1Puhanna yatoo ahang kamaha kuhingngi sinnoa ang mai'di tau bongnga' yaho mai di suruka naoatee, "Pudii Puang Alataala! Dehatanta dianto ang mepasalama', To Handang Ma'kuasa anna matande!
2Panghohto'na tahpa' anna para-para! Puhang untahungkung yato pahsundala' ang kainsangang ang ungkarakei lino napobua' katasampa'anna. Natallangnging Puang Alataala aka' puha umpatei petauanna!"
3Ma'kara bumi naoatee, "Pudii Puang Alataala! Hambu ang mengkalao di api ang ungngämpu'i yato bohto mahoa' daliu aha la natohhoi lambi' sapano-panona!"
4Ya' malimuntu'mi yato dompulo uhpa' to dipakeangka' anna yato uhpa' hupanna ang menanaha menomba di olona Puang Alataala ang mohko' di ohko'ang tomaraya. Sika naoatee, "Tahpa' liunte'! Pudii Puang Alataala!"
5Mane ahai kahingngiang kamaha yaho mai di ohko'ang tomaraya naoatee, "O ingkämmua' petauanna ang mampenombai, moi sepongkahaang moi sabua', pudii Dehatanta!"
6Puhai yatoo kuhingngi bumi ang umbai kamahanna tau kambang ang sinnoa oninna salänsäng malängkä' anna sinnoa kundäng balu naoatee, "Pudii Puang Alataala, aka' Dianto Dehatanta To Handang Ma'kuasa ang ma'pahenta!
7Lambi'mi allo kakabenganna yato ang disangai Änä' Domba anna umpasadiang kalaena ang la napobahine. Dahi tapa'rame-rame anna kahsiingkea', tapamatande sanganna!
8Yato bahine, puhang dipakei kaya' mabahahsi anna palansinäng." (Kaya' ang noa yatoo dipasihapang pembabe mapia ang napengngoya'ing petauanna Puang Alataala.)
9Mane napa'karaiä' yato malaeka' naoatee, "Uki'i indee: tau ang dibahai pano di pa'rame-rameang kakabenganna Änä' Domba dianto ang la ullambi' kamasannangang yaho mai di Puang Alataala." Ya' nahängngängngike' tula'na yato malaeka' naoatee, "Tahpa' liuete' inde ang natula' Puang Alataala."
10Tahpa malimuntu'mä' di olona yato malaeka' la menomba, ampo' nasängkäiä' naoatee, "Daa! Daumpenombaiä'! Penombaio Puang Alataala! Aka' sabua' turä'to koo; sinnoa siamingke anna ingkänna solasohommu ang unsa'bii Puang Yesus! Aka' ang handang poko' ang natula' ingkänna nabi dianto unsa'bii Puang Yesus."
11Pihsananna ungngitamä' langi' tibilläng, ya' landa'mi mesa arahang mabusa. Ang mampensakei disangai To Tahpa' ang mala Dipetahpa'. Mampapara-para yaling di pambohtuang kaha-kaha anna naonge untolla'i balinna.
12Matanna sinnoa api meleä'-leä'. Yaho di bää'na mai'di songko' tomaraya anna di hao di Kalaena tiuki' mesa sanga ang supung Kalaena toboe' ang mangnginsang.
13Disanga toe' "Bahtakaranna Puang Alataala." Kaya' kalambe' ang napake puha ditonäng naung di haha.
14Ingkänna to pa'tolla' yaho di suruka mentindo' asang, umpensakei arahang mabusa sibaha umpake kaya' mabusa ang bahahsi.
15Suana naongei sohong mesa pa'dang pahe'la' ang la napake untalo ingkänna bohto. La sundung kakuasaanna umpahentaii. La ullanda angkoro' yaho di landaang ang dipasihapang kakeaha'anna Puang Alataala To Handang Ma'kuasa.
16Di hao di kaya' kalambe'na anna di hao di paanna naongei tiuki' mesa sanga dianto, "Tomaraya ang umpadihoi'ang ingkänna setomarayaang, anna Dehata ang umpadihoi'ang ingkänna sedehataang."
17Mane ungngitaä' mesa malaeka' ke'de' yaho di mata allo umpa'karai sedansiang ang sika lolo' napekäyyängngi naoaintee, "Maikoa' done inde tihimpung umpakahoa' pa'rame-rameang käyyäng ang napaaha Puang Alataala,
18anna malai ungngandekoa' balena setomarayaang, setantaraang, to pa'tolla', to poarahang sibaha arahanna anna ingkänna hupatau, moi to keangka', moi to pemase-mase; moi sepongkahaang, moi sabua'."
19Pihsananna kuitang yato olo'-olo', anna setomarayaang di lino sibaha setantaraannaii tihimpung. La sika untolla' yato ang umpensakei arahang mabusa sibaha ingkänna änä' buana.
20Ya' disahkang yato olo'-olo' sibaha yato ang boheng unsanga kalaena nabi ang puha umbabe tanda ang mepusa'-pusa' di olona yato olo'-olo'. (Napanoa inde nabi anna malai umbulitu' tau ang umpotanda yato olo'-olo' anna umpenombai tau-taunna.) Dipentibeming yato derua to pampasähsä' lalang tama di api handang maluhsu' ang malua' noa le'bo'.
21Ingkänna petauanna dipatei umpake pa'dang ang sohong yaling mai di suana yato Tau ang umpensakei arahang mabusa. Samai sedansiang sule asang ungngande yato balenaii lambi' boho.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel