Alkitab Mobile SABDA
[VER] : [BABA]     [PL]  [PB] 
 <<  2 Korintus 4 >> 

1Sbab itu sdang kita ada ini playanan, s-bagimana kita sudah trima ksian, t'ada-lah kita tawar hati:

2ttapi kita sudah tolakkan sgala perkara yang ada tersmbunyi sbab malu, dan t'ada kita bawa diri dngan tipu-daya, atau palsukan perkata'an Allah; ttapi, dngan mnyatakan kbtulan itu, kita berknankan diri kita sama s-lagi orang punya angan-angan hati di dpan Allah.

3Ttapi jikalau kita punya injil ada tertudong, itu ada tertudong di antara orang yang dalam jalan binasa:

4di antara ini orang smoa, ini dunia punya datok sudah butakan fikiran orang-orang yang t'ada perchaya, spaya jangan dia-orang nampak chahya injil yang khabarkan kmulia'an Almaseh, yang jadi rupa Allah.

5Kerna bukan-nya kita khabarkan diri kita sndiri, ttapi Isa Almaseh, yang dia-lah Tuhan, dan kita ini mnjadi hamba-hamba kamu kerna Isa punya sbab.

6Kerna Allah juga yang kata, "Biar-lah trang berchahya deri dalam glap," dan dia-lah juga yang sudah berchahya di dalam kita punya hati, mau kasi trang deri-hal kmulia'an Allah punya pngtahuan di muka Isa Almaseh.

7Dan ini bnda yang indah ada sama kita dalam bkas yang di-bikin deri-pada tanah, spaya kuasa yang tersangat itu boleh pulang sama Allah, bukan deri-pada kita asal-nya;

8sana-sini kita ada kna ssak, ttapi t'ada juga rmok; hati kita bimbang, ttapi t'ada juga putus harap;

9kita kna orang kjar, ttapi bukan kna tertinggal; kita kna jatoh, ttapi t'ada juga binasa;

10slalu kita bawa sana-sini pmbunohan Isa dalam kita punya badan, spaya hidopan Isa pula boleh nyata dalam kita punya badan.

11Kerna kita ini yang lagi hidop ada slalu di-srahkan k-pada kmatian kerna Isa punya sbab, spaya hidopan Isa pula boleh nyata dalam badan kita yang msti mati ini.

12Jadi itu, kmatian bkerja dalam kita ini, ttapi hidop dalam kamu.

13Ttapi kita ada itu juga punya roh perchaya, sperti ada tersurat, "Sahya sudah perchaya, dan sbab itu-lah sahya sudah berchakap;" bgitu juga kita pun perchaya, dan sbab itu-lah kita berchakap;

14sbab kita tahu yang dia yang sudah bangkitkan Tuhan Isa nanti bangkitkan kita ini pun sama-sama Isa, dan nanti mnghadapkan kita sama-sama kamu.

15Kerna smoa perkara sudah jadi kerna kamu punya sbab, spaya anugrah yang bertambah-tambah deri sbab bertambah banyak orang-nya, boleh kasi shukor-nya pula bertambah-tambah k-pada Allah punya kmulia'an.

16Itu sbab-lah kita t'ada tawar hati: ttapi sunggoh pun kita punya manusia yang di luar ada binasa, kita punya manusia yang dalam ada di-bharukan s-hari-hari.

17Kerna kita punya ksusahan yang rengan, yang chuma s-kjap saja, ada bertambah-tambah bawakan kita satu tanggongan kmulia'an yang kkal;

18sdang kita bukan-nya tengok perkara-perkara yang boleh nampak, ttapi perkara yang t'ada nampak: kerna yang boleh nampak chuma ada s-kjap saja; ttapi yang t'ada nampak ada kkal.



 <<  2 Korintus 4 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel