1Bila dia orang sudah jalan trus Amfipolis dan Apolloniah, dia-orang sampai di Tisalonika, dan di situ ada rumah smbahyang orang Yahudi:
2dan Paulus, sperti adat-nya, masok sama-sama dia-orang, dan tiga hari-perhentian berturut-turut dia berrondeng sama dia-orang deri-pada Kitab,
3serta nyatakan dan tunjokkan yang ta'boleh tidak Almaseh itu msti kna sngsara, dan bangkit deri antara orang mati; dan lagi dia kata, "Ini Isa yang sahya khabarkan sama kamu, dia-lah Almaseh itu."
4Ada orang perchaya, dan bersohbat sama Paulus dan Silas: dan banyak skali deri antara orang Grik yang berbakti, dan prempuan yang mulia-mulia pun bukan sikit.
5Ttapi orang Yahudi jadi dngki-hati, dan deri-pada orang hina-hina di pasar, dia ambil orang jahat-jahat dan buat satu kumpolan: habis itu dia bikin satu bsar punya gadoh dalam negri, dan tmpoh Yason punya rumah, dan choba mau bawa rasul-rasul kluar dpan orang-banyak.
6Bila dia-orang ta'boleh dapat itu dua rasul, dia-orang seret sama Yason dan lain-lain sudara sampai di dpan pnghulu-pnghulu negri, serta bertriak, "Ini orang smoa yang sudah balekkan dunia sudah datang sini pula;
7dan Yason sudah trima dia-orang. Dan ini smoa langgar hukum-hukum Kaisar, sbab dia-orang kata ada lain raja pula, bernama Isa."
8Bila orang-banyak dan pnghulu-pnghulu negri dngar ini perkara, dia-orang punya hati jadi kachau.
9Dia-orang ambil jamin deri-pada Yason dan lain-lain orang itu,kmdian lpaskan dia-orang.
10Itu juga sudara-sudara hantarkan Paulus sama Silas pergi Biruya tempo malam: dan bila dia-orang sudah sampai situ, dia-orang masok rumah-smbahyang orang Yahudi.
11Ini orang smoa lbeh mulia deri-pada orang yang di Tisalonika, dalam hal dia trima perkata'an itu dngan hati bersiap, dan s-hari-hari preksa Kitab kalau ini perkara-perkara btul s-bgitu.
12Sbab itu deri antara dia-orang banyak orang perchaya: dan deri antara prempuan Grik yang berpangkat, dan orang dlaki pun bukan sikit lagi.
13Ttapi bila orang Yahudi di Tisalonika dapat tahu yang Paulus sudah khabarkan perkata'an Allah k-pada orang Yahudi di Biruya pun, dia pergi situ pula, dan usutkan dan harukan orang-banyak.
14Kmdian sudara-sudara itu hantarkan Paulus pergi sampai laut: ttapi Silas sama Timotius tinggal di sana.
15Dan orang-orang yang hantarkan Paulus bawa dia sampai di Atin: dan bila dia-orang sudah trima Paulus punya psanan k-pada Silas dan Timotius, suroh dua-dua pergi sama dia s-brapa chpat dia boleh, bharu dia-orang pulang.
16Ktika Paulus mnantikan dia-orang di Atin, hati-nya jadi panas sbab dia tengok itu negri pnoh dngan patong datok.
17Jadi itu, dia berrondeng dalam rumah smbahyang sama orang Yahudi dan orang yang berbakti, dan di pasar pun s-hari-hari sama orang-orang yang berjumpa sama dia.
18Dan ada orang yang pegang pngajaran orang Ipikuri dan Stoiki berbantah sama dia. Ada yang kata, "'Ntah apa-kah si-mletir ini mau bilang?" Ada pula kata, "Nampak-nya dia ini orang yang ajar fasal lain bangsa punya datok:" sbab Paulus khabarkan Isa dan kbangkitan itu.
19Dia-orang ambil dia bawa pergi di Ariopagus, serta kata, "Boleh-kah kita tahu apa-kah ini pngajaran bharu yang angkau katakan?
20Kerna angkau bawa perkara-perkara yang hairan k-pada kita punya kuping: sbab itu kita mau tahu apa arti ini perkara."
21Smoa ini orang Atin, dan orang lain bangsa yang tumpang di sana pun, t'ada smpat buat lain apa-apa pun chuma chakap atau dngar deri-hal perkara yang bharu.
22Paulus berdiri di tngah-tngah itu Ariopagus, dan kata, "Hei orang Atin, dalam smoa perkara sahya tengok yang kamu ini banyak smbahyang datok.
23Kerna sambil sahya berjalan dan perhatikan apa-apa yang kamu smbah, sahya sudah jumpa satu tmpat persmbahan dngan ini surat, K-PADA TUHAN YANG ORANG TA'DAPAT TAHU. Sbab itu apa yang kamu smbah dngan t'ada tahu, itu-lah yang sahya khabarkan sama kamu.
24Tuhan yang sudah jadikan dunia dngan smoa yang ada dalam-nya, sdang dia prentahkan langit dan bumi, dia t'ada tinggal dalam rumah-rumah smbahyang yang di-bikin oleh tangan manusia:
25dan tangan manusia ta'boleh mlayan sama dia, sperti dia ada kurang apa-apa; kerna dia juga yang kasi pada smoa orang hidop, dan nafas, dan sgala perkara:
26deri-pada satu darah dia sudah jadikan sgala bangsa manusia, spaya dia-orang boleh tinggal di sluroh muka-bumi, serta sudah tntukan peraturan masa-nya dan smpadan tmpat tinggal-nya;
27spaya masing-masing boleh chari Allah, dan barangkali boleh mraba-raba sampai dapat sama dia, mski-pun dia t'ada jauh deri-pada kita masing-masing:
28kerna dalam dia kita hidop dan bergrak, dan dalam dia juga k'ada'an kita; sperti kamu sndiri punya orang pngarang pantun ada bilang, 'Kerna kita pun kturunan-nya juga.'
29Jadi, sbab kita kturunan Allah, t'ada patut kita fikir k'ada'an Allah itu s-rupa dngan mas perak atau batu, yang terukir dngan kpandaian dan akal manusia.
30Dan Allah sudah diamkan jman kbodohan itu, ttapi skarang dia suroh sgala orang di mana-mana pun bertobat:
31kerna dia sudah tntukan satu hari bila dia nanti hukumkan orang dunia ini dngan adil oleh itu orang yang dia sudah tntukan; dan ini perkara dia sudah ttapkan k-pada smoa orang dalam hal dia sudah bangkitkan dia itu deri antara orang mati."
32Bila dia-orang dngar deri-hal kbangkitan orang mati, ada orang yang tertawakan dia: ttapi ada lain pula kata, "Kita mau dngar angkau berchakap deri-hal ini lagi s-kali."
33Jadi itu, Paulus kluar deri antara dia-orang punya perhimponan.
34Ttapi ada juga orang yang champur sama dia, dan perchaya: antara ini ada satu orang Ariopagus bernama Dionusius, dan satu prempuan bernama Damaris, dan ada lain-lain lagi.
<< Kisah Para Rasul 17 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan