1Jadi, sdang Almaseh sudah kna susah dalam badan manusia, pakai-lah itu niat juga jadi kamu punya snjata; kerna orang yang sudah kna susah dalam badan sudah brenti deri-pada dosa;
2spaya s-lama ada kamu punya umor lagi dalam badan, jangan lagi kamu turut manusia punya k'inginan, ttapi turut Allah punya kahandak.
3Kerna tempo yang lalu itu sudah chukop kerjakan sperti orang bangsa-asing punya suka, serta bawa diri dngan perchabolan, k'inginan, mabok, lazat, minum-minum, dan smbahyang datok, ia'itu kbnchian:
4yang orang hairan dalam hal kamu t'ada berlari sama-sama masok itu perchabolan yang terlampon banyak, dan dia-orang chakap jahat fasal kamu:
5dan dia-orang pun msti kasi kira-kira k-pada dia yang ada sdia mau hukumkan orang yang lagi hidop dan orang yang mati pun.
6Ini-lah sbab-nya injil sudah di-khabarkan k-pada orang yang sudah mati pun, spaya orang-orang itu punya roh boleh hidop sperti Allah, sunggoh pun dia-orang kna hukum dalam badan-nya sperti manusia.
7Ttapi sgala perkara sudah dkat-lah ksudahan-nya: sbab itu baik kamu mnahan diri, dan ingat-ingat minta do'a:
8lbeh deri-pada smoa, taroh-lah kaseh satu sama lain dngan rajin; kerna kaseh itu lindongkan banyak-banyak dosa
9dan suka sambot satu sama lain di rumah dngan t'ada bersungut:
10s-kdar tiap-tiap orang sudah trima kurnia, layankan itu satu sama lain, sperti juru-kunchi yang baik di atas macham-macham anugrah Allah;
11jikalau barang-siapa berchakap, biar-lah sperti firman Allah; jikalau barang-siapa mlayan, biar-lah dngan kkuatan yang Allah kasi: spaya dalam smoa perkara Allah juga boleh di-muliakan deri sbab Isa Almaseh, dan mulia pada Tuhan, dan kuasa pun sampai s-lama-lama-nya. Amin.
12Hei sgala kkaseh, jangan hairan fasal kamu kna uji dngan api yang ada choba sama kamu, spertikan satu perkara yang hairan sudah datang atas kamu:
13ttapi sdang kamu ada bhagian dalam Almaseh punya sngsara, baik kamu bersuka-suka; spaya pada waktu kmulia'an Almaseh di-nyatakan kamu pun boleh bersuka-suka dngan ksuka'an yang bsar skali.
14Jikalau kamu kna chla deri sbab nama Almaseh, berkat-lah kamu; kerna Roh kmulia'an, ia'itu Roh Allah, ada tinggal atas kamu.
15Kerna jangan-lah satu orang pun antara kamu kna susah sperti satu pmbunoh, atau pnchuri, atau orang yang buat jahat, atau sperti orang yang suka masok orang lain punya fasal;
16ttapi jikalau kna susah sperti satu Kristen, jangan-lah itu orang jadi malu; ttapi baik dia muliakan Allah dngan ini nama juga.
17Kerna sudah sampai ktika-nya yang hukuman msti mula'i deri-pada isi rumah Allah: dan jikalau hukuman mula'i deri-pada kita, apa-kah itu orang punya ksudahan yang t'ada turut Allah punya injil punya prentah?
18Dan jikalau satu orang yang bnar dapat slamat dngan susah, di mana-kah orang yang t'ada kbaktian dan yang berdosa nanti ternampak?
19Sbab itu biar-lah sgala orang yang kna susah sperti kahandak Allah srahkan jiwa dia-orang k-pada Pnjadi yang stiawan itu, dalam hal dia-orang buat baik.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel