1Pnghabisan skali, hei sudara-sudara, minta-lah do'a kerna kita, spaya perkata'an Tuhan boleh maju dan jadi mulia, sperti yang ada di antara kamu;
2dan spaya kita boleh di-lpaskan deri-pada smoa orang yang ta'baik dan yang jahat; kerna bukan-nya smoa orang ada perchaya.
3Ttapi Tuhan ada stiawan, dan dia nanti tgohkan dan jagakan kamu deri-pada si-jahat itu.
4Dan kita ada harap dalam Tuhan fasal kamu, ia'itu yang kamu ada buat dan nanti buat apa-apa yang kita psan.
5Biar-lah Tuhan btulkan kamu punya hati masok jalan kaseh Allah dan sabar Almaseh.
6Hei sudara-sudara, kita psan sama kamu dngan nama Tuhan kita Isa Almaseh, undur-lah deri-pada tiap-tiap sudara yang bawa diri dngan t'ada aturan, dan t'ada turut pngajaran yang dia-orang sudah trima deri-pada kita.
7Kerna kamu sndiri pun tahu bagimana kamu patut turut kita punya tuladan: kerna kita punya klakuan dpan kamu bukan-nya dngan t'ada aturan:
8dan t'ada kita makan nasi perchuma deri-pada orang punya tangan, ttapi dngan usaha dan pnat kita sudah kerja siang malam, spaya jangan kita bratkan satu orang pun antara kamu:
9bukan sbab kita t'ada itu kuasa, ttapi spaya buatkan diri kita satu tuladan k-pada kamu, spaya kamu boleh turut.
10Kerna waktu kita ada lagi sama-sama kamu, kita sudah psan bgini, ia'itu kalau orang ta'mau kerja, jangan pula dia makan.
11Kerna kita ada dngar deri-hal orang antara kamu yang ada buat klakuan ta'snonoh, dan satu pun t'ada dia punya kerja, chuma masok tangan dalam orang punya kerja.
12Sama itu macham punya orang, kita psan dan nasihatkan dalam Tuhan kita Isa Almaseh, biar-lah dia-orang diam-diam bkerja, dan makan nasi sndiri.
13Ttapi kamu ini, hei sudara-sudara, jangan-lah jlak buat baik.
14Dan kalau ada orang t'ada turut sperti kita punya perkata'an yang ada dalam ini surat, ingat sama dia, dan jangan kamu champur sama dia, spaya dia malu.
15Jangan bilangkan dia sperti satu musoh, ttapi nasihatkan dia sperti satu sudara.
16Biar-lah Tuhan sndiri yang ampunya sjahtra kasi kamu sjahtra slalu dalam smoa perkara. Biar-lah Tuhan bersama-sama kamu smoa.
17Dan sahya ini Paulus kirim tabek dngan sahya punya bkas-tangan sndiri, ia'itu mnjadi tanda dalam tiap-tiap surat: bgini-lah tulisan sahya.
18Biar-lah anugrah Tuhan kita Isa Almaseh bersama-sama kamu smoa.
<< 2 Tesalonika 3 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel