1Ihsinna inde suha' dianto didiona kaha-kaha ang la baha' dahi ang napalanda' Puang Alataala pano di Puang Yesus Kristus anna malai napepainsangnging pano di to pentindo'na. Puang Yesus unsuo malaeka'na pano di ta Yohanes sabua'na do napaitai yato kaha-kaha.
2Ya' natula' tunne' ta Yohanes yato ingkänna ang naita didiona Bahtakaranna Puang Alataala ang nasa'bii Puang Yesus Kristus.
3Menna ang la mambata inde suha' didiona ang la dahi anna ang mampehingngii sibaha natuhu'i ihsinna dianto ang la ullambi' kamasannangang yaho mai di Puang Alataala. Aka' ingkänna indee dang la masae anna dahing.
4Pano di pitu jumaa' di hao di Poropensi Asia. Hao mai di Yohanes. Oa' solasohongku, ke la malai nabehekoa' anna napamasahkekoa' Puang Alataala, dianto ang aha, ang inang ahang anna ang la sule. Noa toi yaho mai di pitu inaha ang aha yaho di olona ohko'ang katomarayaanna,
5anna yaho mai di Puang Yesus Kristus sa'bi ang mala dipetahpa'. Dianto ang handang dolu tuho di hoi' mai di alla'na to mate anna ungkuasai setomarayaang di lino. Puang Yesus mekalemui liu. Tandana yatoo naaku mate tibollo hahana anna malai nalahpa'ingkea' di hao mai di dosanta
6anna napakamesaingkea' tama di mesa kapahentaang ang napatani mendahi imang ang la untahiai Puang Alataala dianto Ambena. Puang Yesus dianto ang handang matande anna ma'kuasa lambi' sapano-panona. Aming.
7Itaia', mengeng la sule yaling di salehu' anna ingkänna hupatau la mangngita moi yato ang puha mantobo'. Ingkänna ihsi bohto di lino la dumuseng napobua'. Tahpa' si'daete' inde la dahi. Aming.
8Naoate Puang Alataala, "Kodi'mito indee Ang Handang Uhuna anna Ang Katämpä', dianto To Handang Ma'kuasa ang aha anna ang inang aha anna ang la sule."
9Kodi' Yohanes, solasohommua' yaling di kapampetahpa'ang, ang unsinnoaing didahha aka' untindo' Puang Yesus Kristus. Dahi sa'bara'ingkea' madahha aka' napakamesaingkea' tama di kapahentaanna. Dihambaiä' pano di Kalantanang Patmos aka' umpepainsangngingkä' Bahtakaranna Puang Alataala sibaha mangngakuä' kuoate, Puang Yesus Kristus dianto Dehatangku.
10Aha pihsang allo Dehata nakuasaiä' Inaha Masero, ya' unghingngimä' kamaha ang handang käyyäng sinnoa oninna terompe' ma'kara di hao di kebo'ku.
11Yato kamaha naoatee, "O Yohanes, uki'i aka ang ungngita, anna umpapebahaing ne suha' pano di pitu jumaa' dianto: to Efesus, to Smirna, to Pergamus, to Tiatira, to Sardis, to Filadelfia, anna to Laodikia."
12Tahpa mensailemä' pano di kebo'ku unnenne'i yato ang mampa'karaiä'. Ungngitamä' pitu pampatokoang lampu bulahang dibabe.
13Di alla'na yato pampatokoang lampu aha ke'de' mesa sinnoa liu hupanna tau. Umpake kaya' kalambe' ang lambi' naung di bihti'na. Mesalempäng bulahang.
14Bää'na sibaha beluhä'na mabuhsa' sinnoa kapa' bahtu' dähko-dähko, matanna pähä'lä' sinnoa api.
15Bihti'na pangngillo' sinnoa yato bahsi ang mane dihui'i yaling mai di ahha baya. Kamahanna sinnoa yato oninna sälänsäng ke buntu'i.
16Teyye kuananna untokei pitu bintäng anna di suana sohong mesa pa'dang ang pahela sibali. Lindona mesilo sinnoa yato allo koro ke maloe bumi.
17Tahpana kuita, ya' tilumbäng siamä' di olona salamang to mate. Ampo' tahpa nasahpaä' teyye kuananna anna ma'karai naoatee, "Daummahea', Kodi'mito indee Ang Handang Uhuna anna Ang Handang Katämpä'.
18Kodi'mito ang tuho moinnakato puhamä' mate, ampo' itai tuhoä' lambi' sapano-panona. Kodi' ungkuasai kamateang anna ongeanna to mate.
19Dahi uki'i samai kaha-kaha ang ungngita, dianto kaha-kaha dinoa anna kaha-kaha ang la dahi di allo ang la sule.
20Anna didiona bahtuanna inde pitu bintäng ang ungngita di teyye kuanangku anna yato pitu pampatokoang lampu bulahang, diantoo pitu bintäng bahtuanna pitu malaeka' di pitu jumaa' anna yato pitu pampatokoang lampu bulahang, bahtuanna pitu jumaa'."
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel