1Dkat itu waktu raja Herodis hulorkan tangan mau aniayakan brapa orang deri antara eklisia itu.
2Dan Yakob sudara Yahya dia bunoh dngan pdang.
3Dan bila dia tengok yang orang Yahudi berknan sama ini hal, dia tangkap Petrus pula. Itu-lah waktu hari-bsar makan roti ta'ragi.
4Dan bila dia sudah tangkap sama dia, dia kasi masok jel, dan srahkan dia k-pada ampat kawalan soldado, satu kawalan ampat orang, spaya boleh jaga; dia punya maksud mau bawa dia kluar k-pada bangsa itu lpas hari Paska.
5Sbab itu Petrus kna tunggu di dalam jel: ttapi dngan tkun eklisia minta do'a k-pada Allah kerna dia.
6Dan ktika Herodis mau bawa dia kluar, itu malam juga Petrus ada tidor antara dua orang soldado, terikat dngan dua rantai, dan lagi ada pnunggu-pnunggu di muka pintu jaga itu jel.
7Dan ada satu mla'ikat Tuhan berdiri dkat, dan ada satu trang berchahya-chahya dalam itu bilek: itu mla'ikat tpok Petrus punya rusok, dan kasi dia sdar, serta kata, "Lkas bangun." Dan rantai-nya terluchut deri dia punya tangan.
8Dan itu mla'ikat kata sama dia, "Ikat pinggang, dan pakai kasut." Dan dia buat bgitu. Dan mla'ikat kata, "Pakai angkau punya baju dan ikut sahya."
9Dan dia kluar ikut dngan t'ada tahu yang itu perkara btul yang itu mla'ikat ada buat, ttapi dia sangka yang itu satu pnglihatan yang dia tengok.
10Dan bila dua-dua sudah lalu pnunggu jel nombor satu dan nombor dua punya, dia-orang sampai di pintu bsi yang arah sblah negri, dan pintu itu terbuka sndiri kerna dia-orang: dan bila dia-orang sudah kluar, dua-dua berjalan s-panjang satu lorong, dan itu juga mla'ikat itu tinggalkan dia.
11Bila Petrus sudah sdar, dia kata, "Skarang sahya bharu tahu dngan sunggoh-nya yang Tuhan sudah suroh mla'ikat-nya dan sudah lpaskan sahya deri-pada tangan Herodis dan deri-pada sgala perkara yang orang bangsa Yahudi sudah harap."
12Dan bila dia sudah terknang deri-hal itu dia pergi rumah Mariam, mak si Yahya yang berglar Markus: di situ ada brapa orang berhimpon minta do'a.
13Dan bila dia ktok pintu pagar, satu anak prempuan bernama Roda kluar mau dngar.
14Dan bila dia tahu Petrus punya suara, dia jadi bgitu punya suka sampai dia t'ada buka pintu, ttapi lari masok, dan kasi tahu yang Petrus ada berdiri di muka pintu.
15Dia-orang kata sama dia, "Gila angkau." Ttapi anak prempuan itu kata dngan tntu yang btul-lah ada s-bgitu. Habis itu dia-orang kata, "Itu dia punya mla'ikat."
16Ttapi Petrus t'ada berrnti-rnti ktok: dan bila sudah buka pintu, dia-orang tengok dia dan jadi terpranjat.
17Dan dia lambai k-pada dia-orang dngan tangan-nya, suroh diam, kmdian dia chritakan k-pada dia-orang bagimana Tuhan sudah bawa dia kluar deri itu jel. Dan dia kata, "Khabarkan ini smoa sama Yakob dan sama sudara-sudara itu." Habis itu dia kluar, dan pergi lain tmpat.
18Bila sudah siang, soldado-soldado jadi bukan sdikit terkachau, 'ntah apa-kah sudah jadi sama Petrus.
19Bila Herodis sudah chari sama dia, dan ta'boleh dapat, dia preksa sgala pnunggu, dan suroh bunoh dia-orang. Dan dia turun deri Yahudiah k-negri Kaisariah, dan tinggal di situ.
20Herodis sudah naik terlalu marah sama orang Tur dan orang Sidon: dan orang-orang itu datang sama dia dngan satu hati, dan bila dia-orang sudah ambil hati Blastus, ia'itu kpala dalam raja punya bilek peraduan, dia-orang minta damai, sbab dia-orang punya negri dapat makan deri itu raja punya negri.
21Pada satu hari yang tntu, Herodis pakai pakaian raja, dan dudok di atas takhta-nya dan berchakap k-pada dia-orang.
22Dan orang banyak itu bertriak-triak, "Suara dewa-dewa, bukan suara manusia."
23Dan dngan s-kjapan satu mla'ikat Tuhan palu sama dia, sbab dia t'ada kasi hormat k-pada Allah: dan dia kna makan ulat, sampai mati.
24Ttapi perkata'an Allah mingkin mashhur, dan bertambah-tambah.
25Dan Bar-nabas sama Sa'ul pulang deri Yerusalim, bila dia-orang sudah habiskan kerja-nya, dan bawa Yahya yang berglar Markus sama-sama.
<< Kisah Para Rasul 12 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel