1Sbab itu baik kita brenti chakap fasal Almaseh punya pngajaran yang mula-mula, langsong tuju k-pada ksmpurna'an; dan jangan kita lagi s-kali taroh alas-nya, ia'itu tobat deri-pada perbuatan yang mati, dan perchaya sama Allah,
2dan pngajaran fasal baptis, dan fasal taroh tangan atas orang, dan kbangkitan orang mati, dan hukuman yang kkal.
3Dan kita nanti buat bgitu, kalau Allah biarkan.
4Kerna deri-hal orang-orang yang satu kali sudah di-trangkan, dan mrasa kurnia yang deri shorga, dan trima bhagian Roh Alkudus,
5dan sudah mrasa Allah punya perkata'an yang baik itu, dan smoa kuasa jman yang mndatang,
6kmdian pula ssat, ta'boleh-lah bharukan itu orang sampaikan bertobat; sdang dia-orang salibkan Anak Allah lagi s-kali kerna diri sndiri, dan nyata-nyata kasi dia malu.
7Kerna tanah yang hisap ayer hujan yang krap kali jatoh atas-nya, dan kluarkan sayur-sayuran yang berguna k-pada orang-orang yang kerna-nya orang tanam, tanah itu trima berkat deri-pada Allah:
8ttapi kalau kluarkan duri dan jruju, terbuang-lah, dan dkat kna sumpah; dan ksudahan-nya kna bakar.
9Ttapi deri-hal kamu, hei sgala kkaseh, sunggoh pun kita chakap bgini, kita ada harap deri-hal kamu perkara-perkara yang lbeh baik, dan perkara-perkara yang sama-sama slamat:
10kerna Allah bukan-nya t'ada adil sampai lupakan kamu punya kerja, dan itu kaseh yang kamu sudah tunjokkan k-pada nama-nya, dalam hal kamu sudah mlayankan orang-orang kudus, dan skarang pun ada mlayankan.
11Ttapi kita punya kahandak biar-lah kamu masing-masing tunjok bgitu juga punya rajin mau chukopkan kamu punya pngharapan sampai ksudahan-nya;
12spaya jangan kamu jadi lengah, ttapi turut tuladan orang-orang yang trima perjanjian Allah mnjadi psaka-nya deri sbab perchaya dan sabar.
13Kerna bila Allah buat perjanjian sama Ibrahim, sdang dia ta'boleh bersumpah dmi apa-apa yang lbeh bsar, dia sudah bersumpah dmi diri-nya,
14dan kata, "Tntu-lah dngan berkat sahya nanti berkatkan angkau, dan sahya nanti banyakkan angkau terlalu banyak."
15Dan bgini-lah, bila dia sudah nantikan dngan sabar, dia dapat itu perjanjian.
16Kerna manusia bersumpah dmi apa-apa yang lbeh bsar deri-pada diri-nya: dan dalam smoa perbantahan sumpah juga yang slsaikan sampai mnjadi tgoh.
17Dalam itu hal, bila Allah mau nyatakan dngan trang k-pada smoa waris perjanjian-nya yang kahandak-nya ta'boleh berubah, dia sudah masokkan satu sumpah:
18spaya oleh dua perkara yang ta'boleh berubah, dan yang dalam-nya Allah ta'boleh bohong, kita punya hati boleh jadi banyak brani, ia'itu kita ini yang sudah lari mnchari lindong mau pegang itu pngharapan yang di-ltak dpan kita,
19yang kita ada pegang sperti jiwa punya sauh, ia'itu satu pngharapan yang ttap dan tgoh, dan yang masok tmpat di blakang tirai;
20di tmpat yang Isa sudah masok kerna kita mnjadi pnganjur, sdang dia sudah jadi kpala-imam sampai s-lama-lama-nya, sperti aturan Malki-Sadak.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel