1Kerna sdang hukum-taurit itu chuma ada bayang-bayang smoa perkara baik yang mndatang, bukan-nya itu perkara-perkara punya rupa yang btul, jadi tahun-tahun dngan itu korban juga yang dia-orang bawa slalu, ta'pernah dia-orang boleh smpurnakan orang-orang yang datang.
2Kalau boleh, bukan-kah orang nanti brenti bawa korban, sbab orang yang buat smbahyang, kalau satu kali sudah di-suchikan, t'ada lagi nanti rasa dosa dalam dia-orang punya hati?
3Ttapi dalam itu korban ada satu peringatan deri-hal orang punya dosa-dosa bertahun-tahun.
4Kerna skali-kali t'ada boleh lmbu dan kambing punya darah hapuskan dosa.
5Sbab itu, bila masok dalam dunia ini, dia kata, "Korban dan persmbahan Tuhan ta'mau, Ttapi Tuhan sudah sdiakan sahya satu badan;
6Korban bakaran dan persmbahan kerna dosa t'ada berknan k-pada Tuhan:
7Bharu-lah sahya kata, 'Tengok-lah sahya sudah datang, (Sudah tersurat dalam gulongan kitab deri-hal sahya) Mau buat Tuhan punya kahandak, ya Allah.'"
8Bila dia sudah kata di atas, "Korban dan persmbahan dan korban bakaran dan persmbahan kerna dosa Tuhan ta'mau, dan t'ada berknan k-pada Tuhan" (itu smoa di-persmbahkan mnurut hukum-taurit),
9bharu-lah dia kata, "Tengok-lah sahya sudah datang mau buat Tuhan punya kahandak." Dia tpikan yang nombor satu, spaya dia boleh ttapkan yang nombor dua.
10Dan turut dia punya kahandak, kita ini sudah di-kuduskan oleh persmbahan badan Isa Almaseh yang satu kali saja.
11Dan tiap-tiap imam s-hari-hari berdiri buat smbahyang, dan slalu persmbahkan itu juga punya korban, yang ta'pernah boleh hapuskan dosa-dosa orang;
12ttapi dia ini, bila dia sudah persmbahkan satu korban yang kkal kerna dosa-dosa orang, sudah dudok sblah kanan Allah:
13dan deri itu waktu dia ada mnantikan sampai musoh-musoh-nya di-jadikan alas kaki-nya.
14Kerna dngan satu persmbahan saja dia sudah smpurnakan sampai s-lama-lama-nya orang-orang yang sudah di-kuduskan.
15Dan Roh Alkudus pun bersaksi k-pada kita: kerna bila dia sudah kata,
16"Ini-lah itu perjanjian yang sahya nanti buat sama dia-orang Kmdian deri-pada itu waktu, kata Tuhan; Sahya nanti taroh sahya punya hukum-hukum atas hati dia-orang, Dan atas dia-orang punya ingatan pun sahya nanti tuliskan;" bharu dia kata.
17"Dan dia-orang punya dosa dan kjahatan smoa sahya t'ada nanti ingat lagi."
18Jikalau ini smoa sudah di-ampunkan, t'ada-lah lagi ada persmbahan kerna dosa.
19Sbab itu, hei sudara-sudara, sdang hati kita sudah brani mau masok tmpat kudus oleh darah Isa,
20dngan jalan yang dia sudah bukakan kerna kita, ia'itu jalan yang bharu dan hidop, yang trus tirai, ia'itu dia punya badan;
21dan sdang kita ada satu imam yang bsar atas isi rumah Allah;
22biar-lah kita datang dkat dngan hati yang btul, dan dngan s-chukop perchaya, dan hati kita di-rnjiskan sampai jadi berseh deri perasa'an yang jahat, dan badan kita di-chuchikan sama ayer yang berseh:
23dan biar-lah kita pegang kita punya harap punya pngakuan spaya jangan bergrak; kerna dia yang berjanji itu ada kperchaya'an:
24dan biar-lah kita fikirkan satu sama lain, spaya bangkitkan kaseh dan perbuatan yang baik;
25jangan lpas deri-pada berhimpon sama-sama, sperti ada juga orang biasa buat, ttapi nasihatkan satu sama lain: dan terlbeh lagi pula sdang kamu tengok yang hari itu ada datang dkat.
26Kerna kalau kita buat dosa dngan sngaja, kmdian deri-pada kita sudah trima pngtahuan deri-hal kbtulan itu, t'ada lagi tertinggal korban kerna dosa,
27chuma tertinggal orang mnantikan hukum dngan takot, dan satu api punya marah yang nanti makankan smoa yang mlawan.
28Orang yang sudah tpikan Musa punya hukum, dia mati dngan t'ada dapat ksian atas dua tiga orang punya ksaksian:
29kamu fikir brapa brat lagi punya seksa nanti di-patutkan k-pada orang yang sudah lanyakkan Anak Allah di bawah dia punya kaki, dan darah perjanjian yang dalam-nya dia sudah di-kuduskan itu dia bilangkan t'ada kudus, dan Roh yang bri anugrah itu dia sudah makikan pula?
30Kerna kita knal dia yang kata, "Balasan itu sahya-lah punya, sahya nanti bayer balek." Dan lagi, "Tuhan nanti hukumkan dia punya bangsa."
31Takot-lah kalau jatoh dalam tangan Allah yang hidop itu.
32Ttapi ingat-lah waktu dhulu-dhulu itu, bila kamu sudah di-trangkan dan sudah tahan susah dngan lawanan yang bsar;
33sparoh-nya dalam hal kamu sudah kna jadi satu wayang deri sbab orang punya kchla'an dan deri sbab bbrapa ksusahan; dan sparoh dalam hal kamu berskutu sama orang yang kna bgitu.
34Kerna kamu sudah taroh ksian sama orang yang kna pasong, dan dngan suka-hati juga kamu trima bila kamu punya herta kna rampas, sdang kamu tahu yang kamu sndiri ada herta yang lbeh baik, dan yang kkal.
35Sbab itu jangan-lah buangkan kamu punya brani, yang datangkan pahala yang bsar.
36Kerna sabar ada berguna sama kamu, spaya bila kamu sudah buat kahandak Allah, kamu boleh trima perjanjian-nya.
37"Kerna chuma lagi sikit lama saja, Dia yang datang itu nanti datang, dan t'ada nanti lengah.
38Ttapi sahya punya orang bnar itu nanti hidop deri perchaya: Dan kalau dia undur, jiwa sahya t'ada nanti berknan sama dia."
39Ttapi kita ini bukan-nya orang yang undur sampai binasa; ttapi orang yang ada perchaya sampai slamat jiwa.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel