna Puang Alataala ang tohho yaho di ongeang ang handang malängkä'!"

10Tahpana mentamang di Bohto Yerusalem Puang Yesus, ya' tilalla' asammi inahanna tau yaling anna sika kutanai naoatee, "Menna sakalia' ne tau?"

11Natimba'mi yato tau mai'di ang molengko sibaha Puang Yesus naoatee, "Diangnga'to inde Puang Yesus, yato nabi ang sule di hoi' mai di Bohto Nazaret di Galilea."

12Donetoo mentamang Puang Yesus di Dasang Ada'na Puang Alataala anna unghambaii ingkänna tau ang ma'balu' di hao yato di tähämpä' Dasang Ada'na. Anna umpentibeing yato mejana to pansapi' doi'. Noa tunne' bangkunna yato to pa'balu' dangang-dangang napentibeing

13mane keaha'i pano diii naoatee, "Aha tiuki' yaling di Suha' Masero ang naoatee, 'Dasangku la disangai dasang ang la naongei tau ma'sambayang.' Ampo' umpadahirea' dio pembunianna to bokoti."

14Suleing dibaha mai'di to buta anna to makule ang aha yaling di Dasang Ada' donetoo lambi' mai'di ang napabono'.

15Ampo' yato kapala-kapala imang anna to pampakuhu ada' mapalla ungngita aka ang nababe Puang Yesus ang mepusa'-pusa', anna sika mapalla toe' unghingngi pampudianna änä' naoatee, "Keangka' yato Peänä'anna Daud."

16Ya' sika mekutanang pano di Puang Yesus naoatee, "Unghingngiraka aka ang naoa indo pano änä'?" Natimba'mi naoatee, "Io, kuhingngi. Dakake'a' dio aha umbata yaling di Suha' Masero ang naoate, 'Moi änä'-änä' anna änä' ang mengeke' sumusu umpaturung umpudi sangammu.'"

17Puhai yatoo le'ba'mi Puang Yesus umpellei yatoii, lunaung di Bohto Betania di aneanna bohto mahoa' anna ma'bengii di hoi'.

18Tahpana marondong di mebengngi'-bengngi' le'ba'mi inde Puang Yesus sumule ludai' di bohto mahoa'. Yaling di pellaoanna manono nasa'ding.

19Ungngitang mesa poang kayu ang si keboa disanga poang ara di hao di behing lalang. Panong nalumba aka' pemala la naita aha are boana, ampo' dae' aha keboa, lala'nake' supu mahombo. Naoante Puang Yesus pano yato di poang kayu, "Inang damo aha la keboa lambi' sapano-panona." Ya' malahso siang yato poang kayu anna matei.

20Naitanna pahsikolana yato aka ang dahi, sika pusa' asammi anna sika kutanai naoatee, "Umba noa anna malai indo poang kayu pihsa' tomande' mabangi lala'na anna matei?"

21Natimba'mi Puang Yesus naoatee, "Kutula'ingkoa' setonganna ponna mampetahpa' si'da-si'damokoa' anna damokoa' bata-bata didiona kakuasaanna Puang Alataala, ya' mala tungnga' tou dio umbabe inde aka ang puha kubabe pano di poang kayu. Anna dai dia yato supu, ampo' noa toi ke ungngoainte inde tanete, 'Tiängkä'o tama di le'bo',' ya' inang la dahi noa yatoo.

22Anna ingkänna palaummu yaling di sambayang la untahimbo asang ke mampetahpa' si'da-si'dao dai' di Puang Alataala."

23Le'ba' bung Puang Yesus tama di Dasang Ada'na Puang Alataala. Tahpana lella' mampakuhu, ya' suleng sangngaka-sangngaka kapala imang anna setobaha'ang ullumba Puang Yesus anna sika mekutanai naoatee, "Umba nakasulei ne kakuasaammu anna malao unghambai to pa'bulele yaling mai di Dasang Ada' di pehengi? Anna menna ang mampopa'kuasao?"

24Mentimba'mi Puang Yesus pano diii naoaintee, "Aha tou Ko mesa pekutanangku mating di dioa'. Ponna mala tahpa'a' pentimba'mu, mane kutimba'i pekutanammua' didiona menna ang mambeaä' kakuasaang umbabe ingkänna yatoo.

25Noa inde pekutanangku: Menna umbea kakuasaang pano di Yohanes to Pantero'? Dehataraka, hupatauraka?" Ingkänna yato kapala imang anna setobaha'ang situla'-tula' anna naoaitee, "Ponna taoaa'te, 'Dehata mambea kakuasaang,' ya' la naoamingkea'totee, 'Ponna noa, ya' akana daia' umpetahpa'?'

26Ya' la taoaa'tee, 'Hupatau mambea kakuasaang,' ampo' mahea' bure' tau pano indo di tau mai'di aka' ingkänna tau ungngangka' Yohanes mesa nabi."

27Dahi sika mentimba'mi pano di Puang Yesus naoatee, "Dai kiinsang kitimba'." Sika naoaminte Puang Yesus, "Ponna noa, ya' datoeto Ko kutula'ingkoa' didiona umba nakasulei kakuasaangku anna malaä' membabe noa."

28Napatahhi' bumi tula'na Puang Yesus naoatee, "Umbaa'ne' noa pampihki'mu didiona inde pohapangang? Aha dolu mesa ambe anna derua änä'na. Pihsang tempo inde ambena le'ba' pano di änä'na ang ulua anna naoaintee, 'O änä'ku, laoo pano di bela' dinoa anna mengkähängngo di hao.'

29Mentimba'mi yato änä'na naoate, 'Dai kuaku mao,' ampo' tahpana ma'pihki' yato änä', ya' ke halie' unsohso yato tula'na anna maoi.

30Mao salang inde ambena pano di änä'na ang kaderuanna anna naoa toinne' yato aka ang puha naoa pano di änä'na ang ulua. Mentimba' yato änä'na naoatee, 'Io, Ambe', maorangkä'.' Ampo' inde änä' dasianne' mao."

31Mekutanang Puang Yesus naoatee, "Ang umba kahang yato derua änä' ang untuhu'i tobaha'na?" Sika mentimba'mi yato kapala-kapala imang anna setobaha'ang naoatee, "Ang ulua." Naoante Puang Yesus pano diii, "Kutula'ingkoa' setonganna ingkänna to pahsinga' sima anna ingkänna pahsundala' la mendoluete' tama di suruka andana dioa'.

32Aka' nasuhung sule Yohanes to Pantero', anna malakoa' natuhoing lalang ang tahpa'. Ampo' daia' ungngaku umpehingngii pepakuhunna. Ampo' ingkänna nei' to pahsinga' sima anna ingkänna pahsundala' mampetahpa'ne' pano. Ampo' dioa' dio, moinnakato ungngitangnga' ingkänna yatoo, dasiangnga' ungngaku manohso anna mampetahpa'."

33Napatahhi' bumi tula'na Puang Yesus naoatee, "Pehingngii boia' inde pohapangang ang senga': Aha mesa to pobela' ang umpapia bela' angkoro'. Nahala lipu', napapiaing bombeng ang la napampihsä'i angkoro' anna umpake'de' pa'hondaang malängkä'. Puhaitoo napopetesammi yato bela'na pano di sangngaka-sangngaka to pantesang, mane le'ba'i pano di bohto senga'.

34Tahpana la lambi'mi tempo pantuhangang, ya' unsuong sangngaka-sangngaka sabua'na pano yato di to pantesang la ungngala toe' boana pinamulanna.

35Ampo' yato ingkänna to pantesang unsahkai yato sabua'na puänna bela' mane nakaka'i, nasaleba'i batu piha anna napatei mesa.

36Ya' unsuo bumi sangngaka-sangngaka sabua'na ang senga' inde puänna bela', napamai'di puhane' andana yato ang uhuna. Ampo' yato ang dahi pano di sabua' ang uhuna noa tuntone' dahi pano inde diii.

37Kätämpä' unsuo änä' kalaena pano. Aka' napihki' naoatee, 'Umbato ke sika nakalaya'i nei'.'

38Ampo' tahpana sika ungngita yato änä' to pantesang, ya' sioa-oamintee, 'Diangnga'to indo ang la umpuängang inde bela' ke mateng ambena. Dahi tapateiia' anna malai kita'a' mampuängang inde bela'.'

39Sika nasahkang yato änä' anna napentibeing tama di aneanna bela' mane napateii."

40Mekutanang Puang Yesus pano diii naoatee, "Aka la dahi pano yato di to pantesang ke sumuleng puänna bela'?"

41Sika mentimba'mi naoatee, "La umpatei asang yato ingkänna to karake, anna bela'na la napapetesang sala pano di to pantesang senga' ang mapia, ang la mambea toe' tahana ke lambi'mi tempona dipupu yato angkoro'."

42Naoa bunte Puang Yesus pano diii, "Dakake'a' dio aha umbata yaling di Suha' Masero ang tiuki' didioku naoatee, 'Batu ang puha natibei tukang, setonganna mendahi batu ang handang dipahallu. Dianto indee pembabena Puang Alataala ang takapusa'ia' mahasanna.'

43Dahi kalehaiia' inde tula'ku: Yato tahamu yaling di Kapahentaanna Puang Alataala la dihampa'i asang, anna dibeai pano di ingkänna tau ang la untuhu'i anna umpembabe manahpaing pangngelo'na Puang Alataala.

44[Anna menna-menna ang mampengkanahoi yato batu la bahe-bahe kalaena, ampo' menna-menna ang nakanahoi la londo puhane' mapehsä'.]"

45Tahpana yato kapala-kapala imang anna sangngaka-sangngaka to Farisi unghingngi yato pohapangang ang natula' Puang Yesus, ya' nainsammi pole' sika diae' yato ang nahoa pohapangang.

46Dianto anna sika mopahtuyung la unsahka Puang Yesus. Ampo' aka' mahea' pano di tau mai'di lambi' dai dahi yato pahtuyunna. Aka' yato tau mai'di ungngangka' Puang Yesus mesa nabi.



 <<  Matius 21 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel